બિહારના સિવાનમાં વિદ્યાર્થી વિરોધ પ્રદર્શન દરમિયાન એક પોલીસકર્મી દ્વારા AK-47થી હવામાં ગોળીબાર કરવાનો વીડિયો સામે આવતા પોલીસ વિભાગમાં ખળભળાટ મચી ગયો છે. વીડિયો વાયરલ થયા બાદ અધિકારીઓએ તાત્કાલિક કાર્યવાહી કરીને સંબંધિત પોલીસકર્મીને સસ્પેન્ડ કરી દીધો છે. આ મામલે હવે તપાસ પણ શરૂ કરવામાં આવી છે.
મળતી માહિતી મુજબ, શનિવારે સિવાનમાં NEET પેપર લીકના આરોપો અને વિદ્યાર્થીઓ સામે થયેલી પોલીસ કાર્યવાહીના વિરોધમાં રાજ્યવ્યાપી બંધ દરમિયાન પ્રદર્શન ઉગ્ર બન્યું હતું. પરિસ્થિતિ કાબૂમાં લેવા પોલીસ અને પ્રદર્શનકારીઓ વચ્ચે અથડામણ થઈ હતી.
સિવાનના પોલીસ અધિક્ષક પુરણ કુમાર ઝાએ જણાવ્યું હતું કે વિરોધ દરમિયાન પોલીસ તરફથી લાંબા અંતરની હથિયારોથી ચાર રાઉન્ડ અને પિસ્તોલથી ત્રણ રાઉન્ડ સહિત કુલ આશરે 8થી 10 ગોળીઓ ચલાવવામાં આવી હતી. જોકે, બાકીની ગોળીઓ ક્યાંથી આવી તેની તપાસ ચાલી રહી છે.
આ હિંસક ઘટનામાં ત્રણ લોકોને ગોળી વાગ્યાની માહિતી સામે આવી છે, જ્યારે સિવાન એસપી સહિત અનેક પોલીસકર્મીઓ પણ ઘાયલ થયા હતા. પોલીસના જણાવ્યા અનુસાર બુલેટ કુમાર ગોંડ નામના વ્યક્તિને પગમાં ગોળી વાગી હતી.
હવે AK-47થી ફાયરિંગ કરતો પોલીસકર્મી સામે આવ્યા બાદ વિભાગે તેને સસ્પેન્ડ કર્યો છે અને સમગ્ર ઘટનાની તપાસ માટે વિશેષ ટીમ દ્વારા કાર્યવાહી આગળ કરવામાં આવી રહી છે.
