મહારાષ્ટ્રના નાશિકમાં એક ભયાનક માર્ગ અકસ્માતનો વીડિયો સોશિયલ મીડિયા પર ઝડપથી વાયરલ થઈ રહ્યો છે. CCTV કેમેરામાં કેદ થયેલા આ દ્રશ્યોમાં એક ટ્રક અચાનક કાબૂ બહાર જઈને ફ્લાયઓવર પરથી સીધો નીચે ખાબકતો જોવા મળે છે. સદનસીબે આ અકસ્માતમાં કોઈ જાનહાનિ થઈ નથી, પરંતુ ટ્રક ચાલક ગંભીર રીતે ઘાયલ થતાં તેને સારવાર માટે હોસ્પિટલમાં દાખલ કરવામાં આવ્યો છે.
મળતી માહિતી મુજબ, આ ઘટના નાશિકના સિંન્નર MIDC બાયપાસ વિસ્તારમાં રવિવારે બપોરે લગભગ 1 વાગ્યાની આસપાસ બની હતી. CCTV ફૂટેજમાં દેખાય છે કે ફ્લાયઓવર પર અચાનક ટ્રક ચાલકે વાહન પરથી નિયંત્રણ ગુમાવ્યું હતું. ત્યારબાદ ટ્રક રોડના બેરિકેડ સાથે અથડાઈને લગભગ 50 ફૂટ નીચે પટકાયો હતો.
અકસમાત સમયે ફ્લાયઓવરની નીચેની સડક પર કોઈ વાહન કે વ્યક્તિ હાજર ન હોવાથી મોટી દુર્ઘટના ટળી હતી. ટ્રકનું વજન વધારે હોવાને કારણે બેરિકેડ પણ તેનો ઝટકો સહન કરી શક્યું નહોતું અને ટ્રક નીચે પડી ગયો હતો.
ટ્રક નીચે પડતા અનેક વખત પલટી મારી હતી અને તેમાંથી ધુમાડો નીકળતો જોવા મળ્યો હતો. ઘટનાની જાણ થતાં સ્થાનિક લોકો તાત્કાલિક ઘટનાસ્થળે પહોંચ્યા હતા અને ઘાયલ ડ્રાઇવરને બહાર કાઢીને હોસ્પિટલ પહોંચાડ્યો હતો. પોલીસે અકસ્માતની તપાસ શરૂ કરી છે અને ટ્રક કયા કારણોસર કાબૂ બહાર ગયો તેની તપાસ ચાલી રહી છે.
