દેશભરમાં પરીક્ષાઓમાં પેપર લીક અને ગેરરીતિના વધતા મામલાઓ વચ્ચે કેન્દ્ર સરકારે સોમવારે લોકસભામાં મોટું પગલું ભર્યું છે. વિપક્ષના ભારે વિરોધ અને નારેબાજી વચ્ચે સરકારે ‘પબ્લિક એક્ઝામિનેશન્સ (પ્રિવેન્શન ઓફ અનફેર મીન્સ) એમેન્ડમેન્ટ બિલ, 2026’ રજૂ કર્યું છે. બિલ રજૂ થયા બાદ વિપક્ષના હોબાળાને કારણે લોકસભાની કાર્યવાહી બપોરે 2 વાગ્યા સુધી સ્થગિત કરવામાં આવી છે.
નીટ સહિતની મહત્વપૂર્ણ સ્પર્ધાત્મક પરીક્ષાઓમાં પેપર લીકના મુદ્દે દેશભરમાં ચર્ચા ચાલી રહી છે. આ સ્થિતિને ધ્યાનમાં રાખીને સરકાર પરીક્ષા વ્યવસ્થાને વધુ સુરક્ષિત અને પારદર્શક બનાવવા માટે કડક કાયદાકીય જોગવાઈ લાવી રહી છે.
આ બિલનો મુખ્ય ઉદ્દેશ પેપર લીક કરનારા લોકો, પરીક્ષા માફિયા અને ગેરરીતિમાં સામેલ સંસ્થાઓ સામે કડક કાર્યવાહી કરવાનો છે. પ્રસ્તાવિત કાયદા હેઠળ પરીક્ષાની વિશ્વસનીયતા સાથે ચેડા કરનારાઓ સામે દંડ અને સજાની જોગવાઈઓને વધુ મજબૂત બનાવવામાં આવી છે.
લોકસભામાં બિલ રજૂ થતાં જ વિપક્ષના સાંસદોએ પરીક્ષા કૌભાંડના મુદ્દે સરકાર સામે વિરોધ શરૂ કર્યો હતો અને ચર્ચાની માંગ કરી હતી. હોબાળો વધતા અધ્યક્ષે ગૃહની કાર્યવાહી થોડા સમય માટે સ્થગિત કરી છે.
સરકારનું કહેવું છે કે આ બિલ લાખો વિદ્યાર્થીઓના હિતોને ધ્યાનમાં રાખીને લાવવામાં આવ્યું છે અને તેનાથી ભવિષ્યમાં પેપર લીક જેવી ઘટનાઓ પર નિયંત્રણ લાવવામાં મદદ મળશે.
