સુરતના કેમિકલ બિઝનેસમેનનું નામ અમેરિકાના ફેન્ટેનિલ નેટવર્ક સાથે જોડાયા બાદ હવે તેને સાડા ચાર વર્ષની જેલની સજા ભોગવવી પડશે. સુરત સ્થિત Raxuter Chemicals સાથે સંકળાયેલા ભાવેશ રણછોડભાઈ લાઠિયાને અમેરિકાની ફેડરલ કોર્ટે ફેન્ટેનિલ બનાવવા માટે ઉપયોગમાં લેવાતા પ્રીકર્સર કેમિકલની સ્મગલિંગ અને વિતરણના કેસમાં 54 મહિનાની જેલની સજા ફટકારી છે. આ ઉપરાંત તેને 24,560 ડોલર જપ્તી તરીકે ચૂકવવાનો આદેશ પણ આપવામાં આવ્યો છે.
અમેરિકી તપાસ એજન્સીઓના જણાવ્યા મુજબ લાઠિયા ભારતમાંથી પોતાની કંપની મારફતે ફેન્ટેનિલ પ્રીકર્સર કેમિકલ અમેરિકા અને મેક્સિકો મોકલતો હતો. તપાસમાં કેમિકલની ઓળખ છુપાવવા માટે શિપમેન્ટ પર ખોટા લેબલ લગાવાતા હોવાનો ખુલાસો થયો હતો. એક શિપમેન્ટમાં પ્રતિબંધિત કેમિકલને ‘Vitamin C’ તરીકે દર્શાવવામાં આવ્યું હતું, જ્યારે અન્ય એક શિપમેન્ટ માટે ‘antacid’નું લેબલ ઉપયોગમાં લેવાની યોજના હતી.
આ કેસમાં Homeland Security Investigations (HSI)એ અંડરકવર ઓપરેશન હાથ ધર્યું હતું. તપાસ દરમિયાન અંડરકવર અધિકારીએ લાઠિયા સાથે વીડિયો કોલ પર વાતચીત કરી હતી. લાઠિયાએ 20 કિલોગ્રામ પ્રીકર્સર કેમિકલ સપ્લાય કરવા સંમતિ આપી હતી અને તેને ખોટા લેબલ સાથે મોકલવાની વ્યવસ્થા અંગે ચર્ચા કરી હતી. ત્યારબાદ આ શિપમેન્ટ ન્યૂયોર્ક પહોંચાડવામાં આવ્યું હતું.
અમેરિકી અધિકારીઓના જણાવ્યા મુજબ લાઠિયાને સારી રીતે જાણ હતી કે તેના દ્વારા સપ્લાય કરવામાં આવતા કેમિકલનો ઉપયોગ ફેન્ટેનિલ જેવા સિન્થેટિક ડ્રગના ઉત્પાદન માટે થઈ શકે છે. લાઠિયાએ એપ્રિલ 2026માં પોતાનો ગુનો કબૂલ્યો હતો. કેસમાં અમેરિકી તપાસ એજન્સીઓએ ભારત સ્થિત પ્રીકર્સર કેમિકલ સપ્લાયર સામે મહત્વપૂર્ણ કાર્યવાહી કરી છે.
