અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ઈરાનને કડક ચેતવણી આપી છે. સોશિયલ મીડિયા પર કરેલી પોસ્ટમાં ટ્રમ્પે દાવો કર્યો છે કે જો ઈરાન તેમની સામે કોઈ જીવલેણ હુમલો કરવાનો પ્રયાસ કરશે, તો અમેરિકા તાત્કાલિક જ ઈરાન પર 1000 મિસાઈલોના પ્રહાર કરશે. તેમણે વધુમાં જણાવ્યું કે પ્રથમ હુમલા બાદ હજારો વધુ મિસાઈલ છોડવા માટે પણ અમેરિકી સેના સંપૂર્ણ રીતે તૈયાર છે.
ટ્રમ્પે કહ્યું કે જરૂરી તમામ આદેશો પહેલેથી જ આપવામાં આવી ચૂક્યા છે અને અમેરિકાની સેનામાં એટલી ક્ષમતા છે કે જરૂર પડે તો લાંબા સમય સુધી ઈરાન સામે સૈન્ય કાર્યવાહી ચાલુ રાખી શકે. તેમના આ નિવેદન બાદ અમેરિકા-ઈરાન વચ્ચેનું તણાવ વધુ વધી ગયું છે.
હોર્મુઝ જળમાર્ગને લઈને અમેરિકાનું અલ્ટીમેટમ
આ દરમિયાન અમેરિકાએ ઈરાનને હોર્મુઝ જળમાર્ગ (Hormuz Strait) અંગે પણ કડક ચેતવણી આપી છે. અમેરિકાનું કહેવું છે કે ઈરાને તાત્કાલિક વાણિજ્યિક જહાજો માટે હોર્મુઝ જળમાર્ગ ખુલ્લો જાહેર કરવો જોઈએ અને જહાજો પર થતા હુમલા સંપૂર્ણપણે બંધ કરવા જોઈએ.
જહાજો પર કોઈ ચાર્જ નહીં વસૂલવાની માંગ
અમેરિકાના એક વરિષ્ઠ અધિકારીએ જણાવ્યું કે વોશિંગ્ટન ઈચ્છે છે કે ઈરાન સત્તાવાર રીતે જાહેર કરે કે હોર્મુઝ જળમાર્ગ તમામ દેશોના વેપારી જહાજો માટે સુરક્ષિત અને ખુલ્લો છે. સાથે જ જહાજો પર કોઈ હુમલો નહીં થાય અને કોઈપણ પ્રકારનો વધારાનો ચાર્જ અથવા ટેક્સ પણ વસૂલવામાં નહીં આવે.
અમેરિકાની સ્પષ્ટ ચેતવણી
અમેરિકાએ સ્પષ્ટ શબ્દોમાં કહ્યું છે કે જો ઈરાન આ શરતોનું પાલન નહીં કરે તો તેને ગંભીર પરિણામોનો સામનો કરવો પડી શકે છે. નોંધનીય છે કે હાલમાં અમેરિકા અને ઈરાન વચ્ચે તણાવપૂર્ણ પરિસ્થિતિ ચાલી રહી છે અને બંને દેશો વચ્ચે સૈન્ય કાર્યવાહીના કારણે વૈશ્વિક સ્તરે પણ ચિંતા વધી રહી છે.
