શ્રીલંકાથી એક ચોંકાવનારી ઘટના સામે આવી છે. રાજધાની કોલંબોની મુખ્ય જેલમાં બે ગેંગ વચ્ચે થયેલી હિંસક અથડામણમાં 4 જેલ ગાર્ડ અને 19 કેદીઓ સહિત કુલ 23 લોકોના મોત થયા હોવાના અહેવાલ છે. આ હિંસક ઘટનામાં 100થી વધુ લોકો ઈજાગ્રસ્ત થયા હોવાનું પણ જાણવા મળ્યું છે.
મળતી માહિતી મુજબ, છેલ્લા છ વર્ષમાં શ્રીલંકાની કોઈ જેલમાં બનેલી આ સૌથી મોટી હિંસક ઘટના માનવામાં આવી રહી છે. અહેવાલો અનુસાર, ડ્રગ્સના ગેરકાયદેસર ધંધા સાથે જોડાયેલા બે ગેંગના કેદીઓ વચ્ચે આખી રાત અથડામણ ચાલી હતી, જે બાદ જેલમાં અફરાતફરીનો માહોલ સર્જાયો હતો.
હિંસા બાદ તમામ ઘાયલોને કોલંબોના ઉત્તરમાં આવેલી નેગોમ્બો સરકારી હોસ્પિટલમાં સારવાર માટે ખસેડવામાં આવ્યા હતા. હોસ્પિટલના ડિરેક્ટર પુષ્પા ગામથાલેએ જણાવ્યું કે હોસ્પિટલમાં કુલ 23 મૃતદેહો લાવવામાં આવ્યા હતા, જ્યારે 100થી વધુ કેદીઓ અને જેલ ગાર્ડ સારવાર હેઠળ છે.
અધિકારીઓના જણાવ્યા મુજબ, ઘણા લોકોને ગોળી વાગવાથી ઈજાઓ પહોંચી છે, જ્યારે અન્ય અનેક લોકોને મારપીટ અને હિંસાના કારણે ગંભીર ઈજાઓ થઈ છે. સમગ્ર ઘટનાની તપાસ શરૂ કરવામાં આવી છે અને જેલની સુરક્ષા વધુ કડક કરવામાં આવી છે.