સુરતના રાજકારણમાં આજે ભારે ગરમાવો જોવા મળ્યો, જ્યારે વોર્ડ નંબર 14 (માતાવાડી-કરંજ)ના આમ આદમી પાર્ટીના મહિલા ઉમેદવાર ગૌશાલીબેન ગાંગડે કલેક્ટર કચેરી ખાતે આત્મહત્યાનો પ્રયાસ કર્યો હતો. અન્ય ઉમેદવારો ઉત્સાહભેર ફોર્મ ભરી રહ્યા હતા, ત્યારે ગૌશાલીબેને અચાનક ફિનાઈલ પી લેતા હડકંપ મચી ગયો. સુરક્ષાકર્મીઓ અને કાર્યકરોએ તરત જ 108 એમ્બ્યુલન્સ બોલાવી તેમને હોસ્પિટલમાં ખસેડ્યા, જ્યાં હાલ તેઓ તબીબી નિરીક્ષણ હેઠળ છે.
મતદાર યાદીમાં ભૂલથી ફોર્મ ન ભરાતા નિરાશા
માહિતી મુજબ, મતદાર યાદીમાં થયેલી ભૂલના કારણે ગૌશાલીબેન પોતાનું ઉમેદવારી ફોર્મ ભરી શક્યા નહોતાં. આ ટેકનિકલ ખામી અને ચૂંટણી પંચના નિયમોને કારણે તેઓ ગંભીર રીતે નિરાશ થઈ ગયા હતા.
ટેકનિકલ ખામી સામે આક્રોશ, અંતિમ પગલું ભર્યું
ગૌશાલીબેને જણાવ્યું કે પાર્ટીએ તેમને પૂરું સમર્થન આપ્યું હતું, પરંતુ ચૂંટણી પંચના નિયમો મુજબ ફોર્મ ભરતા પહેલાં ડેટામાં સુધારો શક્ય ન હોવાથી તેમની ઉમેદવારી અટવાઈ ગઈ. આ પરિસ્થિતિથી હતાશ થઈ તેમણે આત્મહત્યાનો પ્રયાસ કર્યો હોવાનું સામે આવ્યું છે. ઘટનાને પગલે કલેક્ટર કચેરી ખાતે પોલીસ બંદોબસ્ત વધારવામાં આવ્યો છે.
કલેક્ટર કચેરીમાં રાજકીય ઘર્ષણ, નારેબાજીથી માહોલ તંગ
ફોર્મ ભરવાના અંતિમ દિવસે કલેક્ટર કચેરી રાજકીય અથડામણનું મેદાન બની ગઈ હતી. આમ આદમી પાર્ટીના નેતા મનોજ સોરઠીયા સાથે ગોપાલ ઈટાલિયા પણ હાજર હતા, ત્યારે ભાજપના કાર્યકરો મોટી સંખ્યામાં ત્યાં ઉપસ્થિત રહ્યા હતા. ગોપાલ ઈટાલિયાને જોઈ ભાજપના કાર્યકરો દ્વારા ‘મોદી-મોદી’ના નારા સાથે ‘કેજરીવાલ ચોર છે’ જેવા સૂત્રોચ્ચાર કરવામાં આવ્યા, જેના કારણે માહોલ ગરમાયો.
બંને પક્ષ આમને-સામને, પોલીસને હસ્તક્ષેપ કરવો પડ્યો
ભાજપના નારાઓ સામે આમ આદમી પાર્ટીના કાર્યકરોએ ‘ઝાડુ-ઝાડુ’ અને ‘પરિવર્તન’ના નારા લગાવી પ્રતિકાર કર્યો. બંને પક્ષના કાર્યકરો વચ્ચે તણાવ એટલો વધ્યો કે ગમે ત્યારે અથડામણ થાય તેવી સ્થિતિ ઉભી થઈ. પોલીસે તરત જ હરકતમાં આવી બંને જૂથોને અલગ પાડ્યા અને પરિસ્થિતિ નિયંત્રણમાં લીધી.
નેતાઓની દરમિયાનગીરીથી શાંતિ, ફોર્મ પ્રક્રિયા પૂર્ણ
જ્યારે પરિસ્થિતિ બેકાબૂ થવાની નજીક હતી, ત્યારે બંને પક્ષના વરિષ્ઠ નેતાઓએ દરમિયાનગીરી કરી કાર્યકરોને શાંત પાડ્યા. પોલીસની કડક સુરક્ષા વચ્ચે અંતે ઉમેદવારોએ શાંતિપૂર્ણ રીતે પોતાના ફોર્મ રજૂ કર્યા. સુરતની ચૂંટણીમાં ભાજપ અને AAP વચ્ચે સીધી ટક્કર હોવાનું સ્પષ્ટ જોવા મળ્યું.
