કલ્પના કરો કે ઉત્તર પ્રદેશના એક સામાન્ય ગામમાં પ્રવેશતા જ કોઈ બાળક તમને ‘નમસ્તે’ નહીં પરંતુ ‘હોલા’ કહીને આવકારે અને પછી પોતાની ઓળખ સ્પેનિશ ભાષામાં આપે! આ વાત ભલે ફિલ્મી લાગે, પરંતુ બારાબંકી જિલ્લાના પૂરે બરવન ગામમાં ભાષા શીખવાની એક અનોખી પહેલે આ શક્ય બનાવ્યું છે. અહીંના બાળકો હિન્દી અને અંગ્રેજી સાથે સ્પેનિશ પણ શીખી રહ્યા છે અને વિદેશી પ્રવાસીઓ સાથે તેમની પોતાની ભાષામાં વાતચીત કરતા જોવા મળે છે.
આ પરિવર્તન પાછળ સ્થાનિક શિક્ષક રિઝવાન ખાનનો મહત્વનો ફાળો છે. રિઝવાને ‘Our Language School’ નામનું ભાષા શીખવવાનું પ્લેટફોર્મ શરૂ કર્યું હતું. શરૂઆતમાં તેમનો હેતુ અંગ્રેજી મારફતે લોકોને હિન્દી શીખવવાનો હતો. પરંતુ યુટ્યુબ પર કામ કરતી વખતે તેમને સમજાયું કે સ્પેનિશ ભાષા જાણનારા લોકો માટે હિન્દી શીખવાની સામગ્રીની મોટી જરૂરિયાત છે. ત્યાર બાદ તેમણે પોતે જ ઓનલાઈન માધ્યમથી સ્પેનિશ શીખવાનું શરૂ કર્યું અને ભાષા પર પકડ બનાવ્યા બાદ તેને બાળકો સુધી પહોંચાડવાનો નિર્ણય કર્યો હતો.
રિઝવાનના જણાવ્યા મુજબ, બાળકોને સ્પેનિશ શીખવવાની શરૂઆત કોરોના સમયગાળા દરમિયાન થઈ હતી. તેઓ લેપટોપ લઈને બહાર બેસીને અભ્યાસ અને ભાષા સાથે કામ કરતા હતા. બાળકો તેમને અલગ ભાષામાં વાત કરતા જોતા અને ધીમે ધીમે તેમની સાથે જોડાતા ગયા હતા. આ રીતે શરૂઆતમાં થોડાં બાળકોમાંથી ભાષા શીખનારાઓની સંખ્યા વધતી ગઈ હતી.
આજે ગામના કેટલાક બાળકો સ્પેનિશમાં પોતાનો પરિચય આપી શકે છે અને વિદેશી પ્રવાસીઓ સાથે વાતચીત કરવાનો આત્મવિશ્વાસ પણ ધરાવે છે. ગામમાં આવતા પ્રવાસીઓને સ્થાનિક જીવન, પરંપરા અને સંસ્કૃતિ સાથે જોડવાનો પ્રયાસ પણ કરવામાં આવે છે. રિઝવાને આ પહેલને ગ્રામીણ પર્યટન સાથે જોડવાનો પ્રયાસ કર્યો છે, જેના કારણે અન્ય દેશોના લોકો પણ આ ગામમાં રસ લેતા થયા છે.
આ કહાની માત્ર કોઈ વિદેશી ભાષા શીખવાની નથી, પરંતુ ગામડાના બાળકો માટે નવા અવસર ખોલવાની છે. રિઝવાનની પહેલે બતાવ્યું છે કે યોગ્ય માર્ગદર્શન અને સતત પ્રયાસ મળે તો શહેરોથી દૂર બેઠેલા બાળકો પણ દુનિયા સાથે પોતાની ભાષામાં નહીં, પરંતુ દુનિયાની અનેક ભાષાઓમાં વાતચીત કરવાની ક્ષમતા વિકસાવી શકે છે.
