સુરત જિલ્લામાં હવામાન વિભાગ દ્વારા તા. ૩૧/૦૭/૨૦૨૬ અને તા. ૦૧/૦૮/૨૦૨૬ દરમિયાન વાવાઝોડા સાથે ભારેથી અતિભારે વરસાદનું ‘રેડ એલર્ટ’ જાહેર કરવામાં આવ્યું છે. તોફાની પવન અને ભારે વરસાદના કારણે કોઈ અણબનાવ ન બને તથા વિદ્યાર્થીઓની સુરક્ષા જળવાઈ રહે તે હેતુથી સુરત જિલ્લા મેજિસ્ટ્રેટ તેજસ પરમારે ભારતીય નાગરિક સુરક્ષા સંહિતા-૨૦૨૩ ની કલમ-૧૬૩ હેઠળ એક મહત્વપૂર્ણ જાહેરનામું બહાર પાડ્યું છે.
આ હુકમ મુજબ સમગ્ર સુરત જિલ્લાના શહેરી અને ગ્રામીણ વિસ્તારમાં આવેલી તમામ આંગણવાડીઓ, સરકારી તથા ખાનગી પ્રાથમિક, માધ્યમિક અને ઉચ્ચતર માધ્યમિક શાળાઓ, આઈ.ટી.આઈ. (ITI), કોલેજો, તેમજ ખાનગી ટ્યુશન/કોચિંગ ક્લાસીસ સહિત તમામ શૈક્ષણિક સંસ્થાઓમાં ૩૧ જુલાઈ અને ૧ ઓગસ્ટના રોજ શૈક્ષણિક કાર્ય સંપૂર્ણપણે બંધ રાખવાનો આદેશ આપવામાં આવ્યો છે.
આ જાહેરનામાનો ભંગ કરનાર વ્યક્તિ સામે ભારતીય ન્યાય સંહિતાની કલમ-૨૨૩ મુજબ કાનૂની કાર્યવાહી અને શિક્ષા કરવામાં આવશે.
