તમારા ઘરમાં 5થી 17 વર્ષનું બાળક છે તો આધાર કાર્ડની આ નાની દેખાતી પ્રક્રિયા ભૂલશો નહીં. 30 સપ્ટેમ્બર 2026 પહેલાં બાળકનું જરૂરી બાયોમેટ્રિક અપડેટ કરાવી લો, કારણ કે હાલ આ સેવા મફતમાં ઉપલબ્ધ છે. ત્યાર બાદ કેટલીક શ્રેણીમાં અપડેટ માટે ₹125 સુધીનો ચાર્જ ચૂકવવો પડી શકે છે. UIDAIએ માતા-પિતાને સમયસર પ્રક્રિયા પૂર્ણ કરવાની અપીલ કરી છે.
UIDAIના નિયમ મુજબ, પાંચ વર્ષથી ઓછી ઉંમરે આધાર બનાવતી વખતે બાળકના ફિંગરપ્રિન્ટ અને આઇરિસ લેવામાં આવતા નથી. પાંચ વર્ષ પૂર્ણ થયા બાદ પ્રથમ ફરજિયાત બાયોમેટ્રિક અપડેટમાં ફોટો, ફિંગરપ્રિન્ટ અને બંને આઇરિસ નોંધવામાં આવે છે. 15 વર્ષની ઉંમરે ફરી બાયોમેટ્રિક અપડેટ કરાવવાનું હોય છે.
હાલ UIDAIની વિશેષ છૂટ હેઠળ 5થી 17 વર્ષની ઉંમરના બાળકો માટે 30 સપ્ટેમ્બર 2026 સુધી બાયોમેટ્રિક અપડેટ મફત છે. ખાસ કરીને 7થી 15 વર્ષની ઉંમરના બાળકો માટે આ છૂટ આપવામાં આવી છે. 30 સપ્ટેમ્બર બાદ સામાન્ય બાયોમેટ્રિક અપડેટ માટે ₹125ની ફી લાગુ થઈ શકે છે.
આધારમાં બાયોમેટ્રિક વિગતો અપડેટ હોવાથી સ્કૂલ-કોલેજ પ્રવેશ, સ્કોલરશિપ, વિવિધ સરકારી યોજનાઓ તેમજ NEET, JEE અને CUET જેવી પરીક્ષાઓમાં આધાર આધારિત ચકાસણી દરમિયાન મુશ્કેલી ઓછી થાય છે. તેથી છેલ્લી તારીખની રાહ જોયા વગર નજીકના આધાર કેન્દ્ર પર જઈને અપડેટ કરાવવું યોગ્ય રહેશે.