મહાદેવ બેટિંગ એપ કેસમાં એક્સ બિગ બોસ કન્ટેસ્ટન્ટ શેફાલી બગ્ગા પર પ્રમોશનલ વીડિયો બનાવવા બદલ પૈસા લેવાનો આરોપ; શેફાલીએ કહ્યું—અજાણતાં એપનું પ્રમોશન કર્યું હતું અને તપાસમાં સંપૂર્ણ સહયોગ આપ્યો છે.
ટેલિવિઝન સ્પોર્ટ્સ પ્રેઝેન્ટર અને બિગ બોસની પૂર્વ સ્પર્ધક શેફાલી બગ્ગાએ મહાદેવ બેટિંગ એપના હાઈ-પ્રોફાઇલ કેસમાં પોતાની ભૂમિકા અંગે સ્પષ્ટતા કરી છે. તેમણે જણાવ્યું કે તેમણે ‘અજાણતાં’ બેટિંગ એપનું પ્રમોશન કર્યું હતું અને તપાસ દરમિયાન અધિકારીઓને સંપૂર્ણ સહયોગ આપ્યો છે.
એન્ફોર્સમેન્ટ ડિરેક્ટોરેટ (ED)ની તાજેતરની ચાર્જશીટ અનુસાર, આ કેસમાં પૂછપરછ બાદ શેફાલીએ ₹1.20 કરોડ જમા કરાવ્યા હતા. તેમના પર મહાદેવ પ્લેટફોર્મ પર બેટિંગ એપ્સનું પ્રમોશન કરવા બદલ આ રકમ મેળવવાનો આરોપ છે.
શેફાલી બગ્ગાએ કહ્યું—મેં પૈસા પરત કરી દીધા છે
સમાચાર એજન્સી IANS સાથે વાતચીત દરમિયાન શેફાલી બગ્ગાએ જણાવ્યું હતું કે તેમનું કામ માત્ર સોશિયલ મીડિયા પર કેટલીક બ્રાન્ડ્સનું અજાણતાં પ્રમોશન કરવા સુધી મર્યાદિત હતું. તેમણે કહ્યું કે ઘણી જાણીતી હસ્તીઓ અને સેલિબ્રિટીઝ પણ આ પ્રકારનું કામ કરે છે.
શેફાલીએ વધુમાં જણાવ્યું કે આ બ્રાન્ડ્સ અથવા અન્ય કોઈ સંસ્થા સાથે જોડાયેલી પ્રવૃત્તિઓ કે કામગીરીમાં તેમની કોઈ ભૂમિકા નહોતી. તેમણે તપાસમાં સંપૂર્ણ સહયોગ આપ્યો છે, પૈસા પરત કર્યા છે અને તેમને દેશના કાયદા પર સંપૂર્ણ વિશ્વાસ છે.
પ્રમોશનલ વીડિયો બનાવવા બદલ મળ્યા હતા આશરે ₹1.5 કરોડ
EDની ચાર્જશીટ મુજબ, તપાસ એજન્સીને જાણવા મળ્યું હતું કે મહાદેવ બેટિંગ એપ સિન્ડિકેટ માટે પ્રમોશનલ વીડિયો બનાવવા બદલ શેફાલી બગ્ગાને આશરે ₹1.5 કરોડ મળ્યા હતા. એજન્સીએ જણાવ્યું કે દિલ્હીમાં તેમના નિવાસસ્થાને તપાસ દરમિયાન ₹30 લાખ રોકડા જપ્ત કરવામાં આવ્યા હતા.
ક્રિકેટ અને ફૂટબોલ પર કરોડો રૂપિયાના ગેરકાયદે સટ્ટાનો આરોપ
મહાદેવ બુક તરીકે ઓળખાતું મહાદેવ બેટિંગ એપ તાજેતરનાં વર્ષોમાં ભારતનાં મોટા ઓનલાઈન બેટિંગ પ્લેટફોર્મ્સમાંનું એક બનીને ઊભર્યું છે. આ એપ અને તેની સાથે જોડાયેલી વેબસાઇટ્સ દ્વારા ક્રિકેટ અને ફૂટબોલ સહિતની રમતો પર મોટા પાયે ગેરકાયદે સટ્ટાબાજી થતી હોવાનો આરોપ છે.
મહાદેવ બેટિંગ એપનું નેટવર્ક દેશભરમાં ફેલાયું
અહેવાલો અનુસાર, મહાદેવ બેટિંગ એપનું નેટવર્ક દેશભરમાં ફેલાયેલું છે અને આ કેસમાં અનેક હાઈ-પ્રોફાઇલ લોકોનાં નામ સામે આવ્યાં છે. અગાઉની તપાસ દરમિયાન EDએ કરોડો રૂપિયાની સંપત્તિ જપ્ત કરી હતી અને કથિત કૌભાંડ સાથે સંકળાયેલા કેટલાક લોકોની ધરપકડ પણ કરી હતી. હાલમાં ED આ દેશવ્યાપી બેટિંગ નેટવર્કની તપાસનો વ્યાપ વધારી રહી છે. આ કેસમાં તપાસ આગળ વધતાં અન્ય વિગતો પણ સામે આવી શકે છે.
