ગર્લફ્રેન્ડનો પ્રેમ બતાવવા કાર પર કરાવવામાં આવ્યા 3,400 કિસના નિશાન, પરંતુ રસ્તા પર ઉતર્યા બાદ આ ‘કિસિંગ કાર’એ માલિકને જ મોંઘી પડી! સોશિયલ મીડિયા પર તસવીરો અને વીડિયો વાયરલ થતાં ગ્વાલિયર ટ્રાફિક પોલીસ હરકતમાં આવી હતી અને કાર માલિક સામે કાર્યવાહી કરી હતી. આ અનોખો મામલો હાલ સોશિયલ મીડિયા પર ચર્ચાનો વિષય બન્યો છે.
મધ્યપ્રદેશના ગ્વાલિયરના થાટીપુર વિસ્તારમાં આદિત્ય સિકરવારની કાર પર તેની ગર્લફ્રેન્ડે લિપસ્ટિકથી અંદાજે 3,400 કિસ માર્ક્સ બનાવ્યા હતા. માહિતી મુજબ, વિદેશી સોશિયલ મીડિયા ટ્રેન્ડથી પ્રેરાઈને કારને કંઈક અલગ અને યાદગાર બનાવવાનો વિચાર આવ્યો હતો. કારની આખી બોડી પર આ નિશાન બનાવવામાં લગભગ સાડા ત્રણથી ચાર કલાકનો સમય લાગ્યો હતો. ત્યારબાદ કારનો વીડિયો સોશિયલ મીડિયા પર અપલોડ કરવામાં આવ્યો અને તે ઝડપથી વાયરલ થતા વીડિયોને એક જ દિવસમાં લાખો વ્યૂઝ મળ્યા હતા.
સોશિયલ મીડિયા પર વાયરલ થયેલી તસવીરમાં કારનો નંબર દેખાતો હોવાથી ટ્રાફિક પોલીસે વાહનને ટ્રેસ કર્યું હતું. ત્યારબાદ થાટીપુર વિસ્તારમાંથી કારને અટકાવી માલિકને પૂછપરછ માટે બોલાવવામાં આવ્યો હતો. પોલીસ કાર્યવાહી બાદ કાર માલિકને ₹5,500નો દંડ ફટકારવામાં આવ્યો હતો. સાથે જ કાર પરથી લિપસ્ટિકના તમામ નિશાન દૂર કરાવવામાં આવ્યા હતા. આદિત્યએ પોતાની ભૂલ સ્વીકારી અને કાર જાતે સાફ કરી હોવાનું અહેવાલોમાં જણાવાયું છે.
આ ઘટનાએ સોશિયલ મીડિયા પર વાયરલ થવા માટે કરવામાં આવતા અજીબોગરીબ પ્રયોગો સાથે ટ્રાફિક નિયમોનું પાલન કેટલું જરૂરી છે, તેના પર પણ ચર્ચા જગાવી છે.
