વર્ષોની મહેનત, ઈજાનો સંઘર્ષ અને ટીમમાંથી બહાર થવાની પીડા બાદ રાજા મુથુપાંડી આજે ફરી એકવાર ભારતનું નામ રોશન કર્યું છે. કોમનવેલ્થ ગેમ્સ 2026માં ભારતીય વેઈટલિફ્ટરે શાનદાર પ્રદર્શન કરીને પુરુષોની 65 કિલોગ્રામ કેટેગરીમાં સિલ્વર મેડલ જીત્યો છે, જેના કારણે ભારતના મેડલ ટેલીમાં વધુ એક વધારો થયો છે.
ગ્લાસગોમાં રમાઈ રહેલી કોમનવેલ્થ ગેમ્સમાં રાજા મુથુપાંડીએ કુલ 286 કિલોગ્રામ વજન ઉઠાવીને બીજું સ્થાન મેળવ્યું હતું. તેણે સ્નેચમાં 126 કિલોગ્રામ અને ક્લીન એન્ડ જર્કમાં 160 કિલોગ્રામ વજન સફળતાપૂર્વક ઉઠાવ્યું હતું.
26 વર્ષીય રાજા માટે આ જીત ખાસ રહી છે, કારણ કે વર્ષ 2019માં થયેલી ગંભીર કોણીની ઈજાએ તેની કારકિર્દી પર મોટો ખતરો ઉભો કર્યો હતો. કોરોના મહામારી દરમિયાન તેની રિહેબિલિટેશન પ્રક્રિયા પણ મુશ્કેલ બની હતી. ત્યારબાદ વજન કેટેગરી બદલાવ અને કડક સ્પર્ધાના કારણે તેને 2022 બર્મિંગહામ કોમનવેલ્થ ગેમ્સમાં સ્થાન મળ્યું ન હતું.
જોકે, રાજાએ હિંમત ન હારી અને વાપસી કરીને આંતરરાષ્ટ્રીય સ્તરે પોતાની ઓળખ બનાવી. તેની આ સફળતા બાદ કેન્દ્રીય રમત મંત્રી મનસુખ માંડવિયાએ પણ અભિનંદન પાઠવીને તેને ભારતીય વેઈટલિફ્ટિંગ માટે ગૌરવની ક્ષણ ગણાવી હતી.
રાજાના સિલ્વર સાથે ભારતે એક જ દિવસે વેઈટલિફ્ટિંગમાં ત્રણ મેડલ જીત્યા છે. અગાઉ મીરાબાઈ ચાનુએ ગોલ્ડ અને ચનંબમ રિશિકાંતાએ સિલ્વર મેડલ જીતીને ભારતની મેડલ સફરને મજબૂત બનાવી હતી
