કેન્દ્રીય મંત્રી જ્યોતિરાદિત્ય સિંધિયાના માતા માધવી રાજે સિંધિયાનું ગુરુવારે સવારે AIIMSમાં નિધન થયું હતું. સવારે ૯.૨૮ કલાકે તેમણે અંતિમ શ્વાસ લીધા હતા. સિંધિયા પરિવારની રાજમાતા છેલ્લા કેટલાક દિવસોથી દિલ્હી AIIMSમાં વેન્ટિલેટર પર હતા.

કેન્દ્રીય મંત્રી સિંધિયાના કાર્યાલયમાંથી કહેવામાં આવ્યું છે કે, અમે ખૂબ દુ:ખ સાથે કહેવા માંગીએ છીએ કે, રાજમાતા સાહેબ આ દુનિયામાં નથી રહ્યા. કેન્દ્રીય મંત્રી જ્યોતિરાદિત્ય સિંધિયાના માતા અને ગ્વાલિયરના રાજવી પરિવારના રાજમાતા માધવી રાજે સિંધિયા છેલ્લા બે મહિનાથી દિલ્હીની AIIMS હોસ્પિટલમાં સારવાર હેઠળ હતા. છેલ્લા બે અઠવાડિયામાં તેમની તબિયત ખૂબ નાજુક હતી.

છેલ્લા કેટલાક દિવસોથી રાજમાતાની તબિયત સતત બગડી રહી હતી. તેમને AIIMSમાં વેન્ટિલેટર પર હતી. તે સેપ્સિસની સાથે ન્યુમોનિયાથી પીડિત હતા. છેલ્લા કેટલાક દિવસોમાં રાજમાતાની તબિયત વધુ બગડતાં તેમને દાખલ કરવામાં આવ્યા હતા. રાજમાતાના નિધન બાદ તેમના પાર્થિવ દેહને અંતિમ સંસ્કાર માટે મધ્યપ્રદેશના ગ્વાલિયર લાવવામાં આવશે. જે બાદ ગુરુવારના રોજ અહીં તેમના અંતિમ સંસ્કાર કરવામાં આવશે.

માધવી રાજે સિંધિયા નેપાળના શાહી પરિવારની પુત્રી હતા. ગ્વાલિયર પાસે મહારાજ માધવરાજ સિંધિયાની સાથે ૮ મે ૧૯૬૬ના રોજ તેમના લગ્ન થયા હતા. જો કે, માધવ રાજ સિધિયાનું એક હેલિકોપ્ટર દુર્ઘટનામાં અવસાન થયું હતું. માધવી રાજે સિંધિયા મોટાભાગે દિલ્હીમાં રહેતા હતા. તે સાર્વજનિક કાર્યક્રમો અને મીડિયાથી અંતર જાળવીને રાખ્યું હતું.

પતંજલિ આયુર્વેદની ભ્રામક જાહેરાત મામલે આજે સુપ્રીમ કોર્ટમાં ફરી સુનાવણી હાથ ધરવામાં આવી હતી. જસ્ટિસ હિમા કોહલી અને અહસાનુદ્દીન અમાનુલ્લાહની બેન્ચે આજે પતંજલિ આયુર્વેદની ખોટી જાહેરાતના કેસની સુનાવણી કરી. સુપ્રીમ કોર્ટે બાબા રામદેવ અને બાલકૃષ્ણ વિરુદ્ધ કોર્ટની અવમાનના માટે કેસ ચલાવવામાં આવશે કે નહીં તે અંગે પોતાનો આદેશ અનામત રાખ્યો હતો. આ સાથે તેણે IMA પ્રમુખને સખત ઠપકો આપ્યો અને તેમની માફીને પણ ફગાવી દીધી. સુનાવણી દરમિયાન યોગ ગુરુ બાબા રામદેવ અને આચાર્ય બાલકૃષ્ણ કોર્ટમાં હાજર હતા.

જસ્ટિસ કોહલીએ કહ્યું, ‘તમારી માફી માટે અમારી પાસે એટલું જ કહેવાનું છે, જે અમે પતંજલિ માટે કહ્યું હતું. આ કેસ કોર્ટમાં છે, જેમાં તમે પક્ષકાર છો. તમારા વકીલો ટિપ્પણીઓને દૂર કરવા માટે કહી શક્યા હોત, પરંતુ તમે પ્રેસમાં ગયા. અમે બિલકુલ ખુશ નથી. અમે આટલી સરળતાથી માફ નહીં કરીએ. તેણે કહ્યું, ‘તમે અન્યો માટે કેવો દાખલો બેસાડો છો. આ કેસની સુનાવણી જસ્ટિસ હિમા કોહલી અને જસ્ટિસ અહસાનુદ્દીન અમાનુલ્લાની સુપ્રીમ કોર્ટની બેંચ દ્વારા કરવામાં આવી હતી. જો કે, સુપ્રીમ કોર્ટે બાબા રામદેવ અને બાલકૃષ્ણ વિરુદ્ધ કોર્ટની અવમાનના માટે કેસ ચલાવવામાં આવશે કે નહીં તે અંગે પોતાનો આદેશ અનામત રાખ્યો હતો.

સુપ્રીમ કોર્ટે IMAના અધ્યક્ષને પણ ફટકાર લગાવતાં કહ્યું હતું કે તમે આ પ્રકારના શબ્દોનો ઉપયોગ કર્યો? એ બહુ દુર્ભાગ્યપૂર્ણ છે. તમે એ જ કર્યું છે, જે બીજા પક્ષકારે કર્યું છે. તમે કોર્ટ વિશે કંઈ પણ ના કહી શકો. IMA અધ્યક્ષે કોર્ટની વિના શરતે માફી માગી હતી.

તાજેતરમાં જ દિલ્હી અને અમદાવાદમાં શાળાઓને બોમ્બથી ઉડાવી દેવાની ધમકી મળ્યાની ઘટનાઓ બાદ દેશમાં ફરીથી દિલ્હીની ચાર હોસ્પિટલોને ફરી એકવાર બોંબથી ઉડાવી દેવાની ધમકી મળી છે. દીપ ચંદ બંધુ હોસ્પિટલ, જીટીબી હોસ્પિટલ, દાદા દેવ હોસ્પિટલ અને હેડગેવાર હોસ્પિટલને ઈમેલ દ્વારા બોંબની ધમકી મળી છે. ધમકીને કારણે OPD દર્દીઓને તપાસ માટે બહાર કાઢવામાં આવ્યા હતા. ફાયર બ્રિગેડની ટીમે જણાવ્યું કે, સ્થળ પર સર્ચ ઓપરેશન હાથ ધરવામાં આવી રહ્યું છે. અશોક વિહારની દીપ ચંદ બંધુ હોસ્પિટલથી સવારે ૧૦:૪૫ વાગ્યે, ડાબરીની દાદા દેવ હોસ્પિટલમાંથી સવારે ૧૦:૫૫ વાગ્યે, ફરશ બજારની હેડગેવાર હોસ્પિટલમાંથી સવારે ૧૧:૦૧ વાગ્યે અને જીટીબી હોસ્પિટલથી સવારે ૧૧:૦૧ વાગ્યે કોલ આવ્યો હતો.

અધિકારીએ જણાવ્યું હતું કે ચારે હોસ્પિટલ પર ટીમને રવાના કરી દેવામાં આવી છે. હાલ ટીમ ખુબ જ સાવચેતીપૂર્વક અને ઊંડાણથી તપાસ કરી રહી છે. હાલ દિલ્હી પોલીસ પણ આ તપાસમાં લાગી છે કે જેથી મેઈલ ક્યાંથી કરવામાં આવ્યો હતો તે જાણી શકાય. બુરારી હોસ્પિટલ અને સંજય ગાંધી હોસ્પિટલમાં પણ ધમકીભર્યા ઈમેલ મળ્યા હતા. જે બાદ હોસ્પિટલોમાં સર્ચ ઓપરેશન હાથ ધરાયું હતું. હોસ્પિટલોને ધમકીભર્યો ઈમેલ મળ્યા બાદ પોલીસ, ફાયર વિભાગ અને નાગરિક એજન્સીઓ બોમ્બ અને ડોગ સ્ક્વોડની મદદથી સર્ચ ઓપરેશનમાં લાગી ગઈ હતી.

આ પહેલા પણ ૧૨મી મેના રોજ દિલ્હીના આઠ દવાખાનાઓ અને એરપોર્ટને પણ બમ્બથી ઉડાવી દેવાની ધમકી મળી હતી. પરંતુ અંતે તે અફવા નીકળી હતી. પરંતુ ત્યારબાદ તમામ હોસ્પીટલો અને એરપોર્ટની સુરક્ષામાં વધારો કરી દેવામાં આવ્યો હતો. તમામ સ્થળોએ આવતા જતા લોકોની અને તેમના સામાનની તપાસ કરવામાં આવી રહી છે. જો કે હજુ સુધી કોઈ સંવેદનશીલ વસ્તુઓ મળી નથી.