રાજકોટના કાલાવાડ રોડ પર આવેલા ટીઆરપી ગેમ ઝોનમાં ભીષણ આગ લાગવાથી ૨૭ લોકોના કરુણ મોત થયા છે. માત્ર થોડીક જ સેકન્ડમાં સમગ્ર ગેમ ઝોન બળીને ખાક થઇ ગયુ. ગેમ ઝોનની અંદર રહેલા લોકોને બહાર નીકળવાનો મોકો જ ન મળ્યો. રાજકોટ ટીઆરપી અગ્નિકાંડની તપાસ માટે સ્પેશિયલ ઇન્વેસ્ટીગેશન ટીમની રચવા કરવામાં આવી છે.

ગેમ

ઝોનની સફરે આવીને આગના કારણે મોતના મુખમાં ધકેલાઈ જનારા તમામ મૃતકો ગોંડલના હોવાનું કહેવાય છે. આ દરમિયાન કુલ ૨૬ મૃતદેહ રાજકોટ સિવિલમાં ખસેડાયા છે. પ્રત્યક્ષદર્શીઓના મતે અનેક મૃતદેહો રાખમાં ફેરવાઈ ગયા હતા, જ્યારે કેટલાકની તો ઓળખ પણ થઈ શકે એમ ન હતી. પ્રાથમિક તપાસ પ્રમાણે, આ મૃતકોમાં મોટા ભાગના બાળકો હોવાનું કહેવાય છે. મૃતકોમાં 9થી વધુ બાળકોની ઉંમર 18થી ઓછી હોવાના અહેવાલ મળ્યા છે.

આ ઘટનાની જાણ થતા જ પોલીસ કમિશનર રાજુ ભાર્ગવ અને કલેક્ટર ઘટના સ્થળે પહોંચ્યા હતા, જેમણે સમગ્ર ગેમ ઝોન બંધ કરવાનો આદેશ આપ્યો છે. મળતા અહેવાલો મુજબ આ ઘટનામાં પોલીસે ચાર લોકોની અટકાયત કરી છે. તેમજ ગેમ ઝોનનો 30-40નો સ્ટાફ ફરાર થયો હોવાના પણ અહેવાલો સામે આવ્યા છે.

આ ઘટનાને લઈને CM ભુપેન્દ્ર પટેલે આ ઘટના અંગે સંવેદના વ્યક્ત કરી છે. તેમણે ટ્વિટ કરીને જણાવ્યું હતું કે, “રાજકોટમાં ગેમ ઝોનમાં સર્જાયેલી આગની દુર્ઘટનામાં તત્કાલ બચાવ અને રાહત કામગીરી માટે મહાનગરપાલિકા અને વહીવટી તંત્રને સૂચનાઓ આપી છે. ઇજાગ્રસ્ત લોકોને તાત્કાલિક સારવાર મળે તે માટેની વ્યવસ્થાઓને અગ્રતા આપવા પણ સૂચના આપી છે.”

રાજકોટ પોલીસ કમિશ્નરના જણાવ્યા અનુસાર, જગ્યાનો માલિકનું નામ યુવરાજસિંહ છે, જેણે જગ્યા ભાડે આપી હતી. હાલમાં પોલીસે યુવરાજસિંહ સોલંકી, ગેમ ઝોન ચલાવનાર પ્રકાશ જૈન, મેનેજર નિતીન જૈન, રાહુલ રાઠોડની અટકાયત કરી. અપડેટ માહિતી અનુસાર, રાજકોટ ક્રાઈમ બ્રાન્ચે ૧૦ લોકોની અટકાયત કરી છે. જાણવા મળ્યું છે કે, ૩૦-૩૫ લોકોનો સ્ટાફ હતો, તેમની યાદી બનાવી તમામની અટકાયત કરી પુછપરછ કરવામાં આવશે.

સાત તબક્કાની લોકસભા ચૂંટણી ૨૦૨૪ના છઠ્ઠા તબક્કામાં, આઠ રાજ્યો અને કેન્દ્રશાસિત પ્રદેશોની કુલ ૫૮ બેઠકો માટે આજે ૨૫ મેના રોજ મતદાન થઈ રહ્યું છે. છઠ્ઠા તબક્કામાં ૮૮૯ ઉમેદવારો ચૂંટણી મેદાનમાં છે. આ તબક્કામાં બિહારની ૮, હરિયાણાની ૧૦, ઝારખંડની ૪, દિલ્હીની ૭, ઓડિશાની ૬, ઉત્તર પ્રદેશની ૧૪, પરિશ્ચમ બંગાળની ૮ અને જમ્મુ-કાશ્મીરની ૧ બેઠક પર મતદાન થઈ રહ્યું છે. મતદાનનો સમય સવારે ૭ થી સાંજના ૬ વાગ્યા સુધીનો છે.

ઓડિશાના પુરી વિસ્તારના એક બૂથમાં EVMમાં ખામી સર્જાઈ છે. ભાજપના ઉમેદવાર સંબિત પાત્રાએ આ માહિતી આપી છે, તેમણે અપીલ કરી છે કે અહીં મતદાનનો સમય થોડો વધારવો જોઈએ જેથી દરેક મતદાર મતાધિકારનો ઉપયોગ કરી શકે.

ઉત્તર પ્રદેશના વર્તમાન સાંસદ અને સુલતાનપુરના ભાજપના ઉમેદવાર મેનકા ગાંધીએ કહ્યું, “૨-૩ જગ્યાએ EVMમાં સમસ્યા છે, ૨-૩ જગ્યાએ તો નાની-નાની સમસ્યાઓ છે, કેટલાક અધિકારીઓ પોતે પ્રશિક્ષિત નથી.

રાજધાની દિલ્હીમાં આમ આદમી પાર્ટીનું કહેવું છે કે મતદાન ધીમી ગતિએ ચાલી રહ્યું છે. કેજરીવાલે કહ્યું કે ચૂંટણી પંચે સુનિશ્ચિત કરવું જોઈએ. આમ આદમી પાર્ટીના નેતા આતિશીએ પણ કહ્યું કે દિલ્હીના કેટલાક વિસ્તારોમાં મતદાન ધીમું છે. ચાંદની ચોકનો દિલ્હી ગેટ વિસ્તાર મુસ્લિમ પ્રભુત્વ ધરાવતો વિસ્તાર છે. અહીંના મતદાન મથક પર લાંબી લાઈનો જોવા મળી રહી છે અને EVM છેલ્લા ૨ કલાકથી બગડેલું છે. મુસ્લિમ મહિલા મતદારોનું કહેવું છે કે તેઓ મોંઘવારી, મહિલા સુરક્ષા અને બેરોજગારી જેવા મુદ્દાઓ પર મતદાન કરી રહી છે. લોકો વર્તમાન સાંસદ અને સરકારથી નાખુશ છે. સાથે જ પુરુષ મુસ્લિમ મતદારોનું પણ કહેવું છે કે બેરોજગારી સૌથી મોટો મુદ્દો છે અને તેઓ મોંઘવારીથી ખૂબ જ ચિંતિત છે.

પશ્ચિમ બંગાળમાં સીએમ મમતા બેનર્જીએ આરોપ લગાવ્યો હતો કે ભાજપ ઈવીએમ સાથે છેડછાડ કરીને વોટિંગ સાથે ચેડાં કરવાનો પ્રયાસ કરી રહ્યો છે. પાર્ટીએ એમ પણ કહ્યું કે આજે બાંકુરાના રઘુનાથપુરમાં ૫ ઈવીએમ પર ભાજપનું ટેગ જોવા મળ્યું હતું. તેમણે ચૂંટણી પંચને કહ્યું કે તે તરત જ આની તપાસ કરે અને પગલાં લે.