વડાપ્રધાન નરેન્દ્ર મોદીએ આજે ગુજરાતના પ્રવાસ દરમિયાન ‘આત્મનિર્ભર ભારત’ અભિયાન હેઠળ ચાલી રહેલા વિકાસ કાર્યોનો ઉલ્લેખ કર્યો હતો. સુરતના હજીરા ઉપરાંત આંતરરાજ્ય માર્ગ નેટવર્કનો ઉલ્લેખ કરતાં તેમણે કહ્યું કે કેટલાક લોકો દેશમાં નિરાશાનું વાતાવરણ ઊભું કરવામાં લાગ્યા છે. પીએમ મોદીએ વિપક્ષી રાજકીય પક્ષો પર આકરા પ્રહાર કરતાં કોઈનું નામ લીધા વિના જણાવ્યું કે આ લોકો માત્ર નિરાશા ફેલાવવાનું કામ જ નથી કરતા, પરંતુ આત્મનિર્ભર ભારત અભિયાનની પણ મજાક ઉડાવે છે. કોંગ્રેસ અથવા રાહુલ ગાંધીનું નામ લીધા વગર તેમણે કહ્યું કે કેટલાક લોકો ભારતને નીચું દેખાડવાનો પ્રયાસ કરી રહ્યા છે.

કર્ણાટકમાં મુખ્યમંત્રી બદલાયા, પીએમ મોદીએ શું કહ્યું?
વડાપ્રધાન મોદીએ પશ્ચિમ બંગાળ વિધાનસભા ચૂંટણીમાં મળેલી સફળતાનો પણ ઉલ્લેખ કર્યો હતો. તેમણે જણાવ્યું કે વિદેશ પ્રવાસ દરમિયાન પણ તેમને બંગાળના જનાદેશની ચર્ચા સાંભળવા મળી હતી. તાજેતરમાં કર્ણાટકમાં થયેલા મુખ્યમંત્રી પરિવર્તનનો ઉલ્લેખ કરતાં તેમણે કહ્યું કે આ રાજ્યમાં પણ કોંગ્રેસ વિરુદ્ધ લોકોમાં ભારે આક્રોશ જોવા મળી રહ્યો છે.

જનતાએ કોંગ્રેસને હાંસિયા પર ધકેલી દીધી
પીએમ મોદીએ ભાજપને મળતી રાજકીય સફળતાઓનો ઉલ્લેખ કરતાં કહ્યું કે દેશ અરાજકતા, અનિશ્ચિતતા અને નિરાશાને પસંદ કરતો નથી. કોંગ્રેસ છેલ્લા 12 વર્ષથી અરાજકતા અને અનિશ્ચિતતા ફેલાવીને પોતાના માટે રાજકીય તક શોધી રહી છે, પરંતુ દેશની જનતા વારંવાર તેને કરારો જવાબ આપી રહી છે.

તેમણે કહ્યું કે ગુજરાતની જનતાએ તો કોંગ્રેસને હાંસિયા પર ધકેલી દીધી છે. જ્યાં જ્યાં કોંગ્રેસની સરકારો છે, ત્યાંની જનતા પણ કોંગ્રેસના કથિત કુશાસનથી કંટાળી ગઈ છે. પીએમ મોદીએ ભારપૂર્વક જણાવ્યું કે ભારત હવે નકારાત્મકતા છોડીને વિકાસ, આત્મનિર્ભરતા અને પ્રગતિના માર્ગે ઝડપથી આગળ વધી રહ્યું છે.

વિશ્વ પર્યાવરણ દિવસ નિમિત્તે વડાપ્રધાન નરેન્દ્ર મોદીએ આજે સુરતની મુલાકાત દરમિયાન શહેર અને સમગ્ર દક્ષિણ ગુજરાતને વિકાસનું મોટું તોહફું આપ્યું. વડાપ્રધાને સુરતમાં ₹18,800 કરોડથી વધુના વિવિધ વિકાસલક્ષી પ્રોજેક્ટ્સનું લોકાર્પણ, શિલાન્યાસ અને રાષ્ટ્રને સમર્પણ કર્યું હતું.

સુરતમાં આયોજિત ભવ્ય કાર્યક્રમ દરમિયાન વડાપ્રધાને માર્ગ અને પરિવહન, આરોગ્ય, વીજ પુરવઠો, ઔદ્યોગિક વિકાસ તેમજ આધુનિક ઇન્ફ્રાસ્ટ્રક્ચર સાથે સંકળાયેલા અનેક મહત્વપૂર્ણ પ્રોજેક્ટ્સને લીલી ઝંડી આપી હતી. આ પ્રોજેક્ટ્સના અમલીકરણથી ગુજરાતના વિકાસને નવી ગતિ મળશે તેમજ રોજગારીની નવી તકોનું સર્જન થશે.

વડાપ્રધાને વડોદરા-મુંબઈ 8-લેન એક્સપ્રેસવેના મહત્વપૂર્ણ પેકેજોને રાષ્ટ્રને સમર્પિત કર્યા હતા, જે ગુજરાત અને મહારાષ્ટ્ર વચ્ચે ઝડપી પરિવહન અને આર્થિક જોડાણને વધુ મજબૂત બનાવશે. ઉપરાંત, નેશનલ હાઈવે-56ના અપગ્રેડેશન સહિતના અનેક માર્ગ પ્રોજેક્ટ્સના ખાતમુહૂર્ત પણ કરવામાં આવ્યા હતા.

આરોગ્ય ક્ષેત્રે પણ મહત્વપૂર્ણ પગલું ભરતાં વડાપ્રધાને 200 બેડની આધુનિક ESIC હોસ્પિટલનું લોકાર્પણ કર્યું હતું. આ હોસ્પિટલથી કામદારો અને સામાન્ય નાગરિકોને વધુ સારી આરોગ્ય સેવાઓ ઉપલબ્ધ થશે. હોસ્પિટલમાં આધુનિક સારવાર, ઇમરજન્સી અને ટ્રોમા કેર જેવી સુવિધાઓ ઉપલબ્ધ રહેશે.

કાર્યક્રમ દરમિયાન દહેજ PCPIR, જંબુસર બલ્ક ડ્રગ પાર્ક, વીજ ટ્રાન્સમિશન નેટવર્કના વિસ્તરણ અને વીજ વિતરણ વ્યવસ્થાના સુધારા જેવા અનેક ઔદ્યોગિક અને ઉપયોગીતા આધારિત પ્રોજેક્ટ્સનું પણ લોકાર્પણ અને શિલાન્યાસ કરવામાં આવ્યો હતો.

વડાપ્રધાન મોદીએ પોતાના સંબોધનમાં જણાવ્યું હતું કે ગુજરાત દેશના વિકાસનું ગ્રોથ એન્જિન છે અને કેન્દ્ર સરકાર રાજ્યના સર્વાંગી વિકાસ માટે સતત પ્રતિબદ્ધ છે. તેમણે પર્યાવરણ સંરક્ષણ, ગ્રીન એનર્જી અને આધુનિક ઇન્ફ્રાસ્ટ્રક્ચરના મહત્વ પર પણ ભાર મૂક્યો હતો.

₹18,800 કરોડથી વધુના આ વિકાસ પ્રોજેક્ટ્સ સુરત, દક્ષિણ ગુજરાત અને સમગ્ર રાજ્યના વિકાસમાં મહત્વપૂર્ણ માઈલસ્ટોન સાબિત થશે.

રાજ્યમાં કાયદો અને વ્યવસ્થાની સ્થિતિને વધુ મજબૂત કરવા અને રાષ્ટ્રીય સુરક્ષાને પ્રાધાન્ય આપવાના ભાગરૂપે ગુજરાત પોલીસે એક મોટું ઓપરેશન હાથ ધર્યું છે. રાજ્યના નાયબ મુખ્યમંત્રી હર્ષ સંઘવીના સીધા માર્ગદર્શન હેઠળ ગુજરાત પોલીસ દ્વારા સમગ્ર રાજ્યમાં ચલાવવામાં આવી રહેલા આ ‘ઓપરેશન ડેલ્ટા હન્ટ’ અંતર્ગત રાજ્યના વિવિધ વિસ્તારોમાં સઘન તપાસ હાથ ધરીને આજે સવારે ૮:૦૦ વાગ્યા સુધીમાં ગેરકાયદેસર રીતે વસવાટ કરતા કુલ ૫૬૮ બાંગ્લાદેશી નાગરિકોની ધરપકડ કરવામાં આવી છે. ધરપકડ કરાયેલા નાગરિકોમાં ૧૭૨ પુરુષો, ૨૮૨ સ્ત્રીઓ અને ૧૧૪ બાળકોનો સમાવેશ થાય છે.

નાયબ મુખ્યમંત્રી હર્ષ સંઘવીએ સ્પષ્ટ કર્યું છે કે રાજ્યની સુરક્ષા અને શાંતિ સાથે કોઈપણ પ્રકારની બાંધછોડ ચલાવી લેવામાં આવશે નહીં. ગેરકાયદેસર ઘૂસણખોરી અને વસવાટ કરનારા તત્વો સામે આ પ્રકારની કડક ઝુંબેશ આગામી સમયમાં પણ જારી રહેશે.

હાલમાં ગુજરાત પોલીસ દ્વારા તમામ જિલ્લાઓમાં જુદી જુદી ટીમો દ્વારા આ ઓપરેશન અંતર્ગત અન્ય શંકાસ્પદ વ્યક્તિઓ અને વિસ્તારોમાં સઘન સર્ચ ઓપરેશન અને તપાસની પ્રક્રિયા હજુ પણ કાર્યરત છે. પકડાયેલા તમામ વ્યક્તિઓ વિરૂદ્ધ કાયદાકીય જોગવાઈઓ હેઠળ આગળની કડક કાર્યવાહી હાથ ધરવામાં આવી રહી છે.