કોલકાતાઃ શહેરની આરજી કર મેડિકલ કોલેજમાં તોડફોડ અને હિંસા ફેલાવનારા 19 આરોપીઓને પોલીસે ઝડપી પાડ્યા છે. કોલકાતા પોલીસે એક સોશિયલ મીડિયા પર પોસ્ટ કરતા લખ્યુ હતુ કે, ‘આરજી કર મેડિકલ કોલેજમાં તોડફોડ મામલે 19 લોકોની ધરપકડ કરી છે. તેમાંથી પાંચ સોશિયલ મીડિયા પર આવેલા ફિડબેકમાંથી ઝડપાયા છે.’ પોલીસે મદદ કરવા માટે લોકોનો આભાર માન્યો છે.

આરજી કર હોસ્પિટલમાં 15 ઓગસ્ટે થયેલી તોડફોડ પછી અને હિંસા પછી સુરક્ષા વ્યવસ્થા વધારી દેવામાં આવી છે. ત્યાં રાજ્યની પોલીસ ફોરેન્સેન્સિક ટીમે હોસ્પિટલના ઈમર્જન્સી વોર્ડમાં તપાસ કરી હતી. જ્યાં ટોળાએ તોડફોડ કરી હતી.

પશ્ચિમ બંગાળના LoP સુવેન્દુ અધિકારીએ કેન્દ્રીય ગૃહ સચિવ અજય ભલ્લા અને CBIના ડાયરેક્ટરને RG કાર મેડિકલ કોલેજ અને હોસ્પિટલમાં થયેલી તોડફોડ અંગે પત્ર લખ્યો હતો અને RG કારમાં પુરાવાનો નાશ અટકાવવા CAPF તૈનાત કરવાની માંગ કરી હતી.

તૃણમૂલ કોંગ્રેસ (TMC) ના સાંસદ મહુઆ મોઇત્રાએ આ કેસમાં ઢાંકપિછોડો કરવાના આરોપોને નકારી કાઢ્યા હતા. X પર પોસ્ટ કરેલા એક વીડિયો સંદેશમાં, મહુઆ મોઇત્રાએ આ ઘટના પર દુઃખ વ્યક્ત કર્યું અને કહ્યું કે પીડિતા માટે તેનું હૃદય દ્રવી ઉઠ્યું છે. “આ હું હોઈ શકું, તમે હોઈ શકો છો. તે કોઈ પણ, સ્ત્રીઓ હોઈ શકે છે,” તેણીએ કહ્યું. “અમે ઓછામાં ઓછી અપેક્ષા રાખી શકીએ છીએ તે અમારા કાર્યસ્થળ પર સલામતીનું વાતાવરણ હોય.”

ઉત્તર પ્રદેશના મુખ્યમંત્રી યોગી આદિત્યનાથે ઘણા કદાવર મુખ્યમંત્રીઓ મુલાયમ સિંહ યાદવ, માયાવતી અને અખિલેશ યાદવને પાછળ છોડતાં રેકોર્ડ બનાવ્યો છે. તે ઉત્તર પ્રદેશમાં સૌથી લાંબા સમય સુધી સતત કાર્યકાળ સંભાળાર મુખ્યમંત્રી બની ગયાં છે. યોગી આદિત્યનાથે સતત 7 વર્ષ 148 દિવસ સુધી સીએમ બનવાનો નવો રેકોર્ડ બનાવ્યો છે. યોગી પહેલા કોંગ્રેસના મુખ્યમંત્રી ડોક્ટર સંપૂર્ણાનંદ આ પદ પર સૌથી વધુ સમય સુધી રહ્યાં છે. એટલું જ નહીં તે ઉત્તર પ્રદેશના વિધાન ભવન પર સતત આઠમી વખત ધ્વજ ફરકાવનાર પહેલા મુખ્યમંત્રી પણ બની ગયા છે.

ચૌધરી ચરણ સિંહ, મુલાયમ સિંહ યાદવ, માયાવતી અને અખિલેશ યાદવ સીએમ યોગીની આસપાસ પણ નથી. માયાવતીએ ચાર વખત યુપીના મુખ્યમંત્રી જ્યારે મુલાયમ સિંહે ત્રણ વખત શપથ લીધા પરંતુ તેમ છતાં તેઓ આ સિદ્ધિ મેળવી શક્યાં નહીં. બસપા પ્રમુખ માયાવતીએ ચાર વખત યુપીના મુખ્યમંત્રી પદના શપથ લીધા હતાં પરંતુ તેમનો સંપૂર્ણ કાર્યકાળ સાત વર્ષ 16 દિવસનો હતો. મુલાયમ સિંહ યાદવ ત્રણ વખત મુખ્યમંત્રી બન્યા. આ દરમિયાન મુલાયમ સિંહ યાદવનો કુલ કાર્યકાળ છ વર્ષ 274 દિવસનો રહ્યો હતો.

ભારતના 78માં સ્વતંત્રતા દિવસના અવસર પર મુખ્યમંત્રી યોગી આદિત્યનાથે ઉત્તર પ્રદેશની છેલ્લા સાત વર્ષમાં ઉપલબ્ધિઓ પર વિશેષ ધ્યાન આપ્યું હતું. તેમણે જણાવ્યું હતું કે રાજ્ય છઠ્ઠા અથવા સાતમા સૌથી મોટા અર્થતંત્રમાંથી ભારતની બીજી સૌથી મોટી રાજ્ય અર્થવ્યવસ્થા બની ગયું છે, જે દેશના જીડીપીમાં 9.2% ફાળો આપે છે. સીએમ યોગી આદિત્યનાથે પોતાને યુપી સરકાર માટે સંભવિત વિકાસ એન્જિન તરીકે સ્થાન આપ્યું છે.

ઉલ્લેખનીય છે કે મુખ્યમંત્રી યોગી આદિત્યનાથની ગણતરી તે નેતાઓમાં થાય છે, જેમના નેતૃત્વમાં પ્રદેશમાં કોઈ પાર્ટીની સતત બીજી વખત સરકાર બની. 25 માર્ચ 2022એ જ્યારે યોગીએ મુખ્યમંત્રી પદના શપથ લીધા તો તેમણે નારાયણ દત્ત તિવારીનો 37 વર્ષ જૂનો રેકોર્ડ તોડ્યો હતો. નારાયણ દત્તે વર્ષ 1985માં અવિભાજિત ઉત્તર પ્રદેશમાં બીજી વખત મુખ્યમંત્રી પદના શપથ લીધા હતાં. ઉત્તરાખંડ બન્યા બાદ યોગી પ્રદેશના પહેલા સીએમ છે, જે સતત બીજી વખત સત્તા પર છે.

ઇન્ડિયન સ્પેસ રિસર્ચ ઓર્ગેનાઇઝેશનએ આજે શુક્રવારે સવારે 9:17 વાગ્યે શ્રીહરિકોટાના સતીશ ધવન સ્પેસ સેન્ટરથી SSLV-D3 રોકેટ સફળતાપૂર્વક લોન્ચ કર્યું છે. આ રોકેટની અંદર એક નવું અર્થ ઓબ્ઝર્વેશન સેટેલાઇટ EOS-8 લોન્ચ કરવામાં આવ્યું છે. આ ઉપરાંત પેસેન્જર સેટેલાઇટ તરીકે એક નાનો ઉપગ્રહ SR-0 DEMOSAT પણ લોન્ચ કરવામાં આવ્યો છે. બંને ઉપગ્રહોને પૃથ્વીથી 475 કિલોમીટરની ઉંચાઈ પર ગોળાકાર ભ્રમણકક્ષામાં ગોઠવવામાં આવ્યા છે.

ISROનું SSLV-D3 રોકેટની સાથે દેશને એક નવું ઓપરેશનલ રોકેટ મળ્યું છે. આ સાથે EOS-8 અર્થ ઓબ્ઝર્વેશન સેટેલાઇટને અવકાશમાં મોકલવામાં આવ્યો છે, જે કુદરતી આફતોનું એલર્ટ આપશે. આ મિશનનું આયુષ્ય એક વર્ષનું છે. સફળ પ્રક્ષેપણ પછી, ઈસરોના વડા ડૉ. એસ. સોમનાથે કહ્યું હતું કે, અમારું લોન્ચિંગ યોગ્ય છે. સેટેલાઇટ યોગ્ય જગ્યાએ પહોંચી ગયો છે. હવે આપણે કહી શકીએ કે SSLV રોકેટની ત્રીજી નિદર્શન ઉડાન સફળ રહી છે. હવે અમે આ રોકેટની તકનીકી માહિતી ઉદ્યોગ સાથે શેર કરીશું. જેથી મહત્તમ માત્રામાં રોકેટ બનાવી શકાય અને નાના ઉપગ્રહોના લોન્ચિંગમાં વધારો થઈ શકે છે.

અર્થ ઓબ્ઝર્વેશન સેટેલાઇટ એટલે કે EOS-8 પર્યાવરણીય દેખરેખ, આપત્તિ વ્યવસ્થાપન અને તકનીકી પ્રદર્શન માટે કામ કરશે. 175.5 કિગ્રા વજન ધરાવતા આ ઉપગ્રહમાં ત્રણ અત્યાધુનિક પેલોડ છે – ઇલેક્ટ્રો ઓપ્ટિકલ ઇન્ફ્રારેડ પેલોડ (EOIR), ગ્લોબલ નેવિગેશન સેટેલાઇટ સિસ્ટમ રિફ્લેકમેટ્રી પેલોડ (GNSS-R) અને SiC UV ડોસીમીટર. આમાં, EOIR દિવસ અને રાત્રિ દરમિયાન મધ્ય અને લાંબા તરંગ ઇન્ફ્રારેડ ફોટોગ્રાફ્સ લેશે.

આ મિશનનું આયુષ્ય એક વર્ષનું છે. SSLV-D3ના આ પ્રક્ષેપણ પછી, SSLV ને સંપૂર્ણ રીતે કાર્યરત રોકેટનો દરજ્જો મળશે. આ પહેલા પણ આ રોકેટની બે ઉડાન થઈ ચૂકી છે. SSLV-D1ની પ્રથમ ઉડાન 7 ઓગસ્ટ 2022 ના રોજ થઈ હતી. આગામી ફ્લાઇટ એટલે કે SSLV-D2 10 ફેબ્રુઆરી 2023ના રોજ કરવામાં આવી હતી. તેમાં ત્રણ સેટેલાઇટ મોકલવામાં આવ્યા હતા. EOS-07, Janus-1 અને AzaadiSAT-2.

ભારતીય ચૂંટણીપંચ આજે બપોરે 3 વાગ્યે એક મહત્ત્વપૂર્ણ પ્રેસ કોન્ફરન્સ કરવા જઈ રહ્યું છે જેમાં જમ્મુ-કાશ્મીરની ચૂંટણીના કાર્યક્રમની જાહેરાત કરવામાં આવશે. આ ઉપરાંત હરિયાણા, મહારાષ્ટ્ર, ઝારખંડ વિધાનસભા ચૂંટણીની તારીખોની પણ આજે જાહેરાત કરવામાં આવશે. જમ્મુ-કાશ્મીરમાં 370 હટાવ્યા બાદ પહેલીવાર વિધાનસભાની ચૂંટણી યોજાશે. તાજેતરમાં જ મુખ્ય ચૂંટણી કમિશનર રાજીવ કુમારે જમ્મુ-કાશ્મીર અને હરિયાણાના અધિકારીઓ સાથે આ અંગે બેઠક પણ કરી હતી.

હરિયાણાની વાત કરવામાં આવે તો અહીં કુલ 90 વિધાનસભા સીટો છે. હાલ ત્રણ બેઠકો ખાલી છે. ભાજપના 41 ધારાસભ્યો છે. કોંગ્રેસના 29 ધારાસભ્યો છે, જેજેપી પાસે 10 અને INLD અને HLP પાસે એક-એક ધારાસભ્ય છે. ગૃહમાં પાંચ અપક્ષ ધારાસભ્યો છે.

2019માં આર્ટીકલ 370 નાબૂદ થયા બાદ જમ્મુ અને કાશ્મીરને કેન્દ્રશાસિત પ્રદેશ બનાવવામાં આવ્યું હતું. ત્યારથી ત્યાંના રાજકીય પક્ષો સતત રાજ્યનો દરજ્જો પરત કરવાની માંગ કરી રહ્યા હતા. સરકાર દ્વારા વારંવાર એવું કહેવામાં આવી રહ્યું હતું કે, પહેલા ચૂંટણી થશે અને પછી જ રાજ્યનો દરજ્જો પુનઃસ્થાપિત થશે.

ચૂંટણી પંચના સૂત્રો મુજબ, કેન્દ્રશાસિત પ્રદેશ જમ્મુ-કાશ્મીરમાં ત્રણથી ચાર તબક્કામાં મતદાન થઈ શકે છે. સપ્ટેમ્બરમાં મતદાન પ્રક્રિયા પૂર્ણ કર્યા બાદ આ મહિનાના અંત સુધીમાં ચૂંટણીના પરિણામો જાહેર થઈ શકે છે. કેન્દ્રશાસિત પ્રદેશ જમ્મુ અને કાશ્મીરમાં ચૂંટણી કરાવવાના માર્ગમાં સૌથી મોટો પડકાર સુરક્ષા વ્યવસ્થા છે. તાજેતરના દિવસોમાં આતંકવાદી ઘટનાઓમાં અચાનક થયેલા વધારાથી વહીવટીતંત્રની ચિંતા વધી ગઈ છે. તેની અસર ચૂંટણી કાર્યક્રમ પર પણ જોવા મળી શકે છે.

સીમાંકનનું કામ પૂર્ણ ન થવાને કારણે જમ્મુ-કાશ્મીરમાં લાંબા સમયથી વિધાનસભાની ચૂંટણી થઈ શકી નથી. મે 2022ના સીમાંકન પછી, જમ્મુ અને કાશ્મીર વિધાનસભાની સીટોની સંખ્યા હવે વધીને 90 થઈ ગઈ છે. આ રીતે જમ્મુની 43 અને કાશ્મીરની 47 વિધાનસભા બેઠકો પર ચૂંટણી યોજાવાની છે. 2014માં, 87 વિધાનસભા બેઠકો પર ચૂંટણી યોજાઈ હતી, જેમાં જમ્મુની 37 બેઠકો અને કાશ્મીર ખીણની 46 બેઠકો ઉપરાંત લદ્દાખની 6 બેઠકો હતી.

કોલકાતાની આરજી કાર મેડિકલ કોલેજમાં એક મહિલા ડૉક્ટર પર બળાત્કાર અને હત્યાના વિરોધમાં ગુરુવારે રાત્રે 11:55 વાગ્યે દેશમાં ઘણી જગ્યાએ ‘રિક્લેમ ધ નાઈટ’ એટલે કે રાત પર નિયંત્રણ મેળવવા બાબતે વિરોધ પ્રદર્શનો શરૂ થયા હતા. આ પ્રદર્શનને આઝાદીની મધ્યરાત્રિમાં મહિલાઓની સ્વતંત્રતા માટેના પ્રદર્શનનું નામ આપવામાં આવ્યું હતું. કોલકાતામાં આયોજિત વિરોધ થોડી જ વારમાં હિંસક બની ગયો.

જે સમયે ટોળાએ તોડફોડ અને હંગામો મચાવ્યો, તે સમયે ત્યાં પોલીસનો બહુ ઓછો બંદોબસ્ત હતો. બાદમાં પરિસ્થિતિને કાબૂમાં લેવા અન્ય સ્થળોએથી પોલીસ બોલાવવામાં આવી હતી. પોલીસે ભીડને વિખેરવા માટે લાઠીચાર્જ કર્યો અને ટીયર ગેસના શેલ પણ છોડ્યા. તે જ સમયે, RG કર મેડિકલ કોલેજ અને હોસ્પિટલના ડૉક્ટરે કહ્યું કે, લોકોનું એક મોટું ગ્રુપ કેમ્પસની બહાર વિરોધ કરી રહ્યું હતું. તે લોકો સૂત્રોચ્ચાર કરી રહ્યા હતા. બાદમાં ભીડ ઉશ્કેરાઈ ગઈ હતી અને તોડફોડ શરૂ કરી હતી.

આ ટોળાએ અચાનક જ મહિલા ડૉક્ટર પર બળાત્કાર અને હત્યા કરવામાં આવી હતી તે ઇમરજન્સી બિલ્ડિંગ પર હુમલો કર્યો હતો. આ બિલ્ડીંગના દરેક ખૂણામાં ઘણા સબૂત છુપાયેલા હતા. પરંતુ રોષે ભરાયેલા ટોળાએ મોડી રાત્રે ઈમારતને જ તોડી પાડી હતી. રોષે ભરાયેલા ટોળાને વિખેરવા પોલીસે લાઠીચાર્જ કર્યો અને ટીયર ગેસના શેલ છોડ્યા. આ દરમિયાન કેટલાક પોલીસકર્મીઓ પણ ઘાયલ થયા છે.

આ મામલે કોલકાતા પોલીસનું કહેવું છે કે, 40 લોકોના ટોળાએ આરજી કર મેડિકલ કોલેજમાં તોડફોડ કરી હતી. તેમજ આ જ લોકોએ હોસ્પિટલમાં હિંસા કરી હતી. આ દરમિયાન પોલીસના વાહનો અને કેટલાક ટુ-વ્હીલર્સને પણ નુકસાન થયું હતું. ભીડને કાબૂમાં લેવા માટે લાઠીચાર્જ અને ટીયર ગેસના શેલનો ઉપયોગ કરવો પડ્યો હતો.

વિનીત ગોયલે કહ્યું કે, ‘અહીં જે ઘટના બની તે એક ખોટા મીડિયા કેમ્પેઈનને કારણે થયું છે, કોલકાતા પોલીસ વિરુદ્ધ ચાલી રહેલા દૂષિત મીડિયા અભિયાનને કારણે થયું છે. કોલકાતા પોલીસે શું નથી કર્યું! તેણે આ બાબતે બધું જ કર્યું છે. અમે પરિવારને સંતુષ્ટ કરવાનો પ્રયાસ કર્યો છે તેમાં છતાં અફવાઓ ફેલાવવામાં આવી રહી છે. હું લોકોના આ વિશ્વાસથી ખૂબ નારાજ છું. અમે ક્યારેય નથી કહ્યું કે એક જ વ્યક્તિ (આરોપી) છે. અમે કહ્યું છે કે અમે વૈજ્ઞાનિક પુરાવાની રાહ જોઈ રહ્યા છીએ અને તેમાં સમય લાગે છે. માત્ર અફવાઓના આધારે, હું એક પીજીના વિદ્યાર્થીની ધરપકડ કરી શકતો નથી, તે મારા અંતરાત્મા વિરુદ્ધ છે, મીડિયાનું ઘણું દબાણ છે, સ્પષ્ટપણે અમે જે કર્યું તે સાચું છે. હવે સીબીઆઈ તેની તપાસ કરી રહી છે. હાડકાં તૂટી ગયા હતા, આ કરવામાં આવ્યું, તે કરવામાં આવ્યું એવા ખોટા પ્રચાર કરવામાં આવ્યા છે જેના કોઈ વૈજ્ઞાનિક પુરાવા નથી.

ડોક્ટરોના આંદોલન બાદ સોમવારે મેડિકલ કોલેજના પ્રિન્સિપાલે રાજીનામું આપી દીધું અને થોડા જ કલાકોમાં મમતા સરકારે પ્રિન્સિપાલ સંદીપ ઘોષની નેશનલ મેડિકલ કોલેજમાં બદલી કરી દીધી. આ પછી પૂછવામાં આવ્યું કે શું પ્રિન્સિપાલ પ્રત્યે દયા બતાવવાની ઉતાવળ પાછળ કોઈ કારણ હતું. કોલકાતા પોલીસ પર કોઈ ભરોસો નથી, તેથી જ ગઈકાલે હાઈકોર્ટે આ કેસ સીબીઆઈને સોંપ્યો અને કહ્યું, ‘પોલીસ તપાસમાં પુરાવાનો નાશ થાય તેવી પૂરી સંભાવના છે.

દેશ આજે ગુરુવારે 78મો સ્વતંત્રતા દિવસ ઉજવી રહ્યો છે. આ અવસર પર વડાપ્રધાન નરેન્દ્ર મોદીએ લાલ કિલ્લા પરથી તિરંગો ફરકાવ્યો હતો. આ પછી રાષ્ટ્રને સંબોધિત કરતી વખતે તેમણે સ્વતંત્રતા સેનાનીઓને યાદ કર્યા હતા. પીએમ મોદીએ કહ્યું હતું કે, જ્યારે આપણે 40 કરોડ હતા ત્યારે આપણે મહાસત્તાને હરાવી હતી. આજે આપણે 140 કરોડ છીએ.

સંબોધન પહેલા પીએમ મોદીને સ્વદેશી 105 MM લાઈટ ફીલ્ડ ગનથી 21 તોપોની સલામી આપવામાં આવી હતી. સમારોહમાં લગભગ 6000 વિશેષ મહેમાનોને આમંત્રિત કરવામાં આવ્યા હતા. ખાસ કરીને અટલ ઇનોવેશન મિશન જેવી પહેલ સાથે સંકળાયેલા લોકો, મેરા યુવા ભારતના સ્વયંસેવકો, આદિવાસી સમુદાયના લોકો અને ખેડૂત સંગઠનોના પ્રતિનિધિઓ પણ આ કાર્યક્રમમાં હાજર રહ્યા હતા.

પીએમ મોદીએ કહ્યું, ‘આજે આપણે એવા અસંખ્ય સ્વાતંત્ર્ય સેનાનીઓને યાદ કરીએ છીએ જેમણે આપણને આઝાદ દેશ આપ્યો, આપણે આજે તેમને શ્રદ્ધાંજલિ આપીએ છીએ. તાજેતરની કુદરતી આફતને કારણે અમે ચિંતિત છીએ, ઘણા લોકોએ તેમના પ્રિયજનો, તેમની સંપત્તિ ગુમાવી છે, અમે તેમની સાથે એકતામાં ઊભા છીએ.

પોતાના સંબોધન દરમિયાન પીએમ મોદીએ કહ્યું કે, ‘આજનો દિવસ શુભ મુહૂર્ત છે. આપણે દેશની આઝાદી માટે શહીદ થયેલા અને પોતાનું જીવન સમર્પિત કરનાર સ્વતંત્રતા પ્રેમીઓને શ્રદ્ધાંજલિ આપી રહ્યા છીએ. આ દેશ તેમનો ઋણી છે. અમે આવા દરેક દેશવાસીઓ પ્રત્યે અમારું સન્માન વ્યક્ત કરીએ છીએ. રાષ્ટ્રને પ્રેરણા આપતા પીએમ મોદીએ કહ્યું કે, “જ્યારે આપણે 40 કરોડ હતા ત્યારે આપણે મહાસત્તાને હરાવી હતી, આજે આપણે 140 કરોડ છીએ.