હજારો ફૂટની ઊંચાઈ પર મોત જ્યારે સામે ઊભું હતું, ત્યારે એક ભારતીય પાયલોટે અદભુત સાહસ બતાવીને ૧૭૪ મુસાફરોનો જીવ બચાવ્યો હતો. દુબઈ-તેલ અવીવ ફ્લાઇટમાં સર્જાયેલી આ ભયાનક ઘટનામાં પોતાના જીવની પરવા કર્યા વિના હીરો સાબિત થયેલા કેપ્ટન સ્મિત મચ્છરની હિંમતને આજે આખી દુનિયા સલામ કરી રહી છે. તેમની આ ‘અસાધારણ હિંમત, નેતૃત્વ અને માનવતા’ને બિરદાવતા દેશની જાણીતી ફાર્માસ્યુટિકલ કંપની મેનકાઇન્ડ ફાર્માએ તેમને રૂપિયા ૧ કરોડના પુરસ્કારથી સન્માનિત કર્યા છે, જે હાલ ભારે ચર્ચાનો વિષય બન્યો છે.
મેનકાઇન્ડ ફાર્માના વાઇસ ચેરમેન અને મેનેજિંગ ડિરેક્ટર રાજીવ જુનેજાએ શુક્રવારે કેપ્ટન સ્મિતને એક ભાવનાત્મક પત્ર લખ્યો હતો. નોંધનીય છે કે, ફ્લાયદુબઈની ફ્લાઇટમાં કો-પાયલોટ દ્વારા વિમાનને ક્રેશ કરવાના ઇરાદે સ્મિત પર જીવલેણ હુમલો કરી છરાબાજી કરવામાં આવી હતી. આમ છતાં સ્મિતે કોકપિટનો દરવાજો ખોલીને મુસાફરોને બચાવ્યા હતા. રાજીવ જુનેજાએ પત્રમાં નોંધ્યું છે કે, “સમગ્ર વિશ્વ સમક્ષ એક ભારતીયને આટલી હિંમત અને જવાબદારી દાખવતો જોઈને મને ખૂબ ગર્વ થાય છે. તમે બચાવેલા જીવ અને લાખો લોકોને આપેલી પ્રેરણાની કિંમત કોઈ રકમ ન ચૂકવી શકે. આ ૧ કરોડ રૂપિયા તો માત્ર અમારા આદર અને કૃતજ્ઞતાની એક નાની અભિવ્યક્તિ છે. તમે આખા દેશનું નામ રોશન કર્યું છે.”
આ ઘટના બાદ દેશભરમાં કેપ્ટન સ્મિતની વીરતાના ગુણગાન ગવાઈ રહ્યા છે. તેમના ઝડપી સ્વાસ્થ્ય સુધારા માટે સોમનાથ અને કાશી વિશ્વનાથ જેવા મોટા મંદિરોમાં વિશેષ પૂજાઓ થઈ રહી છે. તાજેતરમાં જ વડાપ્રધાન નરેન્દ્ર મોદીએ વીડિયો કોલ દ્વારા સ્મિત સાથે વાતચીત કરી હતી. આ દરમિયાન ભાવુક થયેલા સ્મિતે કહ્યું, “હું મારો જીવ બચાવવા તો લડી જ રહ્યો હતો, પરંતુ મને ખબર હતી કે હું અન્ય લોકોને મરવા દઈ શકું નહીં. ઘટના સમયે હું સતત હનુમાન ચાલીસાના પાઠ કરી રહ્યો હતો અને મને ખાતરી છે કે ભગવાને જ મને બચાવ્યો છે.”
કેપ્ટન સ્મિતના સાહસની નોંધ માત્ર ભારતમાં જ નહીં, પણ આંતરરાષ્ટ્રીય સ્તરે પણ લેવાઈ છે. ઇઝરાયેલના પીએમ બેન્જામિન નેતન્યાહૂએ તેમને ‘સાચા હીરો’ ગણાવતા કહ્યું કે, ગંભીર રીતે ઘાયલ હોવા છતાં તેમણે હુમલાખોરનો સામનો કર્યો અને ૧૭૪ લોકોના જીવ બચાવીને મોટી મિડ-એર દુર્ઘટના ટાળી છે. અમેરિકાના રાષ્ટ્રપતિ ડોનાલ્ડ ટ્રમ્પે પણ તેમને હીરો ગણાવી તેમના સાહસની ભારે સરાહના કરી છે.
