વડોદરાની સયાજી જનરલ હોસ્પિટલ (SSG) ફરી એકવાર ચર્ચામાં આવી છે. હોસ્પિટલની OPD નજીક ત્રણ લોકો નમાઝ અદા કરતા હોવાનો વીડિયો સોશિયલ મીડિયામાં વાયરલ થયા બાદ મામલો ચર્ચાનો વિષય બન્યો છે. આ ઘટનાને લઈને હોસ્પિટલ પ્રશાસને તપાસ શરૂ કરી છે અને સમગ્ર મામલાની હકીકત જાણવા માટે સુપ્રિટેન્ડન્ટ દ્વારા તપાસના આદેશ આપવામાં આવ્યા છે.

OPD વિસ્તારમાં ત્રણ લોકો નમાઝ પઢતા જોવા મળ્યા
સોશિયલ મીડિયા પર વાયરલ થયેલા વીડિયોમાં વડોદરાની SSG હોસ્પિટલના OPD વિસ્તાર પાસે ત્રણ લોકો નમાઝ અદા કરતા જોવા મળી રહ્યા છે. વીડિયો ક્યારેનો છે અને તેમાં દેખાતા લોકો કોણ છે તે અંગે હાલ તપાસ ચાલી રહી છે. પ્રાથમિક માહિતી મુજબ, વીડિયોમાં દેખાતા લોકો દર્દીના સગા-સંબંધીઓ હોવાની શક્યતા વ્યક્ત કરવામાં આવી રહી છે. એવું પણ માનવામાં આવી રહ્યું છે કે આ ઘટના હોસ્પિટલના રજાના સમય દરમિયાન બની હોઈ શકે છે. જોકે, ઘટનાના સમયે સ્થળ પર કોઈ સુરક્ષા કર્મચારી દેખાતા ન હોવાનો મુદ્દો પણ સામે આવ્યો છે.

હોસ્પિટલ પ્રશાસને તપાસ શરૂ કરી
આ સમગ્ર મામલે SSG હોસ્પિટલના સુપ્રિટેન્ડન્ટ ડો. રંજન ઐયરે જણાવ્યું છે કે વાયરલ વીડિયો હોસ્પિટલના ધ્યાનમાં આવ્યો છે અને તેની તપાસ કરવામાં આવી રહી છે. તપાસ બાદ જ સમગ્ર ઘટનાની સાચી માહિતી સામે આવશે. હોસ્પિટલ પ્રશાસન દ્વારા એ પણ તપાસવામાં આવી રહ્યું છે કે નમાઝ અદા કરનાર લોકો કોણ હતા, તેઓ હોસ્પિટલમાં કયા કારણસર આવ્યા હતા અને ઘટના કયા સંજોગોમાં બની હતી.

વડોદરામાં આ પ્રકારની ઘટના પહેલીવાર સામે આવી નથી. થોડા વર્ષો અગાઉ મહારાજા સયાજીરાવ યુનિવર્સિટી (MSU)ના કેમ્પસમાં પણ નમાઝ પઢવાના વીડિયો સોશિયલ મીડિયામાં વાયરલ થયા હતા. એક વીડિયોમાં યુનિવર્સિટીના સંસ્કૃત મહાવિદ્યાલયના ગેટ નજીક એક યુવક અને યુવતી નમાઝ અદા કરતા જોવા મળ્યા હતા. આ મામલે તે સમયે ભારે ચર્ચા અને વિવાદ થયો હતો. આ ઉપરાંત સાયન્સ ફેકલ્ટીના બોટની વિભાગની એક વિદ્યાર્થિનીનો પણ કેમ્પસમાં નમાઝ અદા કરતો વીડિયો વાયરલ થયો હતો. તે સમયે પણ યુનિવર્સિટી પ્રશાસન અને વિદ્યાર્થીઓમાં આ મુદ્દો ચર્ચાનું કારણ બન્યો હતો.

મહારાષ્ટ્રના રાજકારણમાં ફરી ગરમાવો આવી ગયો છે. ઉદ્ધવ ઠાકરે (UBT)ની શિવસેનામાં મોટું ભંગાણ થવા જઇ રહ્યું હોવાનું સૂત્રો જણાવી રહ્યા છે. ઉદ્ધવના 9 માંથી 6 સાંસદ બળવાખોર બનવાના મૂડમાં છે. UBT સાંસદ સંજય રાઉતે મોટો દાવો કર્યો છે. રાઉતે દેવેન્દ્ર ફડણવીસને ટેગ કરીને દાવો કર્યો છે કે ઉદ્ધવ જૂથના સાંસદોને 15-15 કરોડની ઓફર આપવામાં આવી રહી છે. UBTના ઘણાં સાંસદોના ફોન સ્વીચ ઓફ આવી રહ્યા છે. સૂત્રોના જણાવ્યા અનુસાર 6 થી 7 સાંસદો એકનાથ શિદે જૂથમાં સામેલ થઈ શકે છે.

અગાઉ શિવસેના (શિંદે) નેતા પ્રતાપ સરનાઇકે સંકેત આપ્યો હતો કે અમારી પાર્ટીમાં બળવાખોર સાંસદો(UBT)નું સ્વાગત કરવામાં આવશે. સરનાઇકના સંકેતોથી ઉદ્ધવ જૂથમાં વિદ્રોહની સંભાવનાને બળ મળ્યું હતું. સંજય રાઉત દિલ્હી પહોંચ્યા ત્યારે જ ઉદ્ધવ જૂથના સાંસદોના પક્ષ પલટાની ચર્ચાઓ શરુ થઇ ગઇ હતી. એવું માનવામાં આવતું હતું કે રાઉત શિવસેનાના બાગી ૯ સાંસદો દ્વારા અલગ સમૂહ બનાવવાની સંભાવનાને રોકવા માટે લોકસભા અધ્યક્ષ બિરલા સાથે મુલાકાત કરી શકે છે.

સોશિયલ મીડિયા પ્લેટફોર્મ ‘એક્સ’ પર મોડી રાત્રે કરેલી એક પોસ્ટમાં સંજય રાઉતે કહ્યું, ‘અપના સપના મની… મની! એવા સમાચાર છે કે મહારાષ્ટ્રના સાંસદોને ખરીદવા માટે આજે રાત્રે ૧૫ કરોડ રૂપિયાની એડવાન્સ રકમ આપવામાં આવશે. આ ચોકાવનારું અને શરમજનક છે!’ આ પહેલા સંજય રાઉત અને તેમની પાર્ટી શિવસેના (UBT) ના સાથી અને લોકસભા સાંસદ અનિલ દેસાઈએ કેટલાક સાંસદો અલગ જૂથ બનાવી શકે છે એ વાતને નકારી કાઢી હતી.

સાંસદો વચ્ચે બળવાની ચર્ચાઓ વચ્ચે શિવસેના નેતા અને રાજ્યના પરિવહન મંત્રી સરનાઇકે સંકેતમાં બળવાખોર સાંસદોને એક પ્રકારે આમંત્રણ આપ્યું. તેમણે કહ્યું, ‘જો સાંસદ અને ધારાસભ્ય જેવા જનપ્રતિનિધિઓને તેમના નેતૃત્વ પર ભરોસો નથી. જો તેઓ શિવસેનાના સ્થાપક બાળ ઠાકરેના આદર્શોમાં વિશ્વાસ રાખે છે અને એકનાથ શિદેના નેતૃત્વ પર ભરોસો કરવા તૈયાર છે, તો શિવસેનાના દરવાજા તેમના માટે ખુલ્લા છે. તેમણે વધુમાં કહ્યું, જો તેઓ ભવિષ્યમાં ક્યારેય એવું વિચારશે, તો અમે તેમને પ્રાધાન્ય આપીશું. તેમની આ ટિપ્પણી શિવસેના (UBT) ના સાંસદ સંજય દેશમુખે દિલ્હીમાં કેન્દ્રીય મંત્રી અને શિવસેના નેતા પ્રતાપરાવ જાધવ સાથે મુલાકાત કર્યાના એક દિવસ પછી આવી છે.

રવિવારે ઉદ્ધવ ઠાકરેના નિવાસ્થાને શિવસેના (UBT)ના ૯માંથી માત્ર ચાર સાંસદો જ બેઠકમાં વ્યક્તિગત રીતે હાજર રહ્યા બાદ પક્ષ પલટાની શક્યતાઓને વધુ બળ મળ્યું. સંજય રાઉતે દાવો કર્યો હતો કે બાકીના પાંચ સાંસદો ડિજિટલ માધ્યમથી અને ફોન દ્વારા બેઠકમાં જોડાયા હતા. મંગળવારે સંજય રાઉતે કહ્યું કે ખોટું ચિત્ર રજૂ કરવામાં આવી રહ્યું છે અને ભારપૂર્વક જણાવ્યું કે તમામ સાંસદો મજબૂતાઈથી પાર્ટી અને ઉદ્ધવ ઠાકરેની સાથે છે

કચ્છ જિલ્લામાં બુધવારે બપોરે ભૂકંપનો હળવો આંચકો અનુભવાયો હતો. ભૂકંપશાસ્ત્રીય સંશોધન સંસ્થા, ગાંધીનગર દ્વારા જાહેર કરાયેલા આંકડા મુજબ 17 જૂન, 2026ના રોજ બપોરે 12:39:35 કલાકે ભચાઉથી આશરે 11 કિલોમીટર ઉત્તર-પશ્ચિમ વિસ્તારમાં ભૂકંપ નોંધાયો હતો.

રિક્ટર સ્કેલ પર આ ભૂકંપની તીવ્રતા 3.2 મેગ્નિટ્યુડ નોંધાઈ હતી. ભૂકંપનું કેન્દ્ર અક્ષાંશ 23.396 અને રેખાંશ 70.337 પર સ્થિત હોવાનું જણાવાયું છે. તીવ્રતા ઓછી હોવાથી ભૂકંપની અસર મર્યાદિત રહી હતી અને કોઈ મોટા નુકસાનના અહેવાલ પ્રાપ્ત થયા નથી. કેટલાક વિસ્તારોમાં લોકોએ થોડા સમય માટે ધરતી ધ્રુજવાનો અનુભવ કર્યો હતો.

ઉલ્લેખનીય છે કે કચ્છ જિલ્લો ભૂકંપની દૃષ્ટિએ અતિસંવેદનશીલ ઝોન-5માં સમાવિષ્ટ છે. વર્ષ 2001ના વિનાશકારી ભૂકંપ બાદ આ વિસ્તારમાં સમયાંતરે નાના અને મધ્યમ તીવ્રતાના આંચકા નોંધાતા રહ્યા છે. હાલ સુધી તંત્રને કોઈ જાનહાનિ કે મિલકતને નુકસાન અંગેની માહિતી મળી નથી.

ભૂકંપ નિષ્ણાતોના જણાવ્યા અનુસાર 3.0થી 4.0 મેગ્નિટ્યુડ વચ્ચેના ભૂકંપ સામાન્ય રીતે ગંભીર નુકસાન પહોંચાડતા નથી. તેમ છતાં, ભૂકંપપ્રવણ વિસ્તારોમાં રહેતા લોકોએ સાવચેતી રાખવી અને જરૂરી સુરક્ષા માર્ગદર્શિકાઓનું પાલન કરવું જરૂરી છે.

અભિજીત દિપકેને તમાચો મારનાર યુવકોને પોલીસે કસ્ટડીમાં લીધા છે. પોલીસ કસ્ટડી દરમિયાન અર્જુન પંડિતે મીડિયા સાથે વાતચીત કરી હતી. આ દરમિયાન તેણે જણાવ્યું કે તેના 3-4 સાથીદારો પણ પોલીસ કસ્ટડીમાં છે. તેમાં અર્જુન પંડિત, રાકેશ ગુર્જર અને રોહિત સહિતના લોકોનો સમાવેશ થાય છે. વાતચીત દરમિયાન અર્જુન પંડિતે અભિજીત દિપકે પર ગંભીર આક્ષેપો કર્યા અને જણાવ્યું કે પ્રદર્શન દરમિયાન તેમના લોકો દેશને વહેંચવાની વાતો કરી રહ્યા હતા. યુવકે કહ્યું કે, “કોકરોચ જનતા પાર્ટીના લોકો દેશના લોકોને જાતિના આધારે વહેંચવા માંગે છે.”

અર્જુન પંડિતે કહ્યું કે કોઈને મારવાની તેમની અગાઉથી કોઈ યોજના નહોતી. તેઓ માત્ર કોકરોચ જનતા પાર્ટીનું પ્રદર્શન જોવા ગયા હતા. તે દરમિયાન તેમણે જોયું કે પાર્ટીના લોકો દેશને વહેંચવાની ચર્ચા કરી રહ્યા હતા. અર્જુનનો આરોપ છે કે આ લોકો સમાજને જાતિ અને ધર્મના આધારે વહેંચવાની યોજના બનાવી રહ્યા હતા. આ બધી વાતો સાંભળ્યા અને જોયા પછી તેઓ પોતાનો ગુસ્સો કાબૂમાં રાખી શક્યા નહોતા.

અર્જુન પંડિત બોલ્યો – ‘દેશને વહેંચવા નહીં દઈએ’

અર્જુન પંડિતે જણાવ્યું કે જ્યારે કેટલાક લોકો અભિજીત દિપકેને ખભા પર બેસાડીને લઈ જઈ રહ્યા હતા, ત્યારે તેણે તેમને તમાચો મારી દીધો. અર્જુને કહ્યું કે, “અમે તેનો ઈલાજ કરી દીધો.” તેણે પોતાને રાષ્ટ્રવાદી વિચારધારાનો યુવક ગણાવતા કહ્યું કે તેઓ દેશને વહેંચવા નહીં દે. આ દરમિયાન અર્જુને અભિજીત દિપકે માટે અપશબ્દોનો પણ ઉપયોગ કર્યો હોવાનું કહેવાય છે.

રાકેશ ગુર્જરે કહ્યું – ‘હું રાષ્ટ્રવાદી છું’
આ પહેલા રાકેશ ગુર્જરનું નિવેદન પણ સામે આવ્યું હતું. વાયરલ વીડિયોમાં અભિજીત દિપકેને તમાચો મારતો મુખ્ય વ્યક્તિ તરીકે રાકેશ ગુર્જર દેખાય છે.

રાકેશે જણાવ્યું કે તે જયપુરનો રહેવાસી છે અને તેનો કોઈ રાજકીય પક્ષ સાથે સંબંધ નથી. તેણે કહ્યું કે તે રાષ્ટ્રવાદી છે અને રાજસ્થાનમાં આવી પ્રકારની વિભાજનકારી રાજનીતિ થવા દેશે નહીં. રાકેશ ગુર્જરે આરોપ લગાવ્યો કે NEET પેપર લીકના નામે કેટલાક લોકો દેશને વહેંચવાનું ષડયંત્ર રચી રહ્યા છે અને હિંદુ સમાજને ભ્રમિત કરી રહ્યા છે. તેણે અભિજીત દિપકેને ચેતવણી આપતા કહ્યું કે જો જયપુરમાં ફરી આવી પ્રવૃત્તિ થશે તો ફરી “ઈલાજ” કરવામાં આવશે.

ધર્મેન્દ્ર પ્રધાનના રાજીનામાની માંગ પર અડગ CJP
બીજી તરફ તમાચાકાંડ બાદ કોકરોચ જનતા પાર્ટીના સ્થાપક અભિજીત દિપકેના પણ અનેક નિવેદનો સામે આવ્યા છે. અભિજીતે કહ્યું કે આવી ઘટનાથી તેઓ પોતાના આંદોલનથી ભટકવાના નથી. તેમણે જણાવ્યું કે કેટલાક લોકો આંદોલનને નબળું પાડવા માંગે છે, પરંતુ તેઓ શિક્ષણ મંત્રી ધર્મેન્દ્ર પ્રધાનના રાજીનામાની માંગ પર અડગ રહેશે. અભિજીતે આરોપ લગાવ્યો કે કેટલાક લોકો હિંદુ-મુસ્લિમના નામે સમાજને વહેંચીને રાજનીતિ કરી રહ્યા છે, પરંતુ તેઓ આવા પ્રયાસોને સફળ થવા દેશે નહીં. તેમણે 20 જૂને દિલ્હીમાં મોટા આંદોલનની જાહેરાત કરતાં “દિલ્હી ચલો”નો નારો પણ આપ્યો.

દિપકે બોલ્યા – આ બેરોજગારીનું ઉદાહરણ છે
એક અન્ય વીડિયોમાં અભિજીત દિપકેએ આ સમગ્ર તમાચાકાંડને દેશમાં વધતી બેરોજગારીનું પરિણામ ગણાવ્યું હતું. છેલ્લા 40 વર્ષમાં ઊભી થયેલી બેરોજગારીની પરિસ્થિતિનું આ એક જીવંત ઉદાહરણ છે. લોકો પાસે રોજગાર નથી, તેથી આવી ઘટનાઓ બની રહી છે. અભિજીતે કહ્યું કે જેણે તેમને તમાચો માર્યો, જો તેની પાસે નોકરી હોત તો કદાચ તે આવી હરકત ન કરત. તેમણે આ ઘટનાને દેશમાં બેરોજગારીની ગંભીર સ્થિતિનું મોટું ઉદાહરણ ગણાવ્યું.

ફ્રાન્સમાં યોજાનારી G7 સમિટ દરમિયાન વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે મુલાકાત થવાની છે. જોકે, આ બેઠક પહેલાં અમેરિકાએ ભારતને મોટો ઝટકો આપ્યો છે. અમેરિકાના રક્ષા મંત્રાલય (પેન્ટાગોન)એ ઇન્ડો-પેસિફિક કમાન્ડનું નામ બદલીને ફરીથી યુએસ પેસિફિક કમાન્ડ કરી દીધું છે.

હવાઈ દ્વીપસમૂહમાં સ્થિત આ કમાન્ડની જવાબદારી હિંદ મહાસાગરથી લઈને પ્રશાંત મહાસાગર સુધીના વિશાળ વિસ્તારની સુરક્ષા અને સૈન્ય કામગીરીની છે. આ કમાન્ડ હેઠળ અમેરિકાનું સેવન્થ ફ્લીટ (સાતમું નૌકાદળ) પણ આવે છે, જેણે 1971ના ભારત-પાકિસ્તાન યુદ્ધ દરમિયાન પાકિસ્તાનને મદદ કરવાનો પ્રયાસ કર્યો હતો.

લગભગ આઠ વર્ષ પહેલાં ટ્રમ્પના પહેલા કાર્યકાળ દરમિયાન અમેરિકા દ્વારા આ કમાન્ડનું નામ યુએસ પેસિફિક કમાન્ડમાંથી બદલીને ઇન્ડો-પેસિફિક કમાન્ડ રાખવામાં આવ્યું હતું. તે સમયે ભારત અને અમેરિકા વચ્ચેના વ્યૂહાત્મક અને રક્ષણાત્મક સંબંધો સતત મજબૂત બની રહ્યા હતા. હવે બુધવારે અમેરિકાએ ફરી એકવાર આ કમાન્ડનું નામ બદલીને પેસિફિક કમાન્ડ કરી દીધું છે. આ નિર્ણય એવા સમયે લેવામાં આવ્યો છે જ્યારે ઓપરેશન સિંદૂર બાદ ભારત અને અમેરિકા વચ્ચેના સંબંધોમાં તણાવ અને મતભેદોની ચર્ચા ચાલી રહી છે. જેના કારણે આ નામ પરિવર્તનને બંને દેશોના બદલાતા સંબંધોના સંદર્ભમાં પણ જોવામાં આવી રહ્યું છે.

જોકે, પેન્ટાગોને સ્પષ્ટતા કરી છે કે કમાન્ડનું નામ બદલવાનો નિર્ણય મુખ્યત્વે વહીવટી અને ઐતિહાસિક કારણોસર લેવામાં આવ્યો છે. પેન્ટાગનના જણાવ્યા મુજબ, આ ફેરફારનો હેતુ દ્વિતીય વિશ્વયુદ્ધ બાદથી ચાલતી સાત દાયકાથી વધુ જૂની સૈન્ય પરંપરા, સૈનિકોના ગૌરવ અને ઐતિહાસિક વારસાને સન્માન આપવાનો છે.

પેન્ટાગોનનું કહેવું છે કે નામમાં કરાયેલો આ બદલાવ કોઈ નવી વ્યૂહાત્મક નીતિ અથવા ભૂરાજકીય સંકેત નથી, પરંતુ અમેરિકાની લાંબી સૈન્ય પરંપરા અને ઐતિહાસિક ઓળખને ફરીથી પ્રતિબિંબિત કરવાનો પ્રયાસ છે.

કેમ ઉઠી રહ્યા છે સવાલ?
અમેરિકાએ ભારત, ઓસ્ટ્રેલિયા અને જાપાન સાથે મળીને ક્વાડની (QUAD)ની રચના કરી છે, જેનો આધાર જ ઇન્ડો-પેસિફિક ક્ષેત્ર છે. આવા સમયે અમેરિકાના રક્ષા મંત્રાલય દ્વારા કમાન્ડના નામમાંથી ‘ઇન્ડો’ શબ્દ હટાવવાનો નિર્ણય અનેક પ્રશ્નો ઉભા કરી રહ્યો છે.

આ નિર્ણયથી એવો સંદેશો જતો હોવાનું માનવામાં આવે છે કે અમેરિકાનું મુખ્ય ધ્યાન હવે પ્રશાંત મહાસાગર પર વધુ કેન્દ્રિત થઈ શકે છે, જ્યારે હિંદ મહાસાગરનું મહત્વ તુલનાત્મક રીતે ઘટતું દેખાઈ શકે છે. એટલે કે, અમેરિકા હવે મુખ્યત્વે પ્રશાંત ક્ષેત્રની સુરક્ષા અને વ્યૂહાત્મક પડકારો પર વધુ ફોકસ કરશે તેવી અટકળો વ્યક્ત થઈ રહી છે.

ટ્રમ્પના પહેલા કાર્યકાળમાં જ બદલાયું હતું નામ
2018 માં ડોનાલ્ડ ટ્રમ્પના પહેલા કાર્યકાળ દરમિયાન, યુએસ લશ્કરી કમાન્ડનું નામ બદલીને યુએસ પેસિફિક કમાન્ડ (USPACOM) થી યુએસ ઈન્ડો-પેસિફિક કમાન્ડ (INDOPACOM) કરવામાં આવ્યું હતું. તે સમયે તત્કાલીન અમેરિકી સંરક્ષણ સચિવ જેમ્સ મેટિસે જણાવ્યું હતું કે આ ફેરફાર ભારતની વધતી વ્યૂહાત્મક ભૂમિકા અને હિંદ મહાસાગર તથા પ્રશાંત મહાસાગરની એકબીજા સાથે જોડાયેલી સુરક્ષા હકીકતોને પ્રતિબિંબિત કરવા માટે કરવામાં આવ્યો છે.

પરંતુ હવે પેન્ટાગોને ફરી એકવાર તેનું નામ પેસિફિક કમાન્ડ રાખવાની જાહેરાત કરી છે. પેન્ટાગોનના જણાવ્યા અનુસાર, આ નિર્ણય વારસાગત ઓળખ અને ઐતિહાસિક મૂળને પુનઃસ્થાપિત કરવા માટે લેવામાં આવ્યો છે. સાથે જ અમેરિકાએ સ્પષ્ટ કર્યું છે કે આ નામ પરિવર્તનથી કમાન્ડના કાર્યક્ષેત્ર, મિશન કે જવાબદારીઓમાં કોઈ ફેરફાર થવાનો નથી. એટલે કે, હિંદ-પ્રશાંત ક્ષેત્રમાં અમેરિકાની સૈન્ય હાજરી અને કામગીરી યથાવત રહેશે, માત્ર કમાન્ડનું નામ બદલવામાં આવ્યું છે.

ફક્ત નામ બદલાયું છે, પરંતુ તે ત્યારે જ આવ્યું છે જ્યારે મોદી અને ટ્રમ્પ ફ્રાન્સમાં મળવાના છે. એવું લાગે છે કે ટ્રમ્પ, જે ટેરિફ વિવાદમાં સામેલ છે અને પાકિસ્તાનની પ્રશંસા કરી રહ્યા છે, તે હવે ભારતને સંદેશ આપવાનો પ્રયાસ કરી રહ્યા છે કે જો ભારત તેમાં સામેલ ન હોય તો કોઈ વાંધો નથી.