રાજ્યભરમાં ધૂળેટીના પર્વની ઉજવણી કરવામાં આવી છે. ત્યારે રાજ્યના અનેક વિસ્તારોમાં અકસ્માતના બનાવ સામે આવી રહ્યા છે. જેમાં વડોદરાના પોર નજીક ગમખ્વાર અકસ્માતની ઘટના સર્જાઈ છે. જેમાં પાવાગઢથી દર્શન કરીને પરત ફરી રહેલા સુરતીઓને અકસ્માત નડ્યો હતો. જેમાં અચાનક અર્ટિગા કાર હાઈવે પરથી નીચે ઉતરી જતાં ઝાડ સાથે અથડાઈ હતી. આ અકસ્માતની ઘટનામાં ત્રણ લોકોના ઘટનાસ્થળે મોત નીપજ્યા હોવાનું સામે આવ્યું છે.

સુરતના ડિંડોલીમાં રહેતા અને મૂળ મહેસાણાનો પરિવાર પાવાગઢ દર્શન કરીને પરત ફરી રહ્યો હતા, ત્યારે વડોદરાના પોર નજીક તેમની કાર અચાનક હાઈવે પરથી નીચે ઉતરી જતાં ઝાડ સાથે અથડાતાં અકસ્માત સર્જાયો હતો. જેમાં કારમાં સવાર આઠ લોકોમાંથી ત્રણના ઘટનાસ્થળે મોત નીપજ્યા હતા.

મૃતકોની યાદી

• હિતેશ પટેલ (ઉં.વ. 49)
• વિનય પટેલ (ઉં.વ. 24)
• દિપીકાબહેન પટેલ (ઉં.વ. 28)

ઈજાગ્રસ્તની યાદી

• જગદીશભાઈ પટેલ (ઉં.વ. 47)
• નીરજબહેન જગદીશભાઈ પટેલ
• વિનય જગદીશભાઈ પટેલ (ઉં.વ. 32)
• ચિરાગ પટેલ (ઉં.વ. 24)
• ધ્રુવ પટેલ (ઉં.વ. 26)

સુરત શહેરમાં શરમજનક ઘટના સામે આવી છે. કતારગામ વિસ્તારમાં એક 6 વર્ષની નિર્દોષ બાળકી સાથે દુષ્કર્મની ઘટના બની છે. મળતી માહિતી મુજબ, રાત્રિ દરમિયાન અજાણ્યા આરોપીએ બાળકીને અપહરણ કરી લઇ જઇ પોતાનું હવસ પૂરી કરી હતી. બાદમાં બાળકી ગંભીર હાલતમાં મળી આવતા તુરંત હોસ્પિટલ ખસેડવામાં આવી હતી, જ્યાં તેનું સારવાર ચાલી રહી છે.

આ ઘટનાને પગલે કતારગામ પોલીસ, ક્રાઇમ બ્રાન્ચ અને એફએસએલની ટીમ ઘટનાસ્થળે પહોંચી તપાસ હાથ ધરી છે. પ્રાથમિક તપાસમાં આરોપી સંભવિત CCTV ફૂટેજમાં કેદ થયો હોવાની માહિતી મળી છે. પોલીસ હવે આસપાસના વિસ્તારોમાં સઘન તપાસ કરી રહી છે.

શહેરમાં માસૂમ બાળકી પર થયેલા આ અત્યાચારથી લોકોમાં ભારે રોષ છે. સ્થાનિક રહીશો આરોપીને ઝડપથી પકડી કડક સજા આપવાની માંગ કરી રહ્યા છે. બાળકીના પરિવારજનો આ ઘટનાથી ગભરાઈ ગયા છે અને તેઓ માટે આ માનસિક આઘાતજનક છે.

પોલીસે આ ગુનામાં દોષિતને ઝડપવા માટે વિશેષ ટીમ ગોઠવી છે. સુરત શહેરની જનતા અપેક્ષા રાખે છે કે આરોપીને ઝડપથી પકડવામાં આવશે અને કાયદા મુજબ કડક સજા કરવામાં આવશે.

સુરતમાં રસ્તા પર મોતની સવારી લઈને નીકળતા નબીરાઓ લોકો માટે જોખમી બની રહ્યાં છે. એક પછી એક અકસ્માત નબીરાઓ સર્જી રહ્યાં છે. ત્યારે રસ્તા પર પોલીસને પડકાર ફેંકતા હોય તે રીતે નબીરાઓની જોખમી સવારીના વીડિયો વાયરલ થઈ રહ્યાં છે.

સુરતમાં નબીરાઓના એક ટોળાનો વીડિયો વાઈરલ થયો છે. જેમાં GJ 05 RV 9841 કારમાં અજાણ્યા શખસો ભેગા થઈને પોલીસને ગાળો આપી રહ્યા છે. આ સાથે પોતાના ચહેરાને કાળા રંગે રંગી રસ્તા વચ્ચે ધતિંગ કરતાં પોતાની સાથે અન્ય લોકોના જીવ પણ જોખમમાં મૂકી રહ્યા છે. વીડિયોમાં નબીરાઓ સ્કોર્પિયો પર બેસીને ફરી રહ્યાં છે અને બેફામ ગાડી હંકારી રહ્યાં છે. મોઢા પર કાળો કલર કરી પોલીસને ગાળો આપી લલકારી રહ્યા છે કે, હવે ઓળખો અને પકડી બતાવો.

વરાછા પોલીસે 9 લોકોની કરી ઘરપકડ
ગોહિલ હિરેન, વિશાલ શિયાળ, ઉમેશ સીરસાઠ, શૈલેષ રાઠોડ, ગોપાલ પરમાર, મનહર રાઠોડ, બિપિન રાઠોડ, જયેશ ગોહિલ સહિત સગીરની ધરપકડ કરી

પોલીસની કામગીરી પર પણ પ્રશ્ન ઊભા કરે છે. જ્યારે પણ આવો વીડિયો વાઈરલ થાય છે, ત્યારે પોલીસ આવા નબીરાઓને પકડીને સરઘસ કાઢે છે અને સોશિયલ મીડિયા પર BEFORE, AFTER ના વીડિયો બનાવે છે. પરંતુ, આવી ઘટના જ ન બને તે માટે કોઈ નક્કર પગલાં લેવામાં નથી આવતાં. પોલીસને લલકારવાની આવી તાકાત થવી એ પોલીસની કામગીરી પર મોટા પ્રશ્ન ઊભા કરે છે. આવા વીડિયો દર્શાવે છે કે, પોલીસ રાજ્યની જનતામાં કાયદો અને વ્યવસ્થા જાળવી શકવામાં નિષ્ફળ સાબિત થઈ છે.