સતત વધી રહેલા વરસાદ અને ઉપરવાસમાં વરસી રહેલા ભારે વરસાદને કારણે શહેરની ખાડીઓના જળસ્તરમાં ઝડપી વધારો નોંધાઈ રહ્યો છે. પરિસ્થિતિને ધ્યાનમાં રાખીને તંત્રે નીચાણવાળા વિસ્તારોમાં રહેતા લોકોને સાવચેત રહેવા અને જરૂર પડે તો સુરક્ષિત સ્થળે સ્થળાંતર કરવા અપીલ કરી છે. રાજ્યભરમાં ભારે વરસાદની આગાહી વચ્ચે સુરત સહિત દક્ષિણ ગુજરાત માટે તંત્ર એલર્ટ મોડ પર છે.
સુરત મ્યુનિસિપલ કમિશનર એમ. નાગરાજે જણાવ્યું કે શહેરમાં કલાકે કલાકે વરસાદની તીવ્રતા વધી રહી છે. સુરત શહેર ઉપરાંત જિલ્લાના વિવિધ વિસ્તારો, કીમ અને ભરૂચ હાઇવે તરફના વિસ્તારમાં પણ ભારે વરસાદની સ્થિતિ જોવા મળી રહી છે. ઉપરવાસમાં સતત વરસાદને કારણે સાંજ સુધીમાં વિવિધ ખાડીઓમાં પાણીનું સ્તર જોખમી સપાટીએ પહોંચવાની શક્યતા છે.
ખાડીઓ ઓવરફ્લો થવાની સ્થિતિ સર્જાય તો નીચાણવાળા વિસ્તારોમાં પાણી ઘૂસી જવાની અને જળબંબાકાર સર્જાવાની આશંકા છે. આ સંજોગોમાં મનપાએ અસરગ્રસ્ત વિસ્તારોમાંથી લોકોને સુરક્ષિત શેલ્ટર હોમમાં ખસેડવાની કામગીરી શરૂ કરી છે. બચાવ કામગીરી માટે 1 NDRF અને 2 SDRFની ટીમો તહેનાત કરવામાં આવી છે, જ્યારે 16 રેસ્ક્યૂ બોટ પણ તૈયાર રાખવામાં આવી છે. અસરગ્રસ્ત પરિવારો માટે રહેવા, ભોજન અને તબીબી સારવાર સહિતની તમામ જરૂરી સુવિધાઓ ગોઠવવામાં આવી હોવાનું તંત્રએ જણાવ્યું છે.
કમિશનરે ખાસ કરીને વેલંજા, ગોઠણ તેમજ કીમ-ભરૂચ હાઇવે નજીકના ગ્રામ્ય વિસ્તારોના લોકોને સતર્ક રહેવા અપીલ કરી છે. તેમણે જણાવ્યું કે ગભરાવાની જરૂર નથી, પરંતુ સત્તાવાર સૂચનાઓનું પાલન કરવું અને જરૂરી હોય તો તાત્કાલિક સુરક્ષિત સ્થળે જવું અત્યંત જરૂરી છે. હાલ સમગ્ર વહીવટી તંત્ર પરિસ્થિતિ પર સતત નજર રાખી રહ્યું છે અને કોઈપણ કટોકટીનો સામનો કરવા સંપૂર્ણ તૈયાર હોવાનું જણાવ્યું છે.
