ગણેશોત્સવની ધામધૂમ વચ્ચે મુંબઈના વિશ્વપ્રસિદ્ધ ‘લાલબાગચા રાજા’ના દર્શને પહોંચેલા હજારો ભક્તોના શ્વાસ રવિવારે ત્યારે અધ્ધર થઈ ગયા જ્યારે પંડાલમાં અચાનક શોર્ટ સર્કિટ સર્જાયું હતું. આસપાસ તણખા ઝરતાં જ અબાલ-વૃદ્ધ સૌમાં નાસભાગ મચી ગઈ હતી અને એક ક્ષણ માટે તો ભયનો માહોલ છવાઈ ગયો હતો. જોકે, બાપ્પાના આશીર્વાદ અને વહીવટી તંત્રની ત્વરિત કાર્યવાહીને પગલે કોઈ મોટી દુર્ઘટના ઘટતા રહી ગઈ હતી. સમયસૂચકતા વાપરીને સ્થિતિ પર કાબૂ મેળવી લેવાતાં તમામ શ્રદ્ધાળુઓ સુરક્ષિત બચી ગયા હતા અને ભક્તોએ રાહતનો શ્વાસ લીધો હતો.
પ્રાપ્ત માહિતી અનુસાર, રવિવારે રજાનો દિવસ હોવાથી લાલબાગચા રાજાના દરબારમાં દર્શનાર્થીઓનો ભારે મહેરામણ ઉમટી પડ્યો હતો. આ દરમિયાન ‘મુખ દર્શન’ની લાઈન પાસે આવેલા એક ઇલેક્ટ્રિકલ ફીડર પિલર (સ્વિચ અને સર્કિટ બ્રેકર ધરાવતું બહારનું કેબિનેટ)માં અચાનક જ ટેકનિકલ ખામી સર્જાઈ હતી. કેબિનેટમાંથી વીજળીના તણખા ઉડવા લાગતા લાઈનમાં ઊભેલા લોકોમાં ગભરાટ ફેલાઈ હતી અને અફરાતફરી જેવો માહોલ ઊભો થયો હતો.
જોકે, સ્થળ પર હાજર સિક્યોરિટી ગાર્ડ્સ, મંડળના સતર્ક સ્વયંસેવકો અને બૃહન્મુંબઈ મ્યુનિસિપલ કોર્પોરેશન (BMC)ની ટીમે તરત જ મોરચો સંભાળી લીધો હતો. સુરક્ષાના ભાગરૂપે તાત્કાલિક અસરથી પાવર સપ્લાય બંધ કરી દેવામાં આવી હતી અને તે વિસ્તારને કોર્ડન કરી લેવાયો હતો. ટેકનિકલ ટીમે ગણતરીની મિનિટોમાં જ વાયરિંગની ખામી સુધારી લેતાં કોઈ જાનહાનિ નોંધાઈ નહોતી. ભક્તોની સુરક્ષા સુનિશ્ચિત કર્યા બાદ જ દર્શન રાબેતા મુજબ શરૂ કરવામાં આવ્યા હતા. સાવચેતીના પગલારૂપે બેસ્ટ (BEST) અને બીએમસીના અધિકારીઓએ પંડાલના તમામ અસ્થાયી વીજ જોડાણોનું ઝીણવટભર્યું નિરીક્ષણ કર્યું હતું.
આ શોર્ટ સર્કિટની ઘટનાએ લોકોમાં એટલા માટે વધુ ગભરાટ ફેલાવ્યો હતો, કારણ કે રવિવારે વહેલી સવારે જ આ વિસ્તાર નજીક કાલાચોકીના દત્તાનારામ લાડ માર્ગ પર એક હૃદયદ્રાવક દુર્ઘટના ઘટી ચૂકી હતી. ત્યાં અન્ય એક ગણેશ પંડાલ પાસે પીવાના પાણીના અસ્થાયી સ્ટોલમાં વીજ કરંટ લાગવાથી ૮ વર્ષની માસૂમ બાળકી અને એક ૩૩ વર્ષીય મહિલાનું કમકમાટીભર્યું મોત નીપજ્યું હતું, જ્યારે અન્ય ચાર લોકો ગંભીર રીતે ઈજાગ્રસ્ત થયા હતા.
એક જ દિવસમાં વીજળીને લગતી બે ઘટનાઓ સામે આવતાં મુંબઈ પ્રશાસન હરકતમાં આવી ગયું છે.
