વડોદરા શહેરમાં કરોડો રૂપિયાનો દારૂ ઠાલવનાર લાલુ સિંધી અને તેની ટોળકી સામે ગુજસીટોક હેઠળ ગુનો નોંધાયો છે. છેલ્લા બે દાયકા કરતા વધુ સમયથી શહેર જિલ્લા સહિત મધ્ય ગુજરાતના અનેક નાના-મોટા નગરોમાં ભારતીય બનાવટના વિદેશી દારૂનો કરોડોનો વેપલો કરનાર કુખ્યાત બુટલેગર લાલુ સિંધી સામે આખરે પોલીસ તંત્ર દ્વારા લાલ આંખ કરવામાં આવી છે અને તેની ટોળકીના 12 આરોપી સામે શહેર પોલીસ તંત્ર દ્વારા નંદેસરી પોલીસ સ્ટેશનમાં ગુજસીટોક હેઠળ ગુનો દાખલ કરવામાં આવ્યો છે અને બુટલેગર મુકેશ મખીજાનીની ધરપકડ કરવામાં આવી છે. આ ટોળકીના ચાર આરોપી હાલમાં જેલમાં છે અને લાલુ સિંધી સહિતના આરોપીઓને ઝડપી પાડવાના ચક્રો ગતિમાન કરવામાં આવ્યા છે.
લાલુ સિંધી અને તેની ટોળકી દર મહીને રાજસ્થાન, મધ્યપ્રદેશ, હરિયાણા, દમણ અને ગોવાથી કરોડોનો દારૂ ગુજરાતમાં ઠાલવતા અને તેનો ખુલ્લેઆમ વેપાર કરતા હતા. આ ગુનાની તપાસ મદદનીશ પોલીસ કમિશનર પ્રણવ કટારીયા દ્વારા હાથ ધરવામાં આવી છે. છેલ્લા બે દાયકા કરતા વધુ સમયથી લાલચંદ ઉર્ફે લાલુ હેમનદાસ ખાનાણી ઉર્ફે લાલુ સિંધી, સુનીલ ઉર્ફે અદો પ્રકાશભાઈ કેવલરામાણી અને બંન્નેનો બોઝ ગણાતા વિજુ સિંધી દ્વારા વડોદરા શહેર અને જીલ્લામાં દારૂનો વેપલો કરવામાં આવતો હતો એટલે સુધી કે કોઈ સ્થાનિક બુટલેગરને ધંધો કરવાની પરવાનગી જોઈતી હોય તો તેઓ લાલુનો સંપર્ક કરતા હતા.
તાજેતરમાં સ્ટેટ મોનીટરીંગ સેલ દ્વારા ઝડપી પાડીને આ ટોળકીના કારનામાં છતાં કરતા વડોદરા શહેર પોલીસ તંત્ર દ્વારા આખરે આ ટોળકી સામે ગુનો દાખલ કરવાની ફરજ પડી હતી. 37 ગુનામાં સંડોવાયેલો અને 6 વખત પાસા હેઠળ જેલવાસ ભોગવી ચૂકેલા લાલચંદ ખાનાણી ઉર્ફે લાલુ સિંધી, સુનિલ ઉર્ફ અદો પ્રકાશભાઈ કેવલરામાણી, મુકેશ નારાયણદાસ મખીજાની, અનિલ ઉર્ફે એન્થોની મુલચંદ ગંગવાણી, ધર્મેશ ઉર્દૂ, લાલો સંમતસિંહ ચૌહાણ, ફાલુ ઉર્ફ ટોપી સુંદરલાલ ટેલવાણી, મનોજ ઉર્ફે પાપડ શંકરભાઈ નરસિંગાની જીતેન્દ્ર ઉર્ફે જીતુ સંપતસિંહ ચૌહાણ મોહીત દિલીપભાઈ અગ્રવાલ, હેમંત નાનકરામ સચવાણી, હિમાંશુ દીલીપ અગ્રવાલ અને દીપેન દિનેશભાઈ વાળા સામે ગુજસીટોકનો ગુનો નોંધીને વધુ તપાસ હાથ ધરી છે.
