‘India’s Got Latent’ વિવાદમાં સમય રૈના અને રણવીર અલ્હાબાદિયાને સુપ્રીમ કોર્ટમાંથી મોટી રાહત મળી છે. વર્ષ 2025માં શરૂ થયેલો આ વિવાદ અનેક FIR, પોલીસ તપાસ અને સુપ્રીમ કોર્ટની કડક ટિપ્પણીઓ સુધી પહોંચ્યો હતો. હવે સુપ્રીમ કોર્ટે સંબંધિત FIR અને ફોજદારી કાર્યવાહી રદ કરવાનો આદેશ આપતા આ હાઈ-પ્રોફાઇલ કેસમાં મોટો કાનૂની વળાંક આવ્યો છે.
સુપ્રીમ કોર્ટે સમય રૈના અને અન્ય સામે દિવ્યાંગ વ્યક્તિઓ અંગે કરવામાં આવેલી કથિત અસંવેદનશીલ ટિપ્પણીઓ સાથે જોડાયેલી FIR રદ કરી છે. કોર્ટએ અગાઉ આપેલા નિર્દેશોના પાલનને પણ ધ્યાનમાં લીધું હતું. આ નિર્દેશોમાં દિવ્યાંગ વ્યક્તિઓ અંગે જાગૃતિ ફેલાવવી અને તેમના કલ્યાણ માટે ફંડ એકત્રિત કરવાના પ્રયાસો સામેલ હતા.
આ સમગ્ર વિવાદની શરૂઆત ‘India’s Got Latent’ના એક એપિસોડ બાદ થઈ હતી, જેમાં રણવીર અલ્હાબાદિયાની વાંધાજનક ટિપ્પણીઓ સામે ભારે વિરોધ થયો હતો. ત્યારબાદ તેમના વિરુદ્ધ અનેક FIR નોંધાઈ હતી. ફેબ્રુઆરી 2025માં સુપ્રીમ કોર્ટે અલ્હાબાદિયાને ધરપકડથી વચગાળાની સુરક્ષા આપી હતી અને મામલાની તપાસમાં સહકાર આપવા જણાવ્યું હતું. કોર્ટએ તેમની ટિપ્પણીઓને લઈને પણ કડક વલણ અપનાવ્યું હતું.
બીજી તરફ, દિવ્યાંગોને લઈને થયેલી ટિપ્પણીઓના કેસમાં સમય રૈના, વિપુલ ગોયલ, બલરાજ ઘાઈ, સોનાલી ઠક્કર અને નિશાંત તંવર સામે પણ કાર્યવાહી ચાલી રહી હતી. જુલાઈ 2026માં સુપ્રીમ કોર્ટે અગાઉના નિર્દેશોનું પાલન ન કરવા બદલ આ પાંચેય પર ₹3 લાખનો ખર્ચ ફટકાર્યો હતો.
હવે તાજા આદેશથી ‘India’s Got Latent’ સાથે જોડાયેલા લાંબા કાનૂની વિવાદને મોટો અંત મળ્યો છે. જોકે, કોર્ટની અગાઉની કડક ટિપ્પણીઓએ ઓનલાઈન કન્ટેન્ટ અને અભિવ્યક્તિની મર્યાદા અંગે મહત્વપૂર્ણ ચર્ચા પણ ઉભી કરી હતી.
