સરખેજમાં પતિ-પત્નીના વિવાદ વચ્ચે એવો ચોંકાવનારો કિસ્સો સામે આવ્યો છે, જેમાં પતિ દ્વારા પત્નીના સ્કૂટરમાં GPS ટ્રેકર લગાવી તેના પર નજર રાખવામાં આવતી હોવાનો આક્ષેપ થયો છે. આ સાથે જ મહિલાએ પતિ અને તેના મિત્ર સામે ઘરનું તાળું ખોલી રૂ.1.50 લાખથી વધુની ઘરવખરી લઈ જવાની ફરિયાદ પણ નોંધાવી છે. સમગ્ર મામલે સરખેજ પોલીસે ફરિયાદના આધારે તપાસ શરૂ કરી છે.
સરખેજમાં રહેતી મહિલાના લગ્ન વર્ષ 2007માં અહેસાનઅલી ભોવણિયા સાથે થયા હતા. દંપતીને ત્રણ સંતાનો છે. એપ્રિલ 2023માં બંને વચ્ચે અણબનાવ થતાં તેઓ અલગ રહેવા લાગ્યા હતા અને ત્યારથી ત્રણેય બાળકો મહિલાની સાથે રહે છે. ફરિયાદ મુજબ મહિલાએ પતિ વિરુદ્ધ ભરણપોષણનો કેસ નડિયાદ ફેમિલી કોર્ટમાં અને ઘરેલુ હિંસાનો કેસ અમદાવાદ ગ્રામ્ય કોર્ટમાં કર્યો છે.
મહિલાના જણાવ્યા મુજબ, 21 માર્ચ 2026ના રોજ તે બાળકો સાથે પિયર ગઈ હતી. બીજા દિવસે ઘરે પરત ફરતાં ઘરવખરીનો સામાન ગાયબ હોવાનું જાણવા મળ્યું. ત્યારબાદ સોસાયટીના CCTV ફૂટેજ તપાસતાં 22 માર્ચની રાત્રે આશરે દોઢ વાગ્યે પતિ અહેસાનઅલી અને તેના મિત્ર મહેદીભાઈ ખાદીમભાઈ ભોવણિયા મકાનનું તાળું ખોલીને અંદર પ્રવેશતા અને બે છોટા હાથી વાહનમાં સામાન લઈ જતા દેખાયા હોવાનો ફરિયાદમાં ઉલ્લેખ છે.
વધુમાં, 3 સપ્ટેમ્બર 2026ના રોજ મહિલાના નામે રહેલા જ્યુપિટર સ્કૂટરની સર્વિસ દરમિયાન ગેરેજના ઇરફાનભાઈએ આગળના ભાગમાં કાળા રંગનું GPS ડિવાઇસ મળ્યાની જાણ કરી હતી. મહિલાએ પોતે આવું ડિવાઇસ ન લગાવ્યું હોવાનું જણાવતાં પતિ પર શંકા વ્યક્ત કરી હતી. સમગ્ર મામલે પોલીસે તપાસ હાથ ધરી છે.
