દિલ્હીના સ્વરૂપ નગર વિસ્તારમાં ખેતરમાંથી મળી આવેલી કિશોરીની લાશ પાછળનું રહસ્ય હવે ઉકેલાયું છે. 13 સપ્ટેમ્બરે સડી ગયેલી હાલતમાં મૃતદેહ મળ્યા બાદ પોલીસે 50થી વધુ CCTV કેમેરાના ફૂટેજ ચકાસ્યા અને એક શંકાસ્પદ ટેમ્પોની હિલચાલના આધારે ત્રણ સગીર સહિત ચાર આરોપીઓને ઝડપી પાડ્યા હતા. તેમની પૂછપરછના આધારે એ સગીરા પર સામુહિક દુષ્કર્મ કર્યા બાદ તેની હત્યા કરી લાશ ફેંકી દેવામાં આવી હોવાનું રહસ્ય ખુલ્યું હોવાનું પોલીસે જણાવ્યું હતું.
પોલીસને 13 સપ્ટેમ્બરની સવારે કુશક રોડ, લાલ બાઉન્ડ્રી પાસે આવેલા જયપાલ રાણાના ખેતરમાં એક કિશોરીનો મૃતદેહ પડ્યો હોવાની માહિતી મળી હતી. ઘટનાસ્થળે પહોંચેલી ટીમે મૃતદેહની સ્થિતિ જોઈ તપાસ શરૂ કરી હતી. શરૂઆતમાં મૃતકની ઓળખ થઈ શકી નહોતી. બાદમાં તપાસ દરમિયાન તેની ઓળખ સ્વરૂપ નગર વિસ્તારમાં રહેતી કિશોરી તરીકે થઈ હતી.
પોલીસના જણાવ્યા અનુસાર, કિશોરીની ચાકુ મારીને હત્યા કરવામાં આવી હતી. ખુલ્લી જગ્યાએ પડેલા મૃતદેહને રખડતા કૂતરાઓએ ચુથી કાઢ્યું હતું. તપાસ દરમિયાન પોલીસને ઘટનાના કોઈ પ્રત્યક્ષ સાક્ષી મળ્યા નહોતા. ત્યારબાદ ટેક્નિકલ સર્વેલન્સ અને CCTV ફૂટેજને આધારે આરોપીઓ સુધી પહોંચવાનો પ્રયાસ શરૂ કરવામાં આવ્યો હતો.
50થી વધુ કેમેરાના ફૂટેજ તપાસતા ઘટનાના સમયગાળા દરમિયાન વિસ્તારમાં એક શંકાસ્પદ ટેમ્પો જોવા મળ્યો હતો. શરૂઆતમાં અંધારાના કારણે તેનો નંબર સ્પષ્ટ મળ્યો નહોતો. પોલીસે સતત તેની હિલચાલ ટ્રેસ કરી અને 15 સપ્ટેમ્બરની રાત્રે ટેમ્પો ખડ્ડા કોલોની વિસ્તારમાંથી શોધી કાઢ્યો હતો. ટેમ્પો ચાલકની પૂછપરછ બાદ પોલીસે ત્રણ સગીર સહિત ચાર આરોપીઓને પકડ્યા હતા.
ગિરફ્તાર આરોપીઓમાં પુખ્ત આરોપી તરીકે શિવમ ઉર્ફે સુદામાની ઓળખ જાહેર થઈ છે. ત્રણેય સગીર આરોપીઓની ઉંમર 16થી 17 વર્ષની વચ્ચે હોવાનું પોલીસ તરફથી જણાવાયું છે. પોલીસ સૂત્રોના જણાવ્યા મુજબ, એક સગીર આરોપી મૃતકનો ઓળખીતો હતો . તપાસમાં આરોપીઓએ ટેમ્પોમાં સાથે દારૂ પીધો હોવાનું બહાર આવ્યું હતું.
પોલીસે આરોપીઓ પાસેથી બે ચાકુ, ઘટનાના સમયે પહેરેલા હોવાનું જણાવાયેલા કપડાં અને ટેમ્પો જપ્ત કર્યો છે. કથિત દુષ્કર્મની જાણ પોલીસને થઈ જશે તેવી ભીતિથી હત્યા કરવામાં આવી હોવાની આશંકા પણ તપાસમાં વ્યક્ત કરવામાં આવી છે. જોકે, સમગ્ર ઘટનાક્રમ અને દરેક આરોપીની ચોક્કસ ભૂમિકા અંગે ફોરેન્સિક તથા ટેક્નિકલ પુરાવાની તપાસ હજુ ચાલી રહી છે.
