લંડનથી ઢાકા જઈ રહેલી બિમાન બાંગ્લાદેશ એરલાઈન્સની ફ્લાઈટમાં મુસાફરોને એવો નજારો જોવા મળ્યો, જેની કદાચ કોઈએ કલ્પના પણ નહીં કરી હોય. બે મુસાફરો વચ્ચે પહેલા કોઈ મુદ્દે ઉગ્ર બોલાચાલી થઈ હતી. જોતજોતામાં આ વિવાદ એટલો વધી ગયો કે બંને એકબીજા પર લાત-ઘૂંસા વરસાવવા લાગ્યા હતા. મારામારી દરમિયાન એક મુસાફરનું ટી-શર્ટ પણ ફાટી ગયું હતું. ઘટનાનો વીડિયો હવે સોશિયલ મીડિયા પર વાયરલ થઈ રહ્યો છે.
પહેલા બોલાચાલી , પછી શરૂ થઈ મારામારી
અહેવાલ મુજબ, ફ્લાઈટમાં બે મુસાફરો વચ્ચે પહેલા ભારે દલીલ થઈ હતી. ત્યારબાદ મામલો હાથાપાઈ સુધી પહોંચી ગયો. બંને મુસાફરો એકબીજા સાથે ઝઘડતા-ઝઘડતા લાત અને મુક્કા મારવા લાગ્યા હતા. અન્ય મુસાફરોએ બંનેને રોકવા અને વચ્ચે પડવાની કોશિશ કરી હતી, પરંતુ શરૂઆતમાં તેમને કાબૂમાં લેવા મુશ્કેલી પડી હતી.
આ દરમિયાન મારામારી એટલી ઉગ્ર બની ગઈ હતી કે એક મુસાફરનું ટી-શર્ટ ફાટી ગયું હતું. ફ્લાઈટમાં અચાનક સર્જાયેલા આ હંગામાને કારણે અન્ય મુસાફરોમાં પણ ગભરાટ ફેલાયો હતો.
એરલાઈને શું કહ્યું?
આ ઘટનાને લઈને એરલાઈને પૂછપરછ કરવામાં આવી ત્યારે જનરલ મેનેજર મહબૂબુદ્દીન અહમદે કહ્યું કે તેમને આ ઘટના અંગે હાલમાં કોઈ માહિતી નથી, પરંતુ તેઓ આ મામલે માહિતી મેળવશે. એરલાઈને આ ઘટનાને લઈને તે સમયે વધુ કોઈ વિગતવાર ટિપ્પણી કરી નહોતી.
અહેવાલ મુજબ, બંને મુસાફરો વચ્ચે ઝઘડો શરૂ થતાં ફ્લાઈટમાં અફરાતફરીનો માહોલ સર્જાયો હતો. ઘટના અંગે જાણ થતાં પાયલટે મુસાફરો સુધી પહોંચી પરિસ્થિતિને શાંત કરવાનો પ્રયાસ કર્યો હતો. ત્યારબાદ બંને મુસાફરોને કાબૂમાં લેવામાં આવ્યા હતા.
ફ્લાઈટની અંદર થયેલી આ મારામારીનો વીડિયો સામે આવ્યા બાદ સોશિયલ મીડિયા પર પણ આ ઘટનાની ચર્ચા તેજ બની છે.
