ઉત્તર ગુજરાતમાં ચોમાસાએ ફરી એકવાર રૌદ્ર સ્વરૂપ ધારણ કર્યું છે. અરવલ્લી જિલ્લામાં મેઘરાજાએ એવો ધમાકો બોલાવ્યો છે કે માત્ર બે જ કલાકમાં ચારેય તરફ જળબંબાકાર જેવી સ્થિતિ સર્જાઈ ગઈ છે. ખાસ કરીને મેઘરજ પંથકમાં સવાર-સવારમાં વરસેલા અઢી ઈંચથી વધુ વરસાદે જનજીવન પ્રભાવિત કર્યું છે, જ્યારે હવામાન વિભાગે સમગ્ર પ્રદેશ માટે ગાજવીજ સાથે ભારે વરસાદની આશંકા વ્યક્ત કરતા તંત્ર એલર્ટ મોડ પર આવી ગયું છે.
સ્ટેટ ઇમરજન્સી ઓપરેશન સેન્ટર (SEOC)ના તાજા આંકડા અનુસાર, ૧૮ સપ્ટેમ્બરે સવારે ૬થી ૮ વાગ્યા દરમિયાન મેઘરજમાં રાજ્યનો સૌથી વધુ ૬૫ મિમી (૨.૫૬ ઈંચ) વરસાદ ખાબક્યો હતો. આ જ સમયગાળામાં અરવલ્લીના મોડાસામાં પણ ૫૩ મિમી (૨.૦૯ ઈંચ) વરસાદ નોંધાયો હતો. આ ઉપરાંત સાબરકાંઠાના તાલોદમાં ૪૮ મિમી, મહેસાણાના ખેરાલુમાં ૩૮ મિમી અને મહેસાણા તાલુકામાં ૩૫ મિમી વરસાદ નોંધાતાં સમગ્ર ઉત્તર ગુજરાતમાં વરસાદી માહોલ વધુ ઘેરો બન્યો છે.
ભારતીય હવામાન વિભાગ (IMD)ના તાજેતરના નાઉકાસ્ટ (Nowcast)માં ગુજરાતમાં સાબરકાંઠા,અરવલ્લી, મહીસાગર, અમદાવાદ, ખેડા જિલ્લા માં રેડ એલર્ટ જાહેર કરવામાં આવ્યું છે. અને અન્ય વિસ્તારોમાં યેલ્લો અને ઓરેંજ એલર્ટ જાહેર કરવામાં આવ્યું છે.
વીજળીના કડાકા-ભડાકા સાથે ભારે વરસાદની સ્થિતિમાં લોકોને બિનજરૂરી બહાર ન નીકળવા અને સાવચેતી રાખવા અપીલ કરાઈ છે.
