ચીનના વુજિન શહેરમાં થયેલા હેલિકોપ્ટર અકસ્માતનો એક ચોંકાવનારો વીડિયો સોશિયલ મીડિયા પર ઝડપથી વાયરલ થઈ રહ્યો છે. વીડિયોમાં જોવા મળે છે કે એક હેલિકોપ્ટર ખેતરમાં ક્રેશ થઈને બે ટુકડામાં તૂટી જાય છે, પરંતુ અકસ્માત બાદ પણ તેના રોટર બ્લેડ લાંબા સમય સુધી તેજ ગતિએ ફરતા રહે છે. અકસ્માત દરમિયાન કોકપિટમાં ફસાયેલા પાયલટ અને તેનો સાથી ગંભીર રીતે ઝટકા ખાતા જોવા મળે છે. એક પાયલટ તો હેલિકોપ્ટરના દરવાજામાંથી અડધો બહાર લટકતો હતો અને અનેક વખત જમીન તેમજ હેલિકોપ્ટરના ભાગો સાથે અથડાતો જોવા મળ્યો હતો.
લોકો જોઈ રહ્યા હતા, પરંતુ મદદ માટે આગળ ન વધી શક્યા
ઘટનાસ્થળ નજીકના રસ્તા પર હાજર લોકો અકસ્માત જોઈને એકઠા થઈ ગયા હતા, પરંતુ હેલિકોપ્ટરના રોટર બ્લેડ સતત ફરતા હોવાથી કોઈ વ્યક્તિ મદદ માટે નજીક જઈ શક્યો નહોતો. સ્થિતિ એટલી જોખમી હતી કે બચાવ કામગીરી શરૂ કરવામાં પણ મુશ્કેલી પડી હતી.
સીટ બેલ્ટે બચાવ્યો જીવ
મીડિયા રિપોર્ટ અનુસાર, બંને પાયલટનો જીવ સીટ બેલ્ટના કારણે બચી ગયો હતો. ‘ધ સન’ના અહેવાલ મુજબ આ અકસ્માત ગુરુવારે બપોરે લગભગ 2 વાગ્યે ચીનના વુજિન શહેરમાં થયો હતો.
એકને હોસ્પિટલમાંથી રજા, બીજો સારવાર હેઠળ
અકસ્માતની જાણ થતાં જ ઇમરજન્સી સેવા અને બચાવ ટીમો તાત્કાલિક ઘટનાસ્થળે પહોંચી ગઈ હતી. બંને ઘાયલોને હોસ્પિટલ ખસેડવામાં આવ્યા હતા. જેમાંથી એક વ્યક્તિને સારવાર બાદ ડિસ્ચાર્જ કરવામાં આવ્યો છે, જ્યારે બીજો હજુ પણ ડોકટરોની દેખરેખ હેઠળ સારવાર લઈ રહ્યો છે. રાહતની વાત એ છે કે બંનેમાંથી કોઈની પણ સ્થિતિ ગંભીર કે જીવલેણ હોવાનું જણાવાયું નથી. હાલ હેલિકોપ્ટર દુર્ઘટનાના ચોક્કસ કારણોની તપાસ શરૂ કરવામાં આવી છે.
અગાઉ પણ આવી ઘટનાઓ બની ચૂકી છે
ચીનમાં છેલ્લા કેટલાક વર્ષોમાં વિમાન અને હેલિકોપ્ટર દુર્ઘટનાઓના અનેક બનાવો સામે આવ્યા છે. ગયા વર્ષે જાણીતા સોશિયલ મીડિયા ઇન્ફ્લુએન્સર તાંગ ફેઇજીનું લાઇવસ્ટ્રીમ દરમિયાન અલ્ટ્રાલાઇટ વિમાન ક્રેશ થતાં મોત થયું હતું.
રિપોર્ટ્સ અનુસાર, અકસ્માત સમયે તેમણે હેલ્મેટ કે પેરાશૂટ પહેર્યું નહોતું. નોંધનીય છે કે તાંગ ફેઇજી અગાઉ પણ ટેકનિકલ ખામીને કારણે થયેલી બે અલગ-અલગ વિમાન દુર્ઘટનાઓમાંથી બચી ચૂક્યા હતા. એક અકસ્માત ઇંધણ માપવાના ઉપકરણમાં ખામી સર્જાતા થયો હોવાનું જણાવાયું હતું.
