ટ્રેનમાં બેસી ગયા એટલે મુસાફરીની ચિંતા પૂરી થઈ ગઈ એવું માનતા હોવ તો હવે થોડું સાવચેત થવાનો સમય છે. 1 ઓક્ટોબરથી સેન્ટ્રલ રેલવે એક મહિના માટે વિશેષ ટિકિટ ચેકિંગ અભિયાન શરૂ કરી રહ્યું છે. આ દરમિયાન માત્ર ટિકિટ બતાવવાથી કામ નહીં ચાલે, પરંતુ ખાસ પ્રકારની ટિકિટ ધરાવતા મુસાફરોની ઓળખ, પાત્રતા અને જરૂરી દસ્તાવેજોની પણ ચકાસણી કરવામાં આવશે. આ અભિયાન 31 ઓક્ટોબર 2026 સુધી ચાલશે.
સેન્ટ્રલ રેલવેના જણાવ્યા અનુસાર ચેકિંગ દરમિયાન કન્સેશન હેઠળની ટિકિટ, નિર્ધારિત રિઝર્વેશન કોટા અને વિવિધ રેલવે પાસ સાથે મુસાફરી કરતા મુસાફરો પર ખાસ ધ્યાન આપવામાં આવશે. આવા મુસાફરોએ પોતાની પાત્રતા સાબિત કરવા માટે નિયમ મુજબનું મૂળ ઓળખપત્ર અને જરૂરી દસ્તાવેજો સાથે રાખવા પડશે.
જો એક જ ટિકિટ પર એકથી વધુ મુસાફરો મુસાફરી કરતા હોય, તો ટિકિટમાં નોંધાયેલા ઓછામાં ઓછા એક મુસાફર પાસે નિર્ધારિત મૂળ ઓળખપત્ર હોવું જરૂરી રહેશે. જરૂરી મૂળ પુરાવો રજૂ ન કરી શકાય તો લાગુ નિયમો મુજબ તે ટિકિટ પર મુસાફરી કરનારા મુસાફરોને માન્ય ટિકિટ વિના મુસાફરી કરનાર ગણવામાં આવી શકે છે.
E-Pass અથવા PTO (Privilege Ticket Order) દ્વારા મુસાફરી કરનારાઓએ પણ જરૂરી મૂળ ઓળખપત્ર સાથે રાખવું પડશે. સાથે જ E-Pass/PTOને મુસાફરી માટે જરૂરી સત્તાવાર ટ્રાવેલ ઓથોરિટીમાં નિયમસર રૂપાંતરિત કરાવેલું હોવું જરૂરી છે.
રેલવેના નિયમો મુજબ માન્ય ઓળખપત્રોમાં મતદાર ઓળખપત્ર, પાસપોર્ટ, PAN કાર્ડ, ડ્રાઇવિંગ લાઇસન્સ, કેન્દ્ર અથવા રાજ્ય સરકારનું ફોટો ઓળખપત્ર, માન્ય વિદ્યાર્થી ઓળખપત્ર, ફોટોવાળી રાષ્ટ્રીયકૃત બેંક પાસબુક, લેમિનેટેડ ફોટોવાળું ક્રેડિટ કાર્ડ અને આધારનો સમાવેશ થાય છે. ચોક્કસ કન્સેશન અથવા કોટા માટે વધારાના પાત્રતા દસ્તાવેજોની જરૂર પડી શકે છે.
આ અભિયાનમાં અનારક્ષિત ટિકિટોની અસલિયતની પણ વધુ કડક તપાસ થશે. જરૂરિયાત મુજબ ટિકિટ ચેકિંગ સ્ટાફ TTE એપનો ઉપયોગ કરીને ટિકિટની વિગતો ચકાસી શકે છે. સેન્ટ્રલ રેલવેનો હેતુ કન્સેશન અને પાસના દુરુપયોગને રોકવા, ટિકિટની વાસ્તવિકતા ચકાસવા, રિઝર્વેશનમાં ગેરરીતિ અટકાવવા અને રેલવેની આવકમાં થતી ખોટ ઘટાડવાનો છે.
