આર્સેલર મિત્તલ નિપ્પોન સ્ટીલ ઈન્ડિયા (AM/NS) કંપનીમાં થયેલી હિંસાની ઘટનાને પગલે હજીરા વિસ્તારમાં શુક્રવાર વહેલી સવારથી જ ભારે પોલીસ બંદોબસ્ત ગોઠવી દેવાયો છે. Larsen & Toubro (L&T)ના કોન્ટ્રેક્ટ કર્મચારીઓ દ્વારા થયેલા પથ્થરમારા અને તોડફોડ બાદ કોઈ અનિચ્છનીય ઘટના ન બને તે માટે પોલીસે સઘન કોમ્બિંગ શરૂ કર્યું છે. ઉચ્ચ અધિકારીઓના કાફલા સાથે હજીરાના તમામ ઔદ્યોગિક એકમોમાં સુરક્ષા વધારી દેવાઈ છે. પરિસ્થિતિને ધ્યાને લઈને સુરતમાં યોજાનારી મહત્વની પોલીસ કોન્ફરન્સ પણ રદ કરવામાં આવી છે.
L&Tના કર્મચારીઓ ફરી એકઠા થતા પોલીસની તાત્કાલિક કાર્યવાહી
AM/NSની ઘટનાના પડઘા શુક્રવારે સવારે પણ જોવા મળ્યા હતા. માહિતી મુજબ, અંદાજે 50થી વધુ L&Tના કોન્ટ્રેક્ટ કર્મચારીઓ ફરી એક યુનિટ પાસે એકઠા થયા હતા, પરંતુ પ્લાન્ટ પર પહેલેથી તહેનાત પોલીસ દળે તાત્કાલિક કાર્યવાહી કરીને ભીડને હટાવી સ્થિતિ પર કાબૂ મેળવી લીધો હતો.
ઓળખાયેલા આરોપીઓ સામે હત્યાના પ્રયાસની કલમ
હિંસામાં સામેલ અને ઓળખાયેલા શખ્સો સામે હત્યાના પ્રયાસ સહિતની ગંભીર કલમો હેઠળ કાર્યવાહી હાથ ધરાઈ છે.
ગેટ નં. 3 પાસે હજારો કર્મચારીઓનો જમાવડો
શુક્રવારે વહેલી સવારથી L&T પ્લાન્ટના ગેટ નંબર 3 પાસે મોટી સંખ્યામાં કોન્ટ્રેક્ટ કર્મચારીઓ એકત્ર થતા કામગીરી પર સીધી અસર પડી હતી. અંદરના ભાગમાં મોટી ભીડ એકઠી થતા પરિસ્થિતિ તંગ બની હતી.
વ્હોટ્સએપ અને ટેલિગ્રામ પર પોલીસની ‘ડિજિટલ’ નજર
પોલીસ તપાસમાં ખુલ્યું છે કે હિંસા પાછળ સોશિયલ મીડિયા ગ્રુપ્સની ભૂમિકા રહી છે. હરિયાણાના પાણીપતમાં થયેલા શ્રમિક આંદોલનના જૂના વીડિયો વ્હોટ્સએપ અને ટેલિગ્રામ ગ્રુપમાં વાયરલ કરીને કર્મચારીઓને ઉશ્કેરવામાં આવ્યા હતા. પોલીસને એવા મેસેજ પણ મળ્યા છે, જેમાં પોલીસને નિશાન બનાવવા અને હિંસા ભડકાવવાની વાત કરવામાં આવી હતી. આથી હવે સાયબર સેલની મદદથી ઇન્સ્ટાગ્રામ, ફેસબુક અને વ્હોટ્સએપ ગ્રુપ્સ પર કડક નજર રાખવામાં આવી રહી છે.
ગુજરાતના ફેક્ટરી વર્કરનું GDPમાં મોટું યોગદાન, છતાં વેતનમાં પાછળ
એન્યુઅલ સર્વે ઑફ ઇન્ડસ્ટ્રીઝ અનુસાર, *ગુજરાતની ફેક્ટરીઓ રાજ્યના જીડીપીમાં અંદાજે 3.24 લાખ કરોડ રૂપિયાનું યોગદાન આપે છે અને દેશભરમાં બીજા ક્રમે છે. એક ફેક્ટરી વર્કર સરેરાશ 11.71 લાખ રૂપિયાનું યોગદાન આપે છે. રાજ્યમાં કુલ 18.01 લાખ ફેક્ટરી વર્કર છે, જેમાંથી 6.64 લાખ લોકો કોન્ટ્રેક્ટ આધારિત છે. બીજી તરફ, અનઇન્કોર્પોરેટેડ સેક્ટરના સર્વે મુજબ ઇન્ફોર્મલ સેક્ટરમાં કામ કરતા વર્કરનું સરેરાશ માસિક વેતન આશરે 10 હજાર રૂપિયા છે, જે ઘણા રાજ્યોની સરખામણીએ ઓછું છે.
ભીડ કાબૂમાં લેવા 10 રાઉન્ડ ફાયરિંગ, સ્ટન ગ્રેનેડ અને ટીયર ગેસનો ઉપયોગ
AM/NS કંપનીના ગેટ પાસે સોશિયલ મીડિયા પર વાયરલ થયેલા પાયાવિહોણા વીડિયોના કારણે હજારો લોકોનું ટોળું એકઠું થયું હતું. ખોટા સંદેશોથી ઉશ્કેરાયેલી અંદાજે 4,000 લોકોની ભીડે પથ્થરમારો શરૂ કરતા સ્થિતિ બેકાબૂ બની હતી. પરિસ્થિતિ કાબૂમાં લેવા પોલીસે હવામાં 10 રાઉન્ડ ફાયરિંગ કર્યું હતું. ઉપરાંત ભીડ વિખેરવા માટે 6 સ્ટન ગ્રેનેડ અને 36 ટીયર ગેસ શેલ છોડવામાં આવ્યા હતા, ત્યારબાદ તોફાની તત્વોને વિખેરી શકાયા હતા.
