એશિયન ગેમ્સના હોકી મેદાન પર ભારત-પાકિસ્તાનની ટક્કર ફરી એકવાર શ્વાસ અટકાવી દે તેવી બની, પરંતુ અંતિમ ક્ષણે ભારતે બાજી મારી લીધી હતી. ત્રણ ગોલની લીડ બાદ મેચ 3-3થી બરાબરી પર પહોંચતા ભારત મુશ્કેલીમાં મુકાયું હતું, ત્યારે અભિષેકે અંતિમ ક્ષણોમાં ગોલ કરીને ભારતને 4-3થી રોમાંચક જીત અપાવી અને ફાઇનલમાં પહોંચાડી દીધું છે.
જાપાનના કાકામિગહારા સ્થિત ગીફુ પ્રિફેક્ચરલ ગ્રીન સ્ટેડિયમમાં રમાયેલી સેમિફાઇનલમાં ભારતે શરૂઆતથી જ આક્રમક રમત બતાવી હતી. કેપ્ટન હરમનપ્રીત સિંહે 5મી અને 13મી મિનિટે પેનલ્ટી કોર્નરને ગોલમાં ફેરવી ભારતને 2-0ની લીડ અપાવી હતી. ત્યારબાદ 23મી મિનિટે સુખજીત સિંહે ફીલ્ડ ગોલ કરીને ભારતની સરસાઈ 3-0 કરી હતી.
જોકે ત્યારબાદ પાકિસ્તાને જોરદાર વાપસી કરી અને અબુ મહમૂદે 30મી મિનિટે, હન્નાન શાહિદે 45મી મિનિટે અને રાણા વહીદે 49મી મિનિટે ગોલ કરીને સ્કોર 3-3 કરી દીધો હતો. ભારતની ત્રણ ગોલની લીડ અચાનક ગાયબ થતાં મેચનો રોમાંચ ચરમસીમાએ પહોંચ્યો હતો.
મેચ પૂરો થવામાં માત્ર 45 સેકન્ડ બાકી હતા ત્યારે અભિષેકે નિર્ણાયક ગોલ કર્યો હતો. તેના પ્રયાસને ડિફ્લેક્શન મળતાં બોલ પાકિસ્તાની ગોલમાં ગયો અને ભારતે 4-3થી જીત મેળવી.
હવે ભારત એશિયન ગેમ્સના ગોલ્ડ મેડલ માટે રમશે. ફાઇનલમાં તેનો સામનો દક્ષિણ કોરિયા અને મલેશિયા વચ્ચેની બીજી સેમિફાઇનલના વિજેતા સામે શનિવારે થશે.
