ભારતના તીરંદાજોએ એશિયન ગેમ્સ 2026માં ફરી એકવાર કમાલ કરી બતાવી છે. કમ્પાઉન્ડ મિક્સ્ડ ટીમ ઇવેન્ટમાં સાહિલ જાધવ અને ચિકિથા તનિપર્થીની જોડીએ દક્ષિણ કોરિયા સામે શ્વાસ અટકાવી દે તેવી ફાઈનલમાં જીત મેળવીને ગોલ્ડ મેડલ પોતાના નામે કર્યું છે. આ જીત માત્ર એશિયન ગેમ્સનું સોનું નથી, પરંતુ ભારત માટે લૉસ એન્જલસ 2028 ઓલિમ્પિક્સનું ક્વોટા સ્થાન પણ લઈને આવી છે.
ઓકાઝાકી ખાતે રમાયેલી ગોલ્ડ મેડલ મેચમાં ભારત અને દક્ષિણ કોરિયા વચ્ચે શરૂઆતથી જ જોરદાર ટક્કર જોવા મળી હતી. નિર્ધારિત ચાર એન્ડ બાદ બંને ટીમોના સ્કોર 157-157થી બરાબર રહ્યા હતા. ત્યારબાદ પરિણામ માટે શૂટ-ઓફ યોજાયો, જેમાં સાહિલ અને ચિકિથાએ દબાણ વચ્ચે શાનદાર નિશાન સાધતાં 20 પોઇન્ટ મેળવ્યા, જ્યારે કોરિયાની જોડી 19 પોઇન્ટ સુધી પહોંચી હતી. આ સાથે ભારતે 158-157ના અંતિમ પરિણામ સાથે ગોલ્ડ જીત્યું હતું.
આ પહેલાં ભારતીય જોડીએ સેમિફાઈનલમાં થાઈલેન્ડને 156-155થી હરાવીને ફાઈનલમાં જગ્યા બનાવી હતી. વર્લ્ડ આર્ચરીના જણાવ્યા પ્રમાણે ક્વૉલિફિકેશનમાં ચિકિથાએ 705 અને સાહિલે 709નો સ્કોર કરીને ભારતને 1414 પોઇન્ટ સાથે ટોચનું સ્થાન અપાવ્યું હતું.
ખાસ વાત એ છે કે કમ્પાઉન્ડ મિક્સ્ડ ટીમ ઇવેન્ટ LA 2028 ઓલિમ્પિક્સમાં પ્રથમ વખત સામેલ થશે, અને એશિયન ગેમ્સની આ જીતથી ભારતે તેમાં પોતાનું ક્વોટા સ્થાન સુરક્ષિત કર્યું છે.
