અમેરિકા જવાની ઘેલછામાં એજન્ટોની મીઠી વાતોમાં ફસાઈને ‘ડંકી રૂટ’ દ્વારા વિદેશ જવા નીકળેલા ઉત્તર ગુજરાતના ત્રણ યુવાનો માટે આ સફર એક ભયાનક ડરામણું સપનું બની ગઈ હતી. ઇથોપિયામાં અપહરણકારોના બાનમાં ફસાયેલા આ યુવાનોને મુક્ત કરવા માટે 1 કરોડ રૂપિયાની જંગી ખંડણીની માંગણી કરવામાં આવી હતી. પરંતુ, ભારતીય વિદેશ મંત્રાલય અને ગુજરાત પોલીસની દમદાર કૂટનીતિ તથા સમયસૂચકતાએ એવો કમાલ કર્યો કે અપહરણકારોએ એક પણ રૂપિયો લીધા વિના ત્રણેયને રાતોરાત મુક્ત કરવા પડ્યા! આજે ગુરુવારે આ યુવાનો પોતાના ઘરે સુરક્ષિત પહોંચતા પરિવારજનોની આંખોમાં હરખના આંસુ છલકાઈ ગયા હતા.
મહેસાણા અને ગાંધીનગર જિલ્લાના ઋત્વિક જનસારી, મમતા ચાવડા અને મયુરી ગત 20 સપ્ટેમ્બરના રોજ લાખો રૂપિયા ચૂકવીને એજન્ટો મારફતે અમેરિકા જવા રવાના થયા હતા. પરંતુ, ઇથોપિયા પહોંચતા જ તેઓનું અપહરણ કરવામાં આવ્યું હતું. જોકે, સરકારના સઘન પ્રયાસોથી ગુરુવારે વહેલી સવારે 3 વાગ્યે તેઓ મુંબઈ એરપોર્ટ પર સહીસલામત ઉતરી ચૂક્યા હતા. ત્યાંથી કાર મારફતે તેઓ સીધા જ વડસ્મા ગામે પોતાના ઘરે પહોંચ્યા હતા. ગામમાં પ્રવેશતા જ ભાવુક દ્રશ્યો સર્જાયા હતા; સૌથી પહેલા તેઓએ પોતાના ઘરે અને ત્યારબાદ ગામના સધી માતાના મંદિરે જઈને દર્શન કર્યા હતા. ઋત્વિકના ભાભીએ ત્રણેય યુવાનો હેમખેમ પાછા ન ફરે ત્યાં સુધી ગામનું પાણી ન પીવાની આકરી બાધા રાખી હતી, તેમજ ઘરે અખંડ દીવો પ્રજ્વલિત કર્યો હતો. આજે આ બાધા હર્ષોલ્લાસ સાથે પૂરી થઈ હતી.
આ સમગ્ર સફળ ઓપરેશનમાં મહેસાણા પોલીસ અને વિદેશ મંત્રાલય વચ્ચેનું સચોટ સંકલન ખૂબ નિર્ણાયક સાબિત થયું છે. મહેસાણાના એસપી હિમાંશુ સોલંકીના જણાવ્યા અનુસાર, ભારતીય તંત્રના અધિકારીઓએ અપહરણકારો સાથે સીધી વાતચીત કરી તેમની પર ભારે રાજદ્વારી દબાણ સર્જ્યું હતું. હવે, ગુજરાત પોલીસે યુવાનોના જીવ જોખમમાં મૂકનાર માનવ તસ્કરીની બોગસ સિન્ડિકેટ સામે લાલ આંખ કરી છે. લાંઘણજ પોલીસે વડોદરા અને મહેસાણાના સ્થાનિક એજન્ટો સામે કડક તપાસ શરૂ કરીને તેમનું નેટવર્ક તોડી પાડવાની કવાયત હાથ ધરી છે. આ ઘટના એવા તમામ લોકો માટે કડક ચેતવણી છે જેઓ એજન્ટોની લાલચમાં આવીને ગેરકાયદેસર રીતે વિદેશ જવાનું જોખમ ખેડે છે.
