વર્ગખંડમાં બાળકોને ભણાવવાના બદલે આખો દિવસ મોબાઇલ અને લેપટોપ સામે ડેટા અપલોડ કરવામાં જ પસાર થાય તો શિક્ષકની પ્રાથમિક જવાબદારી શું રહેશે? ગુજરાતની પ્રાથમિક શાળાઓમાં કામ કરતા શિક્ષકોમાં હાલ આવો સવાલ ઉઠી રહ્યો છે. વિવિધ પોર્ટલ, ઓનલાઈન એન્ટ્રી, તાલીમ અને અહેવાલોની વધતી કામગીરીને કારણે શિક્ષણ માટે મળતો સમય ઘટી રહ્યો હોવાની શિક્ષકોની ફરિયાદ છે.
શિક્ષકોના જણાવ્યા મુજબ, નવા શૈક્ષણિક સત્ર સાથે UDISE+, APAAR, દૈનિક ઓનલાઈન હાજરી, મધ્યાહન ભોજન, શિષ્યવૃત્તિ, બેઝલાઈન એસેસમેન્ટ સહિત અનેક ઓનલાઈન કામગીરી સોંપવામાં આવી છે. વિવિધ તાલીમો અને અન્ય વિભાગીય કામગીરી સહિત 22થી વધુ પોર્ટલ-એપ પર માહિતી અપડેટ કરવાની જવાબદારી શિક્ષકો પર આવી છે. APAARની સત્તાવાર માહિતી મુજબ વિદ્યાર્થીઓના શૈક્ષણિક રેકોર્ડ અને ઓળખ સંબંધિત વિગતોને UDISE+ સાથે જોડવામાં આવે છે અને શાળાની ભૂમિકા તેમાં મહત્વપૂર્ણ છે.
શિક્ષકોની રજૂઆત મુજબ CTS, UDISE+ વિદ્યાર્થી પ્રમોશન, સ્કૂલ પ્રોફાઇલ, PM-FCT, SQAAF, SHVR, KKM-2026, EP-GP, Inspire Award, APAAR, એક પેડમાં એક નામ, ગ્રામ્ય જ્ઞાનસેતુ, બેઝલાઈન એસેસમેન્ટ, ત્રિમાસિક કસોટી, નિપુણ ગુજરાત, નિષ્ઠા, Project Inclusion, Prashast, દૈનિક હાજરી, મધ્યાહન ભોજન અને Digital Gujarat શિષ્યવૃત્તિ જેવી કામગીરી સમયસર પૂર્ણ કરવાની સૂચનાઓ આપવામાં આવે છે.
આ કામગીરીમાં ઘણીવાર નિર્ધારિત સમયમર્યાદાનો દબાણ પણ રહેતું હોવાની શિક્ષકોની ફરિયાદ છે. સર્વર અથવા ઓનલાઈન સિસ્ટમમાં મુશ્કેલી ઊભી થાય ત્યારે વધારાનો સમય પણ ખર્ચાય છે. પરિણામે શિક્ષકોનો મોટો હિસ્સો વહીવટી અને બિનશૈક્ષણિક કામગીરીમાં જતો હોવાનો તેમનો દાવો છે.
શિક્ષક સંઘો દ્વારા ઓનલાઈન કામગીરી માટે અલગ ડેટા એન્ટ્રી ઓપરેટર અથવા ક્લાર્કની વ્યવસ્થા કરવાની માંગ ઉઠાવવામાં આવી રહી છે. શિક્ષકોનું કહેવું છે કે ડિજિટલ વ્યવસ્થાનો હેતુ કામગીરી સરળ બનાવવાનો હોવો જોઈએ, પરંતુ જો તેનો મોટો ભાર સીધો શિક્ષકો પર આવે તો વર્ગખંડમાં બાળકો સાથેનો શૈક્ષણિક સમય અસરગ્રસ્ત થઈ શકે છે.
