જે કંપનીના કિંમતી IT સાધનોની જવાબદારી હતી, એ જ કંપનીના લેપટોપ ચોરીને કોઈ વ્યક્તિ વર્ષો સુધી વેચતો રહે તો મામલો ચોંકાવનારો જ લાગે. હોંગકોંગમાં ડેલોઇટના પૂર્વ IT મેનેજર હો મન-કિટ સાથે આવું જ થયું હતું. તેણે 17 મહિનામાં કંપનીના 423 લેપટોપ ચોરી કરીને ઇલેક્ટ્રોનિક્સ રિસાયકલરને વેચ્યા અને તેમાંથી મળેલા 4.58 લાખથી વધુ હોંગકોંગ ડોલર, એટલે લગભગ ₹55 લાખ, શેર ટ્રેડિંગમાં લગાવી દીધા હતા. જોકે આખી રકમ પણ ગુમાવી દીધી હતી. હવે કોર્ટએ તેને 22 મહિનાની જેલની સજા ફટકારી છે.
હો મન-કિટ, 40, ડેલોઇટના હોંગકોંગ સ્થિત IT વિભાગમાં મેનેજર તરીકે કામ કરતો હતો. સપ્ટેમ્બર 2021થી ફેબ્રુઆરી 2023 વચ્ચે તેણે કંપનીના Lenovo લેપટોપ ગેરકાયદેસર રીતે બહાર કાઢીને રિસાયકલરને વેચ્યા હતા. 13 ફેબ્રુઆરી 2023ના રોજ કંપનીના IT એન્જિનિયરે સ્ટોક તપાસતાં 399 લેપટોપ ઓછા હોવાનું જાણવા મળ્યું હતું. CCTV તપાસમાં હોને સ્ટોરેજ રૂમમાંથી કમ્પ્યુટરનાં બોક્સ બહાર લઈ જતાં જોવામાં આવ્યો હતો. ત્યારબાદની તપાસમાં કુલ 423 લેપટોપની ચોરી સામે આવી હતી.
કોર્ટમાં જાણવા મળ્યું કે ચોરાયેલા લેપટોપની કિંમત આશરે 12 લાખ હોંગકોંગ ડોલર હતી. બેન્ક રેકોર્ડ મુજબ હોને વેચાણમાંથી 4.58 લાખથી વધુ હોંગકોંગ ડોલર મળ્યા હતા. તેણે આ રકમ સ્ટોક ટ્રેડિંગમાં વાપરી, પરંતુ ટ્રેડિંગમાં મોટું નુકસાન થતાં સમગ્ર રકમ ગુમાવી દીધી અને દેવામાં ફસાયો હતો.
આ મામલો બહાર આવ્યા બાદ હોને પોતાની ભૂલ સ્વીકારી અને પોલીસ સમક્ષ આત્મસમર્પણ કર્યું હતું. બચાવ પક્ષે કોર્ટમાં તેના માનસિક અને પારિવારિક તણાવનો પણ ઉલ્લેખ કર્યો હતો. જોકે જજે કહ્યું કે તેણે લાંબા સમય સુધી પોતાના નોકરીદાતાના વિશ્વાસનો દુરુપયોગ કર્યો હતો. અંતે હાલમાં હોંગકોંગની ડિસ્ટ્રિક્ટ કોર્ટે તેને 22 મહિનાની જેલની સજા સંભળાવી હતી.
