ગુજરાતમાં મોડે મોડે પણ મેઘરાજાએ ધમાકેદાર એન્ટ્રી કરી છે. સૌરાષ્ટ્ર અને દક્ષિણ ગુજરાતના અમુક જિલ્લામાં પડેલા અનરાધાર વરસાદે પાણી પાણી કરી નાખ્યું છે. હાલ રાજ્ય પણ પાંચ સિસ્ટમ સર્જાય છે અને તેના કારણે પડી રહેલા વરસાદમાં સિસ્ટમની પોલ છતી થઈ ગઈ છે. કારણ કે આ પહેલા જ વરસાદમાં ડાયમંડ સિટી સુરતમાં રસ્તાઓની હાલત એટલી કથળી ગઈ કે તંત્રની કામગીરી પર અનેક પ્રશ્નો ઊભા થઈ ગયા છે.
મળતી વિગતો અનુસાર, સુરત સીટીમાં આજે વહેલી સવારથી વરસાદ પડી રહ્યો છે. પહેલા જ વરસાદમાં સુરત મનપાની પ્રી મોન્સૂન એક્ટિવિટી સામે પ્રશ્નો ઊભા થયા હતા. કારણ કે શહેરના અનેક માર્ગો પર ખાડાઓનું સામ્રાજ્ય ખડું થઈ ગયું છે. શહેરના રસ્તાઓ પર અંદાજે 300 જેટલા ખાડાઓ પડ્યા હોવાની માહિતી મળી રહી છે. તો આ સાથે જ શહેરના 24 જેટલા રોડ બેસી ગયા હોવાના પણ અહેવાલ છે. રસ્તાઓની કથળી ગયેલી હાલતની સીધી અસર ટ્રાફિક પર જોવા મળી રહી છે અને વાહન ચાલકોને હેરાન થવાની નોબત આવી છે.
આજે રાજ્યના અનેક જિલ્લામાં વરસાદની આગાહી કરવામાં આવી છે. ત્યારે 1 વાગ્યા સુધીમાં રાજ્યના 8 જિલ્લામાં રેડ એલર્ટ નાઉકાસ્ટ જાહેર કરવામાં આવ્યું છે. જેમાં વલસાડ, નવસારી, ડાંગ, સુરત તેમજ ભાવનગર, અમરેલી, ગીર સોમનાથ અને જૂનાગઢ જિલ્લાનો સમાવેશ થાય છે.
ઉલ્લેખનીય છે કે હવામાન વિભાગે આજે રાજ્યમાં સાર્વત્રિક વરસાદની આગાહી કરી છે. સૌરાષ્ટ્રના ભાવનગર, ગીર સોમનાથ, જૂનાગઢ અને પોરબંદર જિલ્લામાં તેમજ દક્ષિણ ગુજરાતમાં વલસાડ, નવસારી, ડાંગ, સુરતમાં અતિભારે વરસાદની આગાહી હોઇ રેડ એલર્ટ જાહેર કરવામાં આવ્યું છે. જ્યારે ડાંગ, તાપી, નર્મદા,છોટા ઉદેપુર, વડોદરા, અમરેલી અને રાજકોટ જિલ્લામાં ભારે વરસાદની આગાહી છે.
સ્ટેટ ઈમરજન્સી ઓપરેશન સેન્ટર, ગાંધીનગર મુજબ આજે સવારે 6 કલાકે પૂરા થયેલા 24 કલાકમાં રાજ્યના 172 તાલુકામાં વરસાદ વરસ્યો છે. બે તાલુકામાં 12 ઇંચથી વધારે, બે તાલુકામાં 10 ઇંચથી વધારે, બે તાલુકામાં 9 ઇંચથી વધારે, એક તાલુકામાં 8 ઇંચથી વધારે, એક તાલુકામાં 7 ઇંચથી વધારે, બે તાલુકામાં 5 ઇંચથી વધારે, એક તાલુકામાં 4 ઇંચથી વધારે, 8 તાલુકામાં 3 ઇંચથી વધારે, 12 તાલુકામાં 2 ઇંચથી વધારે, 36 તાલુકામાં 1 ઇંચથી વધારે તથા 100 તાલુકામાં એક ઇંચથી ઓછો વરસાદ નોંધાયો હતો.
