ગુજરાતમાં ચોમાસાએ હવે જોર પકડતાં રાજ્યના અનેક જિલ્લાઓમાં મેઘરાજાએ ધમાકેદાર બેટિંગ શરૂ કરી છે. છેલ્લા 24 કલાક દરમિયાન રાજ્યના 107 તાલુકાઓમાં નોંધપાત્ર વરસાદ વરસતા લોકોને કાળઝાળ ગરમીમાંથી રાહત મળી છે. જોકે ભારે વરસાદ સાથે અનેક જગ્યાએ રસ્તા ધસી પડવા, ભૂવા પડવા અને પાણી ભરાવાની ઘટનાઓ પણ સામે આવી રહી છે.
સુરતમાં પ્રી-મોન્સૂન કામગીરીની પોલ ખુલી
દર વર્ષે પ્રી-મોન્સૂન કામગીરી પાછળ કરોડો રૂપિયાનો ખર્ચ કરવાનો દાવો કરતી સુરત મહાનગરપાલિકાની કામગીરી પર પ્રથમ જ વરસાદે સવાલો ઊભા કર્યા છે. શહેરના અનેક વિસ્તારોમાં પાણી ભરાયા, રસ્તાઓ બેસી ગયા અને હવે ખાડી સફાઈ માટે ઉતારવામાં આવેલી ભારે ક્રેન જ ખાડીમાં ફસાઈ જતાં પાલિકાની કામગીરી સામે લોકોમાં ભારે રોષ જોવા મળી રહ્યો છે. સ્થાનિકોના જણાવ્યા મુજબ ઘટના બાદ લાંબા સમય સુધી કોઈ જવાબદાર અધિકારી સ્થળ પર પહોંચ્યો ન હતો.
ડિંડોલીમાં 40 મીટર રસ્તો ધસી પડ્યો, ટ્રક ફસાયો
સુરતના ડિંડોલી જી-9 સર્કલ નજીક અચાનક આશરે 40 મીટર જેટલો રસ્તો ધસી પડતાં મોટો ભૂવો સર્જાયો હતો. આ દરમિયાન ત્યાંથી પસાર થઈ રહેલો ભારે ટ્રક ખાડામાં ફસાઈ ગયો હતો. ટ્રકનું ટાયર અને આગળનો ભાગ રસ્તામાં ધસી જતાં ચાર રસ્તા પર ભારે ટ્રાફિક જામ સર્જાયો હતો. ઘટનાની જાણ થતાં ડેપ્યુટી મેયર સુધાકર ચૌધરી સ્થળ પર પહોંચ્યા હતા. તેમણે જવાબદાર અધિકારીઓ અને એજન્સીઓ સામે કાર્યવાહી કરવાની ખાતરી આપી હતી.
અનેક જિલ્લાઓમાં રેડ અને ઓરેન્જ એલર્ટ
હવામાન વિભાગે પોરબંદર, જૂનાગઢ, ગીર સોમનાથ, અમરેલી, ભાવનગર, ભરૂચ અને સુરત જિલ્લામાં આગામી કલાકો માટે અતિભારે વરસાદનું રેડ એલર્ટ જાહેર કર્યું છે. જ્યારે દેવભૂમિ દ્વારકા, જામનગર, બોટાદ, અમદાવાદ, આણંદ, વડોદરા, છોટાઉદેપુર, નર્મદા, તાપી, નવસારી અને વલસાડ જિલ્લામાં ઓરેન્જ એલર્ટ જાહેર કરવામાં આવ્યું છે.
વ્યારામાં ગરનાળામાં પાણી ભરાતા વાહનવ્યવહાર પ્રભાવિત
તાપી જિલ્લાના વ્યારામાં રાત્રિ દરમિયાન પડેલા ભારે વરસાદને કારણે રેલવે ગરનાળામાં આશરે એક ફૂટ જેટલું પાણી ભરાઈ ગયું હતું. જેના કારણે વાહનચાલકોને ભારે મુશ્કેલીનો સામનો કરવો પડ્યો હતો અને કેટલાક સમય માટે અવરજવર પણ પ્રભાવિત થઈ હતી.
દક્ષિણ ગુજરાતમાં સૌથી વધુ વરસાદની આગાહી
હવામાન વિભાગના જણાવ્યા અનુસાર આગામી દિવસોમાં દક્ષિણ ગુજરાતમાં ભારે થી અતિભારે વરસાદની સંભાવના છે. સુરત, નવસારી, વલસાડ, ડાંગ, દમણ તેમજ દાદરા અને નગર હવેલીમાં રેડ એલર્ટ જાહેર કરવામાં આવ્યું છે. જ્યારે ભરૂચ, નર્મદા, તાપી, અમરેલી અને ભાવનગરમાં ઓરેન્જ એલર્ટ જાહેર કરાયું છે. રાજકોટ, જૂનાગઢ, ગીર સોમનાથ, વડોદરા, છોટાઉદેપુર સહિતના વિસ્તારોમાં યલો એલર્ટ સાથે ભારે વરસાદની શક્યતા વ્યક્ત કરવામાં આવી છે.
આગામી ત્રણ દિવસ ભારે વરસાદની શક્યતા
હવામાન વિભાગે જણાવ્યું છે કે રાજ્યમાં અપર એર સાયક્લોનિક સર્ક્યુલેશન, વેસ્ટર્ન ડિસ્ટર્બન્સ અને લો-પ્રેશર સિસ્ટમ સક્રિય હોવાથી આગામી ત્રણ દિવસ સુધી વરસાદનું જોર યથાવત રહેશે. આ સમયગાળા દરમિયાન મહત્તમ તાપમાનમાં 2થી 4 ડિગ્રી સેલ્સિયસ સુધીનો ઘટાડો થવાની પણ શક્યતા છે. અમદાવાદ સહિત રાજ્યના અનેક શહેરોમાં વાદળછાયું વાતાવરણ અને ગાજવીજ સાથે વરસાદી ઝાપટાં પડવાની આગાહી કરવામાં આવી છે.
