કતાર ખાતે આવેલ ગેસ પ્લાન્ટમાં ભીષણ વિસ્ફોટને પગલે શહેરનાં ભીમપોર ખાતે રહેતા યુવક સની પટેલનું મોત નિપજયું હતું. સની પટેલનો મૃતદેહ આજે વહેલી સવારે ભીમપોર પહોંચતાં ભારે હૈયે તેના અંતિમ સંસ્કાર યોજવામાં આવ્યા હતા. ભીમપોર અને આસપાસનાં ગ્રામજનો સહિત મોટી સંખ્યામાં લોકો યુવકની અંતિમ યાત્રામાં જોડાતા હૃદયદ્રાવક દ્રશ્યો જોવા મળ્યા હતા. બીજી તરફ જુવાનજોધ પુત્રનાં મોતને પગલે પરિવારજનો ભારે આક્રંદ કરતાં નજરે પડ્યા હતા.
થોડા દિવસો પૂર્વે કતાર ખાતે ગેસ પ્લાન્ટમાં ભીષણ વિસ્ફોટની ઘટનાને પગલે ભીમપોર ખાતે મોટા મહોલ્લામાં રહેતા સની પટેલ ગુમ થયો હોવાનું પરિવારજનોને જાણવા મળ્યું હતું. બીજી તરફ કતારમાં જ રહેતા સનીનાં ભાઈ રવિ પટેલે પણ શોધખોળ હાથ ધરી હતી. પ્લાન્ટમાં વિસ્ફોટ બાદ હાથ ધરવામાં આવેલ સર્ચ ઓપરેશનમાં સની પટેલનો મૃતદેહ મળી આવતાં પરિવારજનોનાં માથે આભ ફાટી પડ્યું હતું.
ભારતીય દુતાવાસનો સંપર્ક કરીને પરિવારજનો દ્વારા સની પટેલનાં મૃતદેહને વતન પહોંચાડવા માટેની તજવીજ હાથ ધરવામાં આવી હતી. જેને પગલે આજે સવારે અમદાવાર એરપોર્ટ પર સની પટેલનો મૃતદેહ પહોંચ્યા બાદ ત્યાંથી ભીમપોર ખાતે મૃતદેહને લાવવામાં આવ્યો હતો. જ્યારે સનીનો પાર્થિવ દેહ તેના ઘર આંગણે પહોંચ્યો ત્યારે ત્યાં હૃદયદ્રાવક દ્રશ્યો સર્જાયા હતા. પરિવારની સ્થિતિ અત્યંત દયનીય અને ખરાબ જોવા મળી હતી.
સનીની માતા અને પત્ની પોતાના વહાલસોયાને ગુમાવી બેસવાના આઘાતમાં અચેત થઈ રહ્યા હતા અને સતત રડી રહ્યા હતા. પત્રીના કરુણ આક્રંદ અને માતાની ચીસો સાંભળીને આખું ગામ હિબકે ચડ્યું હતું. ઘરના આંગણે હજારોની મેદની જમા થઈ ગઈ હતી, પરંતુ કોઈની પાસે આ દુ:ખી પરિવારને આપવા માટે સાંત્વનાના શબ્દો નહોતા. સનીના અકાળે અવસાનથી આખા પરિવાર પર જાણે દુઃખનો પહાડ તૂટી પડ્યો હોય તેવી સ્થિતિ સર્જાઈ છે.
