સુરતના સરથાણા વિસ્તારમાં આવેલા બાપા સીતારામ ચોક નજીકની સીમાડા સિલ્વર બિઝનેસ હબ સ્થિત લા મરીના હોટેલમાં એક હૃદયદ્રાવક ઘટના સામે આવી છે. હોટેલના એક રૂમમાં રોકાયેલા દંપતીએ ઝેરી દવા પી આપઘાત કરવાનો પ્રયાસ કરતાં સમગ્ર વિસ્તારમાં ચકચાર મચી ગઈ છે. ઘટનામાં પત્નીનું મોત નીપજ્યું છે, જ્યારે પતિ ગંભીર હાલતમાં સારવાર હેઠળ હોવાનું જાણવા મળ્યું છે.
હોટેલના રૂમમાં ઝેરી દવા પીતા દોડધામ મચી
પ્રાપ્ત માહિતી અનુસાર, દંપતીએ હોટેલના રૂમમાં ઝેરી દવા પી લીધી હતી. ઘટનાની જાણ થતાં જ હોટેલ સ્ટાફ રૂમ સુધી પહોંચ્યો હતો, જ્યાં બંને બેભાન હાલતમાં મળી આવ્યા હતા. તાત્કાલિક બંનેને હોસ્પિટલ ખસેડવામાં આવ્યા હતા, પરંતુ ફરજ પરના ડોક્ટરોએ પત્નીને મૃત જાહેર કરી હતી. જ્યારે પતિને ગંભીર હાલતમાં ખાનગી હોસ્પિટલમાં દાખલ કરવામાં આવ્યો છે, જ્યાં તેની સઘન સારવાર ચાલી રહી છે.
સરથાણા પોલીસનો કાફલો ઘટનાસ્થળે દોડી ગયો
ઘટનાની જાણ થતાં જ સરથાણા પોલીસ સ્ટેશનનો કાફલો તાત્કાલિક લા મરીના હોટેલ ખાતે પહોંચી ગયો હતો. પોલીસે હોટેલના રૂમને કબજામાં લઈ તપાસ શરૂ કરી છે. ઉપરાંત એફએસએલ (FSL)ની ટીમને પણ સ્થળ પર બોલાવી જરૂરી વૈજ્ઞાનિક પુરાવા એકત્ર કરવાની કાર્યવાહી હાથ ધરવામાં આવી છે.
આપઘાત પાછળનું કારણ હજુ અકબંધ
પોલીસની પ્રાથમિક તપાસમાં દંપતીએ આ પગલું કયા કારણોસર ભર્યું તે હજુ સુધી સ્પષ્ટ થઈ શક્યું નથી. દંપતી ક્યાંના રહેવાસી હતા, હોટેલમાં ક્યારે રોકાયા હતા અને તેમની હિલચાલ અંગે માહિતી મેળવવા હોટેલના રજિસ્ટર તેમજ CCTV ફૂટેજની તપાસ કરવામાં આવી રહી છે. પારિવારિક વિવાદ, આર્થિક સંકટ કે અન્ય કોઈ કારણ જવાબદાર છે કે કેમ તે દિશામાં પણ તપાસ ચાલી રહી છે.
પતિના નિવેદન બાદ થશે ખુલાસો
પોલીસના જણાવ્યા અનુસાર, હાલ પતિની સ્થિતિ ગંભીર હોવાથી તેનું નિવેદન લઈ શકાયું નથી. તે ભાનમાં આવ્યા બાદ સમગ્ર ઘટનાક્રમ અંગે વધુ માહિતી મળી શકે છે. હાલ પોલીસે અકસ્માતે મોતનો ગુનો નોંધી કાયદેસરની કાર્યવાહી શરૂ કરી છે અને પરિવારજનોની પૂછપરછ પણ હાથ ધરી છે.
