રાજકોટ જિલ્લાના ઉપલેટામાં આવેલી એક સરકારી પ્રાથમિક શાળામાં અભ્યાસ કરતી સિનિયર કે.જી.ની પાંચ વિદ્યાર્થીનીઓ સાથે 55 વર્ષીય શિક્ષક દ્વારા કથિત રીતે શારીરિક અડપલાં અને યૌન શોષણ કરવામાં આવ્યું હોવાનો ગંભીર મામલો સામે આવ્યો છે. ફરિયાદ નોંધાતા પાટણવાવ પોલીસે આરોપી શિક્ષક દેવાણંદ બેરાની ધરપકડ કરી છે.
નાની ઉંમર અને નિર્દોષતાનો લાભ લઈ કરતો અડપલાં
પ્રાપ્ત માહિતી મુજબ, આરોપી શિક્ષક દેવાણંદ બેરાએ 28 જૂન 2025થી 2 મે 2026 દરમિયાન શાળાના વર્ગખંડમાં અભ્યાસ કરતી નાની બાળકીઓ સાથે અયોગ્ય શારીરિક વર્તન કર્યું હતું. આરોપીએ વિદ્યાર્થીનીઓની નાની ઉંમર અને નિર્દોષતાનો લાભ લઈ તેમની સાથે અડપલાં કર્યા હોવાનું તેમજ કેટલાક કિસ્સાઓમાં ગંભીર પ્રકારના યૌન શોષણના આક્ષેપો પણ સામે આવ્યા છે.
વિદ્યાર્થીનીએ માતા-પિતાને કરી જાણ
મામલો ત્યારે પ્રકાશમાં આવ્યો જ્યારે એક વિદ્યાર્થીનીએ પોતાના માતા-પિતાને ‘બેડ ટચ’ અંગે જાણ કરી હતી. ત્યારબાદ વાલીઓએ અન્ય વિદ્યાર્થીનીઓ સાથે વાતચીત કરતાં વધુ ચાર બાળકીઓ પણ આ ઘટનાનો ભોગ બની હોવાનું બહાર આવ્યું હતું. ઘટનાની જાણ થતાં જ વાલીઓ અને સ્થાનિક લોકોમાં ભારે રોષ ફેલાયો હતો.
આરોપીની કરાઈ ધરપકડ
એક વિદ્યાર્થીનીની 32 વર્ષીય માતાએ 8 જૂન, 2026ના રોજ રાજકોટ ગ્રામ્યના પાટણવાવ પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે ભારતીય ન્યાય સંહિતાની કલમ 75(2), 351(2), 64(2) તેમજ પોક્સો એક્ટની કલમ 6, 8 અને 10 હેઠળ ગુનો નોંધી કાર્યવાહી હાથ ધરી હતી. ત્યારબાદ 9 જૂને આરોપી શિક્ષક દેવાણંદ બેરાની ધરપકડ કરવામાં આવી હતી.
પોલીસ સમગ્ર મામલે વધુ તપાસ કરી રહી છે અને અન્ય કોઈ વિદ્યાર્થી આ ઘટનાનો ભોગ બન્યો છે કે કેમ તે દિશામાં પણ તપાસ શરૂ કરવામાં આવી છે.
