દારૂબંધીની અસરકારકતા અંગે સવાલ ઉઠાવતા સુપ્રીમ કોર્ટે તેના અમલ સાથે જોડાયેલા પાંચ મોટા નુકસાન તરફ ધ્યાન દોર્યું છે. કોર્ટે ખાસ કરીને સરકારી આવકમાં ઘટાડો, દારૂબંધીના અમલ પાછળ થતો મોટો ખર્ચ, પોલીસ તંત્રમાં ભ્રષ્ટાચાર, ગેરકાયદે દારૂના વેપાર અને ડ્રગ્સના વધતા જોખમનો ઉલ્લેખ કર્યો હતો.
જસ્ટિસ જે.બી. પારડીવાલા અને કે. વિનોદ ચંદ્રનની બેન્ચે મહારાષ્ટ્ર પોઈઝન રૂલ્સના નિયમ 18A અને 18B રદ કરતી વખતે આ ટિપ્પણીઓ કરી હતી. આ નિયમો હેઠળ મેથનોલની ખરીદી અને તેના વેચાણ પહેલાં તેમાં કડવો પદાર્થ તથા રંગ ઉમેરવાની જોગવાઈ હતી.
કોર્ટે કહ્યું કે સંપૂર્ણ દારૂબંધી ઘણી વખત દારૂના વેપારને ગેરકાયદેસર બનાવી દે છે, જેના કારણે અનિયંત્રિત અને ઝેરી દારૂનું ચલણ વધી શકે છે. કોર્ટે ગુજરાતના ભાવનગર અને મધ્યપ્રદેશના સાગરમાં થયેલી ઝેરી દારૂની ઘટનાઓનો પણ ઉલ્લેખ કર્યો હતો.
ગુજરાતમાં કડક દારૂબંધી હોવા છતાં રાજ્યમાં સમયાંતરે ઝેરી દારૂની મોટી દુર્ઘટનાઓ સામે આવી છે. કોર્ટે આવી ઘટનાઓને તંત્ર માટે ચેતવણી ગણાવી હતી.
મહારાષ્ટ્ર સરકારની દલીલો અંગે કોર્ટે કહ્યું કે નિયમો પાછળ સરકારનો હેતુ સારો હોવા છતાં માત્ર સારા ઈરાદાથી કોઈ નિયમને કાયદાકીય રીતે યોગ્ય ઠેરવી શકાય નહીં. સરકારે એ પણ સ્પષ્ટ કરી શક્યું નહોતું કે મેથનોલમાં ચોક્કસ પદાર્થો ઉમેરવાથી ઝેરી દારૂના કારણે થતા મોતને કેવી રીતે અટકાવી શકાય.
