પુણેના સ્વારગેટ એસટી બસ સ્ટેન્ડ પરથી એક દુઃખદ અને ચોકાવનારી ઘટના સામે આવી છે. બુધવારે વહેલી સવારે અહીં રાજ્ય સરકારની શિવશાહી બસની અંદર 26 વર્ષીય મહિલા પર બળાત્કાર ગુજારવામાં આવ્યો હતો. સ્વારગેટ પોલીસ આ કેસની તપાસ કરી રહી છે. શંકાસ્પદ વ્યક્તિ, જેની ઓળખ દત્તાત્રેય રામદાસ ગાડે તરીકે થઈ છે, આશરે 35 વર્ષનો અને શિકરાપુરનો રહેવાસી છે, તેની સામે અગાઉ લૂંટના બે ગુના પણ નોંધાયેલા છે.
પોલીસે જણાવ્યું કે, ‘પૂણેમાં પાર્ક કરેલી રાજ્ય પરિવહન બસમાં 26 વર્ષીય મહિલા પર થયેલા કથિત દુષ્કર્મની ઘટના અંગે રાષ્ટ્રીય મહિલા આયોગએ સ્વતઃ નોંધ લીધી છે અને મહારાષ્ટ્ર અધિકારીઓ પાસે આ કેસમાં તાત્કાલિક કાર્યવાહી કરવાની માંગ કરી છે.’ એક અધિકારીએ જણાવ્યું કે, NCWના અધ્યક્ષ વિજયા રહાટકરે મહારાષ્ટ્ર રાજ્ય માર્ગ પરિવહન નિગમના સ્વારગેટ બસ સ્ટેન્ડ પર મંગળવારે સવારે ઘટેલી ઘટનાના સબંધમાં પોલીસ મહાનિર્દેશકને પત્ર લખ્યો છે.
દુષ્કર્મની ગટના બાદ અધિકારીઓએ તરત જ સ્વારગેટ બસ ડેપોમાં સુરક્ષામાં ચૂક મામલે કાર્યવાહી શરૂ કરી દીધી. પરિવહન મંત્રી પ્રતાપ સરનાઈકે બસ સ્ટેન્ડ પર તહેનાત 23 સુરક્ષા ગાર્ડ્સને તાત્કાલિક સસ્પેન્ડ કરવાનો આદેશ આપ્યો છે. આ સાથે જ નવા સુરક્ષા કર્મચારીઓને ગુરુવારથી ડ્યૂટી સંભાળવાનો નિર્દેશ આપ્યો છે.
પ્રતિક્રિયામાં, કાયદા અમલીકરણ અધિકારીઓએ તાત્કાલિક બસ સ્ટેન્ડ પરથી સીસીટીવી ફૂટેજની સમીક્ષા કરી, જેના કારણે શંકાસ્પદ વ્યક્તિની ઓળખ થઈ હતી. ગાડેને શોધવા અને પકડવા માટે આઠ પોલીસ ટીમો તહેનાત કરવામાં આવી છે. આ ઘટનાથી પુણેના રહેવાસીઓમાં રોષ ફેલાયો છે, જેના કારણે જાહેર પરિવહન કેન્દ્રોમાં સુરક્ષા અંગે ચિંતા વ્યક્ત કરવામાં આવી છે. શહેરના વ્યસ્ત પરિવહન પોઈન્ટ, સ્વારગેટ બસ ડેપો પર દિવસભર ભીડ રહે છે. શિક્ષણ અને રોજગાર માટે મુસાફરી કરતી મહિલાઓ, ખાસ કરીને જાહેર સ્થળે આવો ગુનો થઈ શકે છે તે અંગે આઘાત વ્યક્ત કર્યો હતો.
