ઉત્તર પ્રદેશના સીતાપુરથી સંબંધોને લઈને એક એવો કિસ્સો સામે આવ્યો છે, જેણે સ્થાનિક સ્તરે જ નહીં પરંતુ સોશિયલ મીડિયા પર પણ ચર્ચા જગાવી છે. મહમૂદાબાદમાં એક મહિલાએ પોલીસ સમક્ષ એવી ઈચ્છા વ્યક્ત કરી કે તે પોતાના પતિ અને પ્રેમી બંને સાથે એક જ છત નીચે રહેવા માંગે છે. આશ્ચર્યની વાત એ છે કે મહિલાના પતિએ પણ બંનેનો સાથ છોડવાનો ઇનકાર કર્યો હોવાનું અહેવાલોમાં સામે આવ્યું છે.
માહિતી મુજબ, મહમૂદાબાદ વિસ્તારમાં રહેતા શુભમ વર્મા, તેની પત્ની અંજુ અને નીતિન વિશ્વકર્મા વચ્ચેના સંબંધોને લઈને પરિવારજનોમાં વિવાદ ચાલી રહ્યો હતો. મામલો વધ્યા બાદ ત્રણેય શુક્રવારે મોડી સાંજે મહમૂદાબાદ પોલીસ સ્ટેશન પહોંચ્યા હતા. અહીં પોલીસે અલગ-અલગ તથા સાથે મળીને ત્રણેય સાથે વાતચીત કરી અને પરસ્પર સમજૂતી દ્વારા મામલો ઉકેલવાનો પ્રયાસ કર્યો હતો. જોકે, લાંબી સમજાવટ છતાં કોઈ અંતિમ સહમતી બની શકી નહોતી.
અહેવાલો અનુસાર, અંજુ પોતાના પતિ તેમજ નીતિન બંને સાથે રહેવા પર અડગ છે. શુભમનું પણ કહેવું છે કે તે પત્ની અને નીતિન બંનેથી સંબંધ તોડવા તૈયાર નથી અને જરૂર પડે તો ઘર છોડીને પણ રહેવા તૈયાર છે. દંપતીને બે બાળકો હોવાનું પણ સામે આવ્યું છે.
મળતી માહિતી પ્રમાણે, નીતિન અગાઉ શુભમના ઘરે આવતો-જતો અને ક્યારેક ત્યાં રોકાતો પણ હતો. શુભમ તેને પોતાનો ભાઈ ગણાવતો હતો. બાદમાં અંજુ અને નીતિનના સંબંધોને લઈને પરિવારમા વિવાદ શરૂ થયો હતો. હાલ પોલીસ દ્વારા મામલો શાંતિપૂર્ણ રીતે ઉકેલવાનો પ્રયાસ કરવામાં આવી રહ્યો છે.
