ઉત્તર પ્રદેશના મઉ જિલ્લામાં સરયૂ નદીના કિનારે આવેલા સ્મશાનઘાટ પાસે વડાપ્રધાન નરેન્દ્ર મોદીની તસવીર સાથે કથિત તાંત્રિક વિધિ કરવામાં આવી હોવાની ઘટના સામે આવી છે. તસવીરની આસપાસ નાળિયેર, લીંબુ, સિંદૂર અને લાલ દોરા જેવી સામગ્રી જોવા મળતાં સ્થાનિક વિસ્તારમાં ચર્ચા શરૂ થઈ છે. ઘટનાનો વીડિયો સોશિયલ મીડિયા પર વાયરલ થયા બાદ પોલીસે અજાણ્યા વ્યક્તિ સામે ગુનો નોંધી તપાસ શરૂ કરી છે.
તસવીરની આસપાસ મળી શંકાસ્પદ સામગ્રી
મળતી માહિતી મુજબ, મઉ જિલ્લાના દોહરીઘાટ વિસ્તારમાં આવેલા મુક્તિધામ સ્મશાનઘાટ નજીક સરયૂ નદીના કિનારે વડાપ્રધાન મોદીની તસવીર જમીન પર મૂકવામાં આવી હતી. તસવીરની આસપાસ નાળિયેર, લીંબુ, ભગવા રંગનો પાવડર, સિંદૂર અને લાલ દોરા જેવી સામગ્રી રાખવામાં આવી હોવાનું વાયરલ વીડિયો અને અહેવાલોમાં જણાવાયું છે. આ ઘટનાને કથિત તાંત્રિક વિધિ સાથે જોડવામાં આવી રહી છે.
વીડિયો વાયરલ થતાં પોલીસ હરકતમાં
સોશિયલ મીડિયા પર વીડિયો વાયરલ થયા બાદ પોલીસે મામલાની ગંભીરતાને ધ્યાનમાં રાખીને અજાણ્યા વ્યક્તિ સામે ફરિયાદ નોંધી છે. ઘોસીના સર્કલ ઓફિસર સત્યેન્દ્ર ભૂષણ તિવારીના જણાવ્યા અનુસાર, પોલીસ ઘટનાસ્થળના પુરાવા એકત્રિત કરી રહી છે. સાથે જ સાયબર સેલની મદદથી વીડિયોનો સ્ત્રોત શોધવામાં આવી રહ્યો છે.
CCTV ફૂટેજની પણ તપાસ
ઘટનામાં કોણ સામેલ છે, વડાપ્રધાનની તસવીર અને શંકાસ્પદ સામગ્રી ત્યાં કોણે મૂકી હતી તેમજ વીડિયો સોશિયલ મીડિયા પર વાયરલ કરવા પાછળ શું હેતુ હતો, તે જાણવા પોલીસ CCTV ફૂટેજ અને અન્ય ઇલેક્ટ્રોનિક પુરાવાઓની તપાસ કરી રહી છે. હાલમાં આ કૃત્ય પાછળનું કારણ સ્પષ્ટ થયું નથી. પોલીસ તપાસ પૂર્ણ થયા બાદ જ સમગ્ર ઘટનાની હકીકત સામે આવશે.
