અમેરિકામાં વોટર ફ્રોડના પુરાવા આપનારને 10 લાખ ડૉલરનું ઇનામ આપવાની ટ્રમ્પની જાહેરાત
અમેરિકામાં 3 નવેમ્બરે યોજાનારી મિડટર્મ ચૂંટણી પહેલાં રાષ્ટ્રપતિ ડોનાલ્ડ ટ્રમ્પે ‘વોટ ચોરી’ અને મતદાનમાં ગેરરીતિઓના મુદ્દે મોટી જાહેરાત કરી છે. ટ્રમ્પે કહ્યું છે કે જે વ્યક્તિ મતદાર છેતરપિંડી (વોટર ફ્રોડ) અંગે એવા પુરાવા આપશે, જેના આધારે આરોપીઓની ધરપકડ થાય અને તેમને દોષિત ઠેરવવામાં આવે, તેને 10 લાખ અમેરિકન ડૉલર એટલે કે આશરે ₹9 કરોડનું ઇનામ આપવામાં આવશે.
ટ્રમ્પની આ જાહેરાત એવા સમયે આવી છે, જ્યારે અમેરિકામાં ચૂંટણીની પારદર્શિતા, વહીવટી કામગીરી અને સંસદ પર નિયંત્રણ મેળવવા અંગે રાજકીય ચર્ચાઓ તેજ બની છે.
સોશિયલ મીડિયા પર ટ્રમ્પે કરી જાહેરાત, મૂકી આ શરત
ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ પર પોસ્ટ કરીને જાહેરાત કરી હતી કે અગાઉની ચૂંટણીઓ અથવા આગામી 2026ની મિડટર્મ ચૂંટણીમાં મતદાર છેતરપિંડી અંગે માહિતી આપનારને 10 લાખ ડૉલરનું ઇનામ આપવામાં આવશે.
જોકે, આ ઇનામ મેળવવા માટે એક શરત રાખવામાં આવી છે. માહિતીના આધારે ગેરરીતિ આચરનારાઓની ધરપકડ થવી જોઈએ અને તેમને દોષિત ઠેરવવામાં આવવા જોઈએ.
ટ્રમ્પે આ ઇનામની રકમ ક્યાંથી આપવામાં આવશે અને તેની વહેંચણી માટે કઈ પ્રક્રિયા અપનાવવામાં આવશે તે અંગે સ્પષ્ટતા કરી નથી.
ટ્રમ્પ માટે મિડટર્મ ચૂંટણી કેમ મહત્ત્વપૂર્ણ છે?
અમેરિકામાં 3 નવેમ્બરે યોજાનારી મિડટર્મ ચૂંટણીમાં હાઉસ ઑફ રિપ્રેઝન્ટેટિવ્સની તમામ 435 બેઠકો અને સેનેટની લગભગ એક તૃતીયાંશ બેઠકો માટે મતદાન થશે.
આ ચૂંટણીના પરિણામો નક્કી કરશે કે અમેરિકી સંસદના બંને ગૃહોમાં કયા પક્ષનું વર્ચસ્વ રહેશે. ટ્રમ્પ સરકાર માટે આ ચૂંટણી અત્યંત મહત્ત્વપૂર્ણ છે, કારણ કે તેના પરિણામોની સીધી અસર સરકારના આગામી કાયદાકીય અને નીતિગત એજન્ડા પર પડી શકે છે.
જો વિપક્ષી ડેમોક્રેટિક પાર્ટી સારું પ્રદર્શન કરે અને સંસદમાં બહુમતી મેળવે, તો ટ્રમ્પ સરકાર માટે પોતાની નીતિઓ અમલમાં મૂકવી મુશ્કેલ બની શકે છે. સાથે જ સરકારની કામગીરી અંગે તપાસ અને દેખરેખ પણ વધી શકે છે.
ચૂંટણીમાં ગેરરીતિ અંગે ટ્રમ્પે ફરી જૂનું વલણ દોહરાવ્યું
ડોનાલ્ડ ટ્રમ્પ લાંબા સમયથી ચૂંટણીમાં ગેરરીતિ અને મતદાર છેતરપિંડીના મુદ્દા ઉઠાવતા રહ્યા છે. તેઓ અગાઉ પણ 2020ની રાષ્ટ્રપતિ ચૂંટણીમાં જીત્યા હોવાનો દાવો કરી ચૂક્યા છે.
હવે ફરી એકવાર તેમણે ચૂંટણી પ્રક્રિયામાં પારદર્શિતા જાળવવાની જરૂરિયાત પર ભાર મૂક્યો છે અને મતદાર છેતરપિંડી અંગે માહિતી ધરાવતા લોકોને આગળ આવવા અપીલ કરી છે.
મિડટર્મ ચૂંટણી શું છે અને શા માટે મહત્ત્વપૂર્ણ છે?
અમેરિકામાં રાષ્ટ્રપતિના ચાર વર્ષના કાર્યકાળની મધ્યમાં યોજાતી ચૂંટણીને મિડટર્મ ચૂંટણી કહેવામાં આવે છે. આ ચૂંટણીને સરકારની કામગીરી અને જનતાના રાજકીય વલણનું મહત્ત્વપૂર્ણ સૂચક માનવામાં આવે છે.
આ ચૂંટણીમાં માત્ર સંસદની બેઠકો જ નહીં, પરંતુ વિવિધ રાજ્યો અને સ્થાનિક સંસ્થાઓની કેટલીક બેઠકો માટે પણ મતદાન યોજાય છે. તેથી મિડટર્મ ચૂંટણીનાં પરિણામો અમેરિકાના રાજકીય ભવિષ્ય પર નોંધપાત્ર અસર કરી શકે છે.
અન્ય ચૂંટણીલક્ષી વચનોને લઈને પણ ટ્રમ્પ ચર્ચામાં
તાજેતરમાં ડોનાલ્ડ ટ્રમ્પ અન્ય ચૂંટણીલક્ષી વચનોને કારણે પણ ચર્ચામાં રહ્યા છે. તેમણે એવો પ્રસ્તાવ પણ રજૂ કર્યો હતો કે જો રિપબ્લિકન પાર્ટી સંસદનાં બંને ગૃહોમાં બહુમતી જાળવી રાખે, તો દરેક પુખ્ત અમેરિકન નાગરિકને 5,000 ડૉલર આપવાનું શક્ય બની શકે છે.
આ ઉપરાંત, નોર્થ કેરોલિનાના એક સૈન્ય મથકના દૂષિત પાણીથી પ્રભાવિત ભૂતપૂર્વ સૈનિકોને વળતર આપવાના મુદ્દાને પણ તેમણે રિપબ્લિકન પાર્ટીની જીત સાથે જોડ્યો હતો.
