The player who was kicked out
- જગદીશન અત્યાર સુધી ચેન્નાઈ માટે કંઈ ખાસ કરી શક્યો ન હોવાથી તેને મિની ઓક્શન પહેલા રિલીઝ કરવામાં આવ્યો હતો પરંતુ તે પછી જગદીશને હવે વિજય હજારે ટ્રોફીમાં ઈતિહાસ રચ્યો.
IPL 2023 માટે તમામ ટીમોએ તેમના રિટેન કરેલા અને છોડેલા ખેલાડીઓની જાહેરાત કરી દીધી છે. આ દરમિયાન ચેન્નાઈની ટીમે (Chennai team) પોતાની ટીમના કેટલાક ખેલાડીઓને પણ બહાર કર્યા છે. જેમાં વિકેટ કીપર બેટસમેન એન જગદીશનનું (N Jagdeesan) નામ સામેલ છે.
જગદીશન અત્યાર સુધી ચેન્નાઈ માટે કંઈ ખાસ કરી શક્યો નથી. તેથી જ તેને મિની ઓક્શન (Mini Auction) પહેલા રિલીઝ કરવામાં આવ્યો હતો પરંતુ તે પછી જગદીશને હવે વિજય હજારે ટ્રોફીમાં (Vijay Hazare Trophy) ઈતિહાસ રચ્યો છે અને લાગે છે કે ચેન્નાઈની ટીમે તેને રિલીઝ કરીને ભૂલ કરી છે.
જગદીશને વિજય હજારે ટ્રોફી 2022ની છ ઇનિંગ્સમાં 799 રન બનાવ્યા છે. તે ટૂર્નામેન્ટમાં સૌથી વધુ રન બનાવનાર ખેલાડી છે. આ દરમિયાન તેણે સતત પાંચ ઇનિંગ્સમાં સદી ફટકારી અને વર્લ્ડ રેકોર્ડ પોતાના નામે કર્યો. આ ટુર્નામેન્ટમાં તેની સરેરાશ 159.80 છે અને તેનો સ્ટ્રાઈક રેટ 125.82 છે. જગદીશને અરુણાચલ પ્રદેશ સામે 141 બોલમાં 277 રન બનાવ્યા હતા.
તેની શાનદાર ઇનિંગના કારણે તમિલનાડુએ આ મેચમાં બે વિકેટ ગુમાવીને 506 રન બનાવ્યા હતા. લિસ્ટ A ક્રિકેટમાં 500થી વધુ રન બનાવનાર તમિલનાડુ પ્રથમ ટીમ છે. જગદીશન સિવાય સાઈ સુદર્શને પણ આ મેચમાં 154 રનની ઈનિંગ રમી હતી.
મહત્વનું છે કે વિજય હજારે ટ્રોફીમાં તેની પાંચમી સદી સાથે જગદીશન લિસ્ટ A ક્રિકેટમાં સતત સૌથી વધુ સદી ફટકારનાર ખેલાડી બની ગયો છે. તેણે શ્રીલંકાના દિગ્ગજ ખેલાડી કુમાર સંગાકારાનો રેકોર્ડ તોડ્યો છે. સંગાકારાએ 2014-15ના વર્લ્ડ કપમાં સતત ચાર સદી ફટકારી હતી.
તેના સિવાય ભારતના દેવદત્ત પડિકલે 2020-21 વિજય હજારે ટ્રોફીમાં સતત ચાર સદી ફટકારી હતી. તે જ સમયે દક્ષિણ આફ્રિકાના એલ્વિરો પીટરસને પણ 2015-16 મોમેન્ટમ ODI કપમાં સતત ચાર ઇનિંગ્સમાં સદી ફટકારી હતી. જો કે જગદીશન સતત પાંચ ઇનિંગ્સમાં સદી ફટકારનાર વિશ્વનો પ્રથમ બેટસમેન છે.
વિજય હજારે ટ્રોફીમાં આ સિઝનમાં જગદીશનનું પ્રદર્શન :
- પ્રથમ મેચઃ બિહાર સામે છ બોલમાં પાંચ રન બનાવ્યા
- બીજી મેચ: આંધ્રપ્રદેશ સામે 112 બોલમાં અણનમ 114 રન બનાવ્યા. 12 ચોગ્ગા અને બે છગ્ગા ફટકાર્યા.
- ત્રીજી મેચ: છત્તીસગઢ સામે 113 બોલમાં 107 રન બનાવ્યા. 10 ચોગ્ગા અને બે છગ્ગા ફટકાર્યા.
- ચોથી મેચ: ગોવા સામે 140 બોલમાં 168 રન બનાવ્યા. 15 ચોગ્ગા અને છ છગ્ગા ફટકાર્યા.
- પાંચમી મેચઃ હરિયાણા સામે 123 બોલમાં 128 રન બનાવ્યા. છ ચોગ્ગા અને છ છગ્ગા ફટકાર્યા.
- છઠ્ઠી મેચઃ અરુણાચલ પ્રદેશ સામે 141 બોલમાં 277 રન બનાવ્યા. 25 ચોગ્ગા અને 15 છગ્ગા ફટકાર્યા.
લિસ્ટ A ક્રિકેટમાં સૌથી વધુ ભાગીદારી :
એન જગદીશન અને સાઈ સુદર્શને લિસ્ટ Aમાં સૌથી વધુ ભાગીદારીનો રેકોર્ડ બનાવ્યો. બંનેએ પ્રથમ વિકેટ માટે 416 રનની ભાગીદારી કરી હતી. લિસ્ટ A ક્રિકેટમાં કોઈપણ વિકેટ માટે આ સૌથી મોટી ભાગીદારી છે. આ પહેલા ગેલ અને સેમ્યુઅલ્સે 372 રનની ભાગીદારી કરી હતી.
આ પણ વાંચો :-