સુરત શહેરે રમતગમત ક્ષેત્રે એક વધુ ગૌરવપૂર્ણ સિદ્ધિ હાંસલ કરી છે. સિટીલાઇટ વિસ્તારમાં રહેતી અને પ્રતિભાશાળી ઓલરાઉન્ડર ક્રિકેટર ગૌરી ગોયલની ભારતીય અંડર-19 મહિલા ક્રિકેટ ટીમમાં પસંદગી થઈ છે. શ્રીલંકા સામે રમાનારી આગામી દ્વિપક્ષીય શ્રેણી માટે ગૌરીને ભારતીય ટીમમાં સ્થાન મળતાં સુરત અને સમગ્ર ગુજરાતમાં આનંદની લાગણી છવાઈ ગઈ છે. સુરતના ક્રિકેટ ઈતિહાસમાં પ્રથમ વખત કોઈ મહિલા ખેલાડી સીધી ભારતીય ટીમ સુધી પહોંચી હોવાનું માનવામાં આવે છે.
ડોમેસ્ટિક ક્રિકેટમાં સતત પ્રદર્શનથી પસંદગી
સુરત ડિસ્ટ્રિક્ટ ક્રિકેટ એસોસિએશન (SDCA)ના ક્રિકેટ સેક્રેટરી નૈમેષ દેસાઈએ જણાવ્યું હતું કે ગૌરી પ્રકાશ ગોયલે વિવિધ ડોમેસ્ટિક ટુર્નામેન્ટોમાં સતત ઉત્તમ પ્રદર્શન કરીને રાષ્ટ્રીય પસંદગીકારોનું ધ્યાન ખેંચ્યું હતું. સુરતના ક્રિકેટ ઈતિહાસ માટે આ એક યાદગાર અને ગૌરવપૂર્ણ ક્ષણ છે. લાંબા સમયથી એવી માન્યતા હતી કે સુરતના ખેલાડીઓ ડોમેસ્ટિક સ્તરથી આગળ વધી આંતરરાષ્ટ્રીય સ્તરે પહોંચી શકતા નથી, પરંતુ ગૌરીની સિદ્ધિએ આ માન્યતાને ખોટી સાબિત કરી છે.
સેન્ટર ઑફ એક્સલન્સ કેમ્પમાં શાનદાર દેખાવ
ગૌરીના સતત સારા પ્રદર્શનને ધ્યાનમાં રાખીને BCCI દ્વારા આયોજિત 26 દિવસીય ‘સેન્ટર ઑફ એક્સલન્સ અંડર-19 મહિલા એલિટ કેમ્પ’ માટે તેની પસંદગી કરવામાં આવી હતી. આ કેમ્પ માટે દેશભરમાંથી માત્ર 78 મહિલા ક્રિકેટરોની પસંદગી કરવામાં આવી હતી. ગુજરાતમાંથી ગૌરી ગોયલ ઉપરાંત અક્સાહ પરમાર, ચાર્લી સોલંકી, આયુષી પટેલ, જીયા જૈન અને સિયા પટેલનો સમાવેશ થયો હતો.
કેમ્પ પૂર્ણ થયા બાદ 13-13 ખેલાડીઓની છ ટીમો બનાવી ઇન્ટર-કેમ્પ ટુર્નામેન્ટ યોજાઈ હતી, જેમાં ગૌરીએ પોતાની ઓલરાઉન્ડ રમતથી પસંદગીકારોને પ્રભાવિત કર્યા હતા.
લેફ્ટ આર્મ સ્પિનર અને વિશ્વસનીય બેટર
ગૌરી ગોયલ એક કુશળ ઓલરાઉન્ડર તરીકે ઓળખાય છે. તે ડાબોડી સ્પિન બોલિંગ દ્વારા વિરોધી ટીમના બેટરોને મુશ્કેલીમાં મૂકી શકે છે. સાથે જ મધ્યક્રમમાં બેટિંગ કરીને ટીમને સ્થિરતા આપવાની ક્ષમતા પણ ધરાવે છે. આધુનિક ક્રિકેટમાં આવા ઓલરાઉન્ડરોની ખાસ માંગ રહેતી હોવાથી તેની પસંદગી વધુ મહત્વપૂર્ણ માનવામાં આવી રહી છે.
એક જ સિઝનમાં 28 મેચ રમવાની સિદ્ધિ
ગૌરી માટે વર્તમાન સિઝન અત્યંત સફળ રહી છે. તેણે અંડર-19, અંડર-23 અને સિનિયર મહિલા ક્રિકેટ સહિત કુલ 28 BCCI માન્ય મેચોમાં ભાગ લીધો છે અને બોલિંગ તેમજ બેટિંગ બંનેમાં નોંધપાત્ર પ્રદર્શન કર્યું છે. ગૌરીના પિતા પ્રકાશ ગોયલ સુરતના જાણીતા ટેક્સટાઇલ વેપારી છે. ક્રિકેટની વ્યસ્તતા વચ્ચે ગૌરી હાલમાં ધોરણ-12ની ઓપન બોર્ડ પરીક્ષાની તૈયારી પણ કરી રહી છે.
શ્રીલંકા સામે મળશે પ્રતિભા બતાવવાની તક
ભારતીય ટીમમાં સ્થાન મળ્યા બાદ હવે ગૌરી શ્રીલંકા સામેની અંડર-19 મહિલા શ્રેણીમાં પોતાનું કૌશલ્ય બતાવશે. આ શ્રેણી અંતર્ગત ચેન્નાઈમાં ત્રણ T20 મેચો અને પોંડિચેરીમાં ત્રણ ODI મેચો રમાશે.
વર્લ્ડ કપ ટીમ માટે મજબૂત દાવેદાર
શ્રીલંકા સામેની આ શ્રેણી આગામી અંડર-19 મહિલા વર્લ્ડ કપ માટે મહત્વપૂર્ણ માનવામાં આવી રહી છે. શ્રેણીમાં સારું પ્રદર્શન કરનારા ખેલાડીઓ માટે વર્લ્ડ કપ ટીમમાં સ્થાન મેળવવાની તક વધુ મજબૂત બનશે. જાન્યુઆરી 2027માં બાંગ્લાદેશ અને નેપાળની સંયુક્ત યજમાનીમાં યોજાનારા ICC અંડર-19 મહિલા વર્લ્ડ કપ માટે ગૌરી હાલ મજબૂત દાવેદાર તરીકે જોવામાં આવી રહી છે.
માતા-પિતા અને કોચિંગ સ્ટાફનો આભાર
લાલભાઈ કોન્ટ્રાક્ટર સ્ટેડિયમ ખાતે યોજાયેલી પત્રકાર પરિષદમાં ગૌરીએ જણાવ્યું હતું કે, “હું ગુજરાત તરફથી રમીને ગર્વ અનુભવું છું. ભગવાન, મારા માતા-પિતા અને સપોર્ટ સ્ટાફનો હું હૃદયપૂર્વક આભાર માનું છું. તેમણે દરેક સમયે મને પ્રોત્સાહન આપ્યું છે. દેશનું પ્રતિનિધિત્વ કરવાની તક મળવી મારા માટે ગૌરવની વાત છે અને હું મારા શ્રેષ્ઠ પ્રદર્શન દ્વારા દેશ માટે યોગદાન આપવાનો પ્રયાસ કરીશ.”
ગૌરી ગોયલની આ ઐતિહાસિક સિદ્ધિ બદલ ગુજરાત ક્રિકેટ એસોસિએશન (GCA), સુરત ડિસ્ટ્રિક્ટ ક્રિકેટ એસોસિએશન (SDCA) તેમજ રમતપ્રેમીઓએ તેને ઉજ્જવળ ભવિષ્ય માટે શુભેચ્છાઓ પાઠવી છે.
