સુરત ગ્રામ્ય SOGમાં ફરજ બજાવતા હેડ કૉન્સ્ટેબલ ભરતભાઈ દેસાઈનું માર્ગ અકસ્માતમાં કરુણ મોત થયું છે. આ ગમખ્વાર ઘટના વડોદરા જિલ્લાના પાદરા નજીક એક્સપ્રેસ-વે પર બની હતી, જ્યાં તેમની કાર અચાનક આગળ જતી એસટી બસની પાછળ જોરદાર અથડાઈ ગઈ. અથડામણ એટલી ભયાનક હતી કે કારનો કચ્ચરઘાણ નીકળી ગયો અને ભરત દેસાઈનું ઘટનાસ્થળે જ મૃત્યુ થયું હતું.
પ્રાથમિક માહિતી મુજબ, સુરત ગ્રામ્ય એસઓજીના હેડ કૉન્સ્ટેબલ ભરત દેસાઈ પોતાની ખાનગી કારમાં એક્સપ્રેસ વે પર મુસાફરી કરી રહ્યાં હતાં તે સમયે પાદરા નજીક તેમણે સ્ટીયરિંગ પરથી કાબૂ ગુમાવી દીધો હતો. ભરત દેસાઈની કાર આગળ જઈ રહેલી એસટી બસના પાછળના ભાગે અંદર સુધી ઘૂસી ગઈ હતી. ધડાકાભેર થયેલા અકસ્માતના કારણે કારના ભૂક્કા બોલી ગયા હતા અને ડ્રાઈવીંગ સીટ પર બેસેલા ભરત દેસાઈનું સ્થળ પર મોત થયું હતું. અકસ્માતના પગલે 108 તેમજ પોલીસ સ્ટાફ દોડી આવ્યો હતો અને કારને બસની નીચેથી બહાર કાઢવામાં આવી હતી. અત્રે નોંધનીય છે કે, બે મહિના અગાઉ જ ભરત દેસાઈના પિતાનું નિધન થયું છે.
