સુરત શહેરના અલથાણ વિસ્તારમાં એક બેફામ ડમ્પર ચાલકે મોપેડ સવાર યુવકને કચડી નાખતા ભયાનક અકસ્માત સર્જાયો. અથડામણ એટલી જોરદાર હતી કે યુવકનું ઘટનાસ્થળે જ કરુણ મોત થયું, જેના કારણે વિસ્તારમાં શોક અને રોષનું માહોલ ફેલાયો.
પ્રાથમિક માહિતી મુજબ, ભારે વાહનોની અવરજવર વચ્ચે ડમ્પર અચાનક બેકાબૂ બન્યો અને રસ્તા પર જઈ રહેલા મોપેડ સવારને અડફેટે લીધો. શહેરમાં છેલ્લા કેટલાક સમયથી ભારે વાહનોના વધતા આતંક વચ્ચે આ વધુ એક નિર્દોષનો ભોગ બન્યો હોવાનું સ્થાનિકોમાં ચર્ચાઈ રહ્યું છે.
CCTVમાં કેદ થયેલા ભયાનક દ્રશ્યો
આ સમગ્ર અકસ્માતની ઘટના નજીકના CCTV કેમેરામાં કેદ થઈ હતી. ફૂટેજમાં સ્પષ્ટ દેખાય છે કે જયેશ પોતાની લેનમાં શાંતિથી જઈ રહ્યો હતો ત્યારે પાછળથી આવેલા ડમ્પરે તેને ટક્કર મારી. અથડામણ બાદ તે બાઈક સાથે ડમ્પરના ટાયર નીચે આવી ગયો અને થોડી દૂર સુધી ઘસડાયો. આ દ્રશ્યો અત્યંત હ્રદયવિદારક હતા.
હેલ્મેટ હોવા છતાં બચી શક્યો નહીં
જયેશે હેલ્મેટ પહેર્યું હોવા છતાં અકસ્માતની તીવ્રતા એટલી વધારે હતી કે ડમ્પરના ભારે ટાયર તેના માથા પરથી ફરી વળતા તેનું મોત થયું. આસપાસના લોકો તરત જ મદદે દોડી આવ્યા હતા, પરંતુ ત્યાં સુધીમાં જયેશે દમ તોડી દીધો હતો.
પરિવારમાં શોકની લાગણી
જયેશ પોતાના પરિવારનો એકમાત્ર સહારો હતો. પિતા પ્રાથમિક શાળામાં પ્રિન્સિપાલ છે અને પરિવારની જવાબદારીમાં જયેશનો મોટો ફાળો હતો. હજુ તે અપરિણિત હતો અને તેના લગ્નની તૈયારી ચાલી રહી હતી. નવી સિવિલ હોસ્પિટલમાં માતાનું કરુણ રોદન – “બેટા, તારા તો લગ્ન કરાવવાના હતા” – સાંભળીને સૌ કોઈ ભાવુક બની ગયા હતા.
અકસ્મત બાદ ભાગવાનો પ્રયાસ કરનાર ડમ્પર ચાલક રામ નરેશ રાજેન્દ્ર યાદવ (ઉંમર 32)ને સ્થાનિક લોકોએ પકડીને પોલીસને સોંપ્યો હતો. અલથાણ પોલીસ દ્વારા તેની ધરપકડ કરી કાયદેસરની કાર્યવાહી હાથ ધરવામાં આવી છે.
